ថៃ៖ ក្មេងប្រុសវ័យជំទង់ជនជាតិថៃ២នាក់ ត្រូវបានប៉ូលិសចរាចរណ៍ថៃ ចាប់ផាកពិន័យដោយសារតែជិះម៉ូតូពុំពាក់មួកសុវត្ថិភាព ប៉ុន្តែមិនមានលុយបង់ពិន័យ ក៏ត្រូវប៉ូលិសពិន័យដោយឲ្យពួកគេអាវ៉ង់នៅចិញ្ចើមផ្លូវឲ្យខ្មាសគេតែម្តង។
បើយោងតាមប្រព័ន្ធផ្សព្វផ្សាយក្នុងស្រុក បានរាយការណ៍ឲ្យដឹងថា ហេតុការណ៍នេះបានកើតឡើងកាលពីពេលថ្មីៗកន្លងទៅនេះ នៅលើបណ្តាយផ្លូវមួយកន្លែង ស្ថិតក្នុងខេត្ត Samut Prakan ភាគខាងត្បូងក្បែរទីក្រុងបាងកក។
យុវជនទាំង២នាក់ ដែលមិនត្រូវបានគេស្គាល់អត្តសញ្ញាណខាងលើនេះ ត្រូវបានប៉ូលិសចរាចរណ៍ផ្លូវគោកថៃ បានធ្វើការចាប់ផាកពិន័យក៏ព្រោះតែពួកគេទាំងពីរ បានប្រព្រឹត្តខុសពុំពាក់មួកសុវត្ថិភាព ក្នុងកំឡុងពេលជិះម៉ូតូនៅលើដងផ្លូវ។
ប៉ូលិសបានផាកពិន័យពួកគេ ក្នុងចំនួនទឹកប្រាក់ ៥០០បាត (ឬប្រហែល ១៦ដុល្លារអាមេរិក) ប៉ុន្តែផ្ទុយទៅវិញ យុវជនទាំងពីរបានប្រាប់ថា ពួកគេពុំមានលុយសម្រាប់បង់ថ្លៃផាកពិន័យនោះឡើយ។ ទើបនៅទីបំផុត ប៉ូលិសក៏សម្រេចចិត្តប្តូរពីការផាកពិន័យជាទឹកប្រាក់ ដោយឲ្យពួកគេទាំងពីរអាវ៉ង់នៅចិញ្ចើមផ្លូវ ដើម្បីទុកជាមេរៀនតែម្តង។
ក្រោយយុវជនទាំងពីរបានអាវ៉ង់រួចរាល់ ប៉ូលិសក៏បានធ្វើការណែនាំដល់ពួកគេទាំងពីរបន្ថែមទៀត ដោយឲ្យប្រុងប្រយ័ត្ននៅក្នុងការបើកបរ និងប្រាប់ឲ្យពួកគេចេះពាក់មួកសុវត្ថិភាពដើម្បីការពារជីវិតខ្លួនឯង (ពេលមានគ្រោះណាមួយកើតឡើង) ក៏ដូចជាចៀសវាងពីការផាកពិន័យទៀតផងដែរ។ ខណៈឯយុវជនទាំងពីរ ក៏បានលើកដៃសំពះអរគុណដល់ប៉ូលិសចរាចរណ៍ ដោយទឹកមុខញញឹមបង្ហាញពីការគោរព និងទទួលស្គាល់កំហុសរបស់ពួកគេផងដែរ។
គួរឲ្យដឹងផងដែរថា អាយុស្របច្បាប់ក្នុងការបើកបរម៉ូតូក្នុងប្រទេសថៃ គឺចាប់ពីអាយុ១៥ឆ្នាំឡើងទៅ ហើយក៏តម្រូវឲ្យអ្នកបើកបរ (អ្នកឌុប) និងអ្នកដំណើរ (អ្នកជិះពីក្រោយ) ពាក់មួកសុវត្ថិភាពឲ្យបានត្រឹមត្រូវផងដែរ ៕
តើសម្រាប់ប្រិយមិត្តវិញយល់យ៉ាងណាដែរ?
ទស្សនាវីដេអូខាងក្រោម៖
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក ប្លែកៗ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
