បុរសម្នាក់ដែលត្រូវគេចាប់ជម្រិត បានឈរទ្រហូរយំយ៉ាងខ្លាំង ពេលបានជួបឪពុកម្តាយបង្កើតវិញ ក្រោយបែកគ្នាអស់ ៣១ឆ្នាំ (មានវីដេអូ)

ចិន៖  បុរសម្នាក់ដែលត្រូវបានគេចាប់ជម្រិតកាលពី៣១ឆ្នាំមុន បានឈរទ្រហូរយំយ៉ាងខ្លាំងនៅមុខមហាជនរាប់រយនាក់ដែលកំពុងឈរមើល ព្រោះគាត់ពិតជារំភើបចិត្តពេលបានជួបជុំឪពុកម្តាយបង្កើតសាជាថ្មី។ ហេតុការណ៍នេះកើតឡើងនៅក្នុងខេត្តស៊ីឈួន ដែលមានទីតាំងក្នុងប៉ែកនិរតីនៃប្រទេសចិន។

យោងតាមសារព័ត៌មានចិន SCMP ចេញផ្សាយថ្ងៃទី២៦ ខែកុម្ភៈ ឆ្នាំ២០១៩ បានឲ្យដឹងថា បុរសដែលត្រូវបានគេចាប់ជម្រិតមានឈ្មោះ Qin Yujie ឫ Cheng Xueping (ឈ្មោះដើម)។ នៅពេលគាត់ឃើញម្តាយឪពុកសាជាថ្មី គាត់បានស្ទុះទៅអោបអ្នកមានគុណទាំងពីរឡើងជាប់មិនចង់ព្រលែងឡើយ។

គ្រានោះលោក Qin បាននិយាយទៅកាន់ឪពុកម្តាយគាត់ថា “ ខ្ញុំបានតាមរកអ្នកទាំងពីរអស់រយៈពេលជាច្រើនឆ្នាំមកហើយ តែនៅតែគ្មានតម្រុយអ្វីបន្តិចសោះ”។

គួរបញ្ជាក់ថា ក្នុងឆ្នាំ១៩៨៨ លោក Qin មានអាយុទើប៣ឆ្នាំប៉ុណ្ណោះ។ កាលនោះ គាត់ត្រូវបានគេចាប់នៅការដ្ឋានសំណង់ដែលមានទីតាំងក្នុងខេត្តឈីចូវ ខណៈពេលម្តាយឪពុកគាត់កំពុងធ្វើការ។  នៅថ្ងៃកើតហេតុ ម្តាយឪពុកលោក Qin បានចំណាយពេលជាច្រើនម៉ោងដើម្បីស្វែងរកកូនប្រុសពួកគេ តែមិនមានតម្រុយអ្វីបន្តិចសោះ។ បន្ទាប់ពីពេលនោះមក ពួកគាត់តែងតែសន្សំលុយនិងខ្ចីលុយគេដើម្បីទុកជាសោហុយធ្វើដំណើរដើម្បីស្វែងរកកូនប្រុសគាត់ទូទាំងប្រទេសចិនបន្តទៀត។

លោក Qin និង ម្តាយឪពុកបង្កើតបានជួបគ្នាវិញដោយសារទិន្នន័យនៃការធ្វើតេស្ត DNA ដូចគ្នា។  ជាទូទៅនៅក្នុងប្រទេសចិន ក្មេងជាច្រើនត្រូវបានបាត់ខ្លួនដោយមិនដឹងមូលហេតុ អីចឹងហើយម្តាយឪពុករបស់ពួកគេតែងតែទៅដាក់ពាក្យបណ្តឹងឲ្យក្រុមប៉ូលិសជួយស្វែងរក។

ម្តាយឪពុកបង្កើតរបស់លោក Qin បានខ្លោចចិត្តយ៉ាងខ្លាំង ពេលដឹងការពិតថាកូនប្រុសរបស់ពួកគេត្រូវបានគេចាប់ហើយយកទៅលក់ឲ្យអ្នកស្រុកក្នុងខេត្ត Hebei ដែលមានទីតាំងនៅប៉ែកខាងជើងនៃប្រទេសចិន។ លោក Qin បានធំធាត់នៅទីនោះជាមួយនឹងគ្រួសារថ្មីរបស់គាត់។ បន្ទាប់ពីរស់នៅទីនោះអស់រយៈពេលជាច្រើនឆ្នាំ លោក Qin បានដឹងថាគ្រួសារដែលលោករស់នៅជាមួយ គឺមិនមែនជាគ្រួសារពិតប្រាកដរបស់គាត់ទេ ហើយគាត់ក៏ចាប់ផ្តើមស្វែងរកវត្តមានឪពុកម្តាយបង្កើតតាំងពីពេលនោះមក។

ឥឡូវនេះពួកគេទាំងអស់គ្នាបានជួបជុំគ្រួសារជាថ្មីម្តងទៀតហើយ។ អ្វីដែលគួរឲ្យចាប់អារម្មណ៍នោះគឺ ឪពុកម្តាយបង្កើតរបស់លោក Qin ក៏បានជួបភរិយា និងកូនរបស់លោក Qin ជាលើកដំបូងដែរ៕

មានវីដេអូនៅខាងក្រោម៖

• គ្រួសារ
• ជីវិត