អ្នកគាំទ្រក្រុម Scalke ម្នាក់ត្រូវចាប់ខ្លួន បន្ទាប់ពីប្រើហិង្សាធ្ងន់ធ្ងរលើអ្នកគាំទ្រ Man City ម្នាក់ស្ទើរបាត់បង់ជីវិត

អាល្លឺម៉ង់៖ សមាជិកក្រុមអ្នកគាំទ្រ “ULTRAS” របស់ក្លិបបាល់ទាត់ Schalke ម្នាក់ត្រូវបានចាប់ខ្លួន បន្ទាប់ពីមានករណីអំពើហិង្សាដ៏ព្រៃផ្សៃមួយបានកើតឡើងទៅលើអ្នកគាំទ្រក្លិប Man City មួយរូប បណ្តាលឱ្យរងរបួសយ៉ាងធ្ងន់ធ្ងរស្ទើរតែបាត់បង់ជីវិត។ 

បើយោងតាមសារព័ត៌មាន Dailymail បានចុះផ្សាយថា បុរសវ័យ ៣២ឆ្នាំម្នាក់ កំពុងស្ថិតនៅបន្ទប់សង្គ្រោះបន្ទាន់ ក្រោយពីទទួលរងអំពើហិង្សាមួយ ក្នុងជំនួបដែលក្រុម Man City ឈ្នះក្រុម Schalke ៣ទល់នឹង២ នាពានរង្វាន់ Champions League។ 

បុរសរងគ្រោះខាងលើ នៅមិនទាន់ត្រូវបានគេស្គាល់អត្តសញ្ញាណនៅឡើយ ប៉ុន្តែគាត់ត្រូវបានក្រុមគ្រួសាររៀបរាប់ពីស្ថានភាពរបួសរបស់គាត់ថា “ប៉ះទង្គិចធ្ងន់ធ្ងរដល់លលាដ៏ក្បាល និងខួរក្បាល” និងកំពុងស្ថិតក្នុងស្ថានភាពធ្ងន់ធ្ងរនៅមន្ទីរពេទ្យ។

ដោយឡែក ប៉ូលិសតំបន់ Gelsenkirchen បានចាប់ខ្លួនអ្នកគាំទ្ររបស់ក្លិប Schalke ដែលជាជនបង្កហេតុបានផងដែរ កាលពីថ្ងៃចន្ទម្សិលមិញនេះ។ បើតាមរបាយការណ៍របស់ប៉ូលិសបានឱ្យដឹងថា៖ “អ្នកគាំទ្ររបស់ក្លិប Schalke ឈ្មោះ “Hugos” វ័យ ៣០ឆ្នាំ ត្រូវបានចាប់ខ្លួនកាលពីថ្ងៃទី ២៥ ខែកុម្ភៈ ២០១៩ វេលាម៉ោង ១០ព្រឹកនៅក្នុងតំបន់ Vinckestrasse នាទីក្រុង Gelsenkirchen ហើយគាត់ត្រូវបានប៉ូលិសបញ្ជូនទៅកាន់មន្ទីរកែប្រែ”។

សូមជម្រាបថា ក្រុមគ្រួសាររបស់ជនរងគ្រោះក៏កំពុងស្នាក់នៅប្រទេសអាល្លឺម៉ង់ដើម្បីមើលថែជនរងគ្រោះ ស្របពេលដែលក្រុមការងាររបស់ក្លិប Man City ក៏ជួយមើលការខុសត្រូវផងដែរ៕