រាជធានីភ្នំពេញ ៖ ក្រុមគ្រួសាររបស់លោក គង្គ ប៊ុនឈឿន គ្រោងប្តឹងទៅកាន់ភាគីពាក់ព័ន្ធចំពោះបទចម្រៀងរបស់តារាចម្រៀងនាយ ចឺម ដែលទើបតែចេញថ្មីៗនេះ បានកាឡៃបទភ្លេង និងទំនុកច្រៀងទាំងស្រុងពីស្នាដៃមរតកដើមរបស់កវីស្ទឹងសង្កែ។ បទចម្រៀងរបស់នាយ ចឺម ដែលត្រូវបានផ្សព្វផ្សាយតាមបណ្តាញអ៊ីនធើណេតដែលមានចំណងជើងថា «អូនជាអ្នកមានសមនឹងអ្នកមានដូចគ្នា» ដែលត្រូវបានកាឡៃបទភ្លេងពីបទ «ថ្ងៃដែលអូនចុកឈាម ឬនឹកភូមិភ្នំធំ» ដែលជាមរតកដើមពីកវីនិពន្ធ គង្គ ប៊ុនឈឿន។
ផលិតកម្មសាន់ដេ បានផលិតបទចម្រៀងមួយនេះសម្រាប់តារាចម្រៀងនាយ ចឺម ជាមួយនឹងការដាក់និពន្ធបទភ្លេងដោយ Boty និង Jane Roffer ដែលចំណុចនេះបានធ្វើឲ្យក្រុមគ្រួសារក៏ដូចជាបណ្តាអ្នកលេងហ្វេសប៊ុកផ្ទុះការរិះគន់យ៉ាងខ្លាំង។
យ៉ាងណាក៏ដោយ បន្ទាប់ពីមានការរិះគន់នោះមក ក្រុមគ្រួសាររបស់កវី គង្គ ប៊ុនឈឿន បានចេញមកប្រតិកម្ម និងគ្រោងរៀបចំឯកសារពាក់ព័ន្ធដើម្បីប្តឹងឲ្យផលិតកម្មសាន់ដេ បញ្ឈប់នូវការចាក់ផ្សាយបទចម្រៀងរបស់នាយ ចឺម ខាងលើនេះ។
ក្រុមគ្រួសាររបស់កវីស្ទឹងសង្កែបានចាត់ទុកទង្វើពីអ្នកនិពន្ធ និងម្ចាស់ផលិតដែលបានធ្វើសកម្មភាពខាងលើនេះ គឺជាការប្រមាថដល់ស្នាដៃម្ចាស់ដើម និងជាការបំផ្លាញនូវស្នាដៃដែលជាមរតកដើមផងដែរ។
ជាអ្នកដឹកនាំរឿង នឹងជាកូនប្រសារបស់កវី គង្គ ប៊ុនឈឿន លោក មុត ថារី បានអះអាងប្រាប់កោះសន្តិភាពតាមសាអេឡិចត្រូនិចនៅព្រឹកថ្ងៃទី២៧ ខែកុម្ភៈ នេះថា បច្ចុប្បន្នម្តាយក្មេកលោក និងប្អូនៗដែលទទួលរក្សាសិទ្ធិបទចម្រៀងលោក គង្គ ប៊ុនឈឿន ជាមួយក្រុមព្រះសុរិយាបានរៀបចំឯកសារដែលជាភស្តុតាង ដើម្បីប្តឹងទៅកាន់ភាគីពាក់ព័ន្ធ។
លោកបញ្ជាក់ថា «សម្រាប់នាយចឺម ដែលយកបទភ្លេងកាឡៃមរតកដើម ទៅស្រែកច្រៀងអាឡេអាឡូ ជាមួយការផលិតឡើងពីអ្នកនិពន្ធ និងអ្នកផលិត ចាត់ទុកនោះគឺជាការប្រមាថមួយ។អ្នកសសេរដែលយកបទភ្លេងពីដើមមកកាឡៃឲ្យតារាចម្រៀងច្រៀងឡូឡាតាមចិត្ត ហើយក្រុមហ៊ុនផលិតនោះ មានខួរក្បាលគិតទេថា តើគាត់គួរទទួលបទចឹងមកផលិត និងផ្សព្វផ្សាយលក់ដែរឬយ៉ាងណា?
លោក មុត ថារី បន្ថែមថា ប្រសិនបើយើងទទួលបទគេមកច្រៀង ហើយទទួលសិទ្ធិពីម្ចាស់ដើម នោះ គឺមានន័យថា យើងបានចូលរួមថែរក្សា ប៉ុន្តែផ្ទុយទៅវិញបើយើងយករបស់គេមកកាឡៃនោះមានន័យថា យើងបានបំផ្លាញរបស់គេហើយ។
យ៉ាងណាលោកមិនយល់ស្របទៅនឹងបញ្ហាខាងលើនេះឡើយ ព្រោះវាជាសកម្មភាពនៃការបំផ្លាញនៃតម្លៃមរតកដើម ដែលកវី គង្គ ប៊ុនឈឿន បានខិតខំរិះគិតតាក់តែងឡើង។
លោកបញ្ជាក់ថា ករណីខាងលើនេះ មិនចាំបាច់ទាល់តែក្រុមគ្រួសារធ្វើការប្តឹងនោះឡើយ ពោលគឺភាគីពាក់ព័ន្ធដទៃទៀត ជាពិសេសនាយកដ្ឋានកម្មសិទ្ធិបញ្ហានៃក្រសួងវប្បធម៌ ព្រោះបើមានក្រុមហ៊ុនណាមានបំណងចង់សុំផលិតបទចម្រៀងមរតកដើម គឺត្រូវបង់ថវិកាទៅឲ្យនាយកដ្ឋាន ហើយបើមានក្រុមគ្រួសារដែលជាម្ចាស់កម្មសិទ្ធិ បញ្ហាគឺត្រូវបង់ថវិកាឲ្យក្រុមគ្រួសារគេ។
លោកបញ្ជាក់ថា ស្ថាប័នកម្មសិទ្ធិបញ្ញាគួរមានវិធានការលើបញ្ហានេះ ដោយត្រូវហៅម្ចាស់ផលិតកម្ម អ្នកដែលអួតថា និពន្ធថ្មី និងអ្នកច្រៀងទៅធ្វើការព្រមាន និងចាត់វិធានការទៅតាមផ្លូវច្បាប់។
យ៉ាងណាបើតាមលោក មុត ថារី លោកមិនចង់ឲ្យមានការប្តឹងផ្តល់នេះកើតឡើងឡើយ គ្រាន់តែសុំឲ្យម្ចាស់ផលិតកម្ម និងតារាចម្រៀងនាយ ចឺម ឈប់ផលិតលុប និងលែងផ្សព្វផ្សាយនូវបទចម្រៀងខាងលើនេះ ដោយមានការទទួលខុសត្រូវ។
គួរបញ្ជាក់ថា កម្រងចម្រៀងដែលនិពន្ធដោយកវីលោក គង្គ ប៊ុនឈឿន ដែលត្រូវបោះពុម្ភផ្សាយក្នុងសៀវភៅកំណាព្យស្នេហ៍មាស ដែលមានប្រមាណជាង៦០បទ ត្រូវបានក្រុមគ្រួសាររបស់លោកដាក់ចូលក្នុងជាកម្មសិទ្ធិបញ្ញា៕
បទចម្រៀង ដែលជាមរតកដើមពីកវីនិពន្ធ គង្គ ប៊ុនឈឿន ៖ (ប្រភពពី Pleng Angkor)
បទចម្រៀងដោយនាយចឺម ៖ (ប្រភពពី Sunday Production Official)
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]