ដឹងអត់? ក្រៅពីបាល់ទាត់ Neymar ចូលចិត្តកីឡាអ្វី ហើយកីឡាករបាល់ទាត់រូបណាជា Idol គេ?

បរទេស៖ បើទោះបីជាកីឡាករ Neymar បច្ចុប្បន្ននេះជាកីឡាករលំដាប់ពិភពលោកដ៏ល្បីល្បាញមួយរូបយ៉ាងណាក្តី ក៏ប៉ុន្តែ Neymar ហាក់បីដូចជាមិនលាក់លៀមឡើយ ថែមទាំងបានបញ្ជាក់យ៉ាងច្បាស់ថា Idol របស់គេតែមួយនោះគឺកីឡាករ Robinho។

កីឡាករទាំងពីររូបនេះ (Neymar, Robinho) សុទ្ធសឹងជាយុវជនថ្នាលដ៏មានទេពកោសល្យរបស់ក្លិប Santos។ Neymar បានឱ្យដឹងក្នុងបទសម្ភាសន៍ជាមួយសារព័ត៌មាន DAZN ថា៖ “Idol របស់ខ្ញុំគឺ Robinho។ តាំងពីខ្ញុំនៅក្មេង ខ្ញុំតែងតែពេញចិត្តនូវអ្វីគ្រប់យ៉ាងដែលគាត់ធ្វើ និយាយឱ្យចំទៅខ្ញុំចង់ក្លាយជាកីឡាករម្នាក់ដូចគាត់”។

មិនត្រឹមតែប៉ុណ្ណោះ Neymar ក៏បានបង្ហើបប្រាប់ពីចំណង់ចំណូលចិត្តរបស់គាត់ទៅលើកីឡាផ្សេងៗ ក្រៅពីបាល់ទាត់ផងដែរ។ កីឡាករឆ្នើមរបស់ប្រេស៊ីលរូបនេះបាននិយាយថា៖ 

“តាមពិតទៅខ្ញុំនៅតែលេងកីឡាផ្សេងៗជាច្រើនតាមដែលអាចទៅរួច។ វាប្រហែលជាពិបាកនឹងជឿ បើសិនជាខ្ញុំប្រាប់ថា ខ្ញុំមិនមែនជាអ្នកដែលចូលចិត្តមើលបាល់ទាត់ច្រើនឡើយ”។ Neymar បន្ថែមថា៖ “នៅពេលទំនេរពីបាល់ទាត់ ខ្ញុំចូលចិត្តមើលបាល់បោះ ហើយខ្ញុំពិតជាកោតសរសើរដល់អត្តពលិកផ្សេងៗណាស់”៕