ច្រឹង ពលរដ្ឋ បញ្ជាក់ច្បាស់ៗជុំវិញរឿងរ៉ាវរបស់ខ្លួន ជាមួយក្លិប Buriram United!

ភ្នំពេញ៖ អតីតកីឡាកររបស់ក្លិបបាល់ទាត់ក្រសួងការពារជាតិ ច្រឹង ពលរដ្ឋ បានបាត់មុខពីលើវាលស្មៅអស់រយៈពេលយូរគួរសម ដោយសារបញ្ហារបួស។ មុនពេលទទួលរងបញ្ហារបួសនេះដែរ ច្រឹង ពលរដ្ឋ បានបង្ហាញទម្រង់លេងដ៏ទាក់ទាញ និងទទួលបានចំណាប់អារម្មណ៍ច្រើនពីអ្នកគាំទ្របាល់ទាត់ជាតិ។ មិនត្រឹមតែប៉ុណ្ណោះ ច្រឹង ពលរដ្ឋ ថែមទាំងត្រូវបានក្លិបជើងឯកលីគកំពូលថៃ Buriram United ពេញចិត្ត និងចាប់អារម្មណ៍នាំយករូបគេទៅចូលរួមទៀតផង។

ប៉ុន្តែគួរឱ្យសោកស្តាយ ដោយសារពលរដ្ឋកំពុងមានបញ្ហារបួស ជាហេតុធ្វើឱ្យរូបគេពន្យារពេលសម្រាប់ការបង្ហាញខ្លួននៅក្លិប Buriram United។ ស្រាប់តែកាលពីម្សិលមិញនេះកីឡាករ ច្រឹង ពលរដ្ឋ បានបង្ហោះសារមួយនៅលើបណ្តាញសង្គមរបស់គេផ្ទាល់ថា៖ “ច្បាស់ការខ្ញុំនៅតែជាសមាជិកក្រុមបាល់ទាត់ BURIRAM UNITED ហើយខ្ញុំអាចនឹងចាកចេញពីប្រទេសកម្ពុជាក្នុងអំឡុងខែ មេសា រឺ ឧសភា តាមការជាក់ស្តែងពីរបួសរបស់ខ្ញុំបាទផ្ទាល់ ។

-ជាថ្មីម្តងទៀតសូមអរគុណដល់ពុកម៉ែ បងប្អូន និងអ្នកគាំទ្រទាំងអស់ដែលតែងតែសួរនាំ និងបារម្មណ័ពីរបួសខ្ញុំបាទ

ពីខ្ញុំបាទ ច្រឹង ពលរដ្ឋ”។ 

បន្ទាប់ពីពលរដ្ឋបានបង្ហោះសារច្បាស់ៗបែបនេះហើយ អ្នកគាំទ្រជាច្រើនបានចូលរួមលើកទឹកចិត្ត និងអបអរសាទរចំពោះជំហ៊ានបន្ទាប់របស់កីឡាកររូបនេះ។ 

គួរបញ្ជាក់ថា កាលពីពេលកន្លងមក ធ្លាប់មានពាក្យចចាមអារ៉ាមថាពលរដ្ឋត្រូវបាន Buriram ប្តូរចិត្តលែងចង់បានកីឡាកររូបនេះទៅហើយ ប៉ុន្តែគ្រប់យ៉ាងត្រូវបានកីឡាករពលរដ្ឋបកស្រាយច្បាស់លាស់រួចរាល់ហើយ។

ក្រុមការងារកីឡាខ្មែរឡូត សូមជូនពរដល់កីឡាករពលរដ្ឋឆាប់ជាពីរបួស និងជោគជ័យបន្ថែមទៀតក្នុងអាជីពបាល់ទាត់៕