សាន់ហ្វ្រេនស៊ីស្កូ៖ ដើម្បីអបអរសារទរខួប ១០ឆ្នាំនៃស្មាតហ្វូន Galaxy ត្រកូល S ក្រុមហ៊ុន Samsung បានបញ្ចេញអាវុធធំៗមួយចំនួនមានដូចជា Galaxy S10, Galaxy S10+, Galaxy S10E, Samsung Galaxy Watch Active, Samsung Galaxy Buds និងអាវុធពិសេសចុងក្រោយគឺ Samsung Galaxy Fold។ ដូច្នេះថ្ងៃនេះយើងសូមនិយាយអំពី Samsung Galaxy Fold ជូនប្រិយមិត្តតាមដានទាំងអស់គ្នា។ (សូមតាមដានអត្ថបទក្រោយផ្សេងទៀតចំពោះ S10, S10+, S10e, Watch Active, និង Galaxy Buds)។
កាលពីម្សិលមិញនេះ អនុប្រធានជាន់ខ្ពស់ផ្នែកទីផ្សារនៃផលិតផលរបស់ក្រុមហ៊ុន Samsung លោក Justin Denison បានដាក់បង្ហាញទូរស័ព្ទ Galaxy Fold ដែលជាទូរស័ព្ទបត់អេក្រង់ដំបូងគេបង្អស់របស់ Samsung ធ្វើឱ្យពិភពលោកមានការចាប់អារម្មណ៍ជាខ្លាំង។
Galaxy Fold មានអេក្រង់ទំហំ ៤.៦ អ៊ីញ ជាប្រភេទ Infinity Flex Display ដែលអាចបង្ហាញរូបភាពបានច្បាស់ល្អបំផុត ហើយលក្ខណៈពិសេសរបស់វា គឺវាអាចពន្លាតអេក្រង់បានទៅដល់ ៧.៣ អ៊ីញប្រៀបដូចជាកូនកាត់ថេប្លេតអីចឹង។
ក្រៅពីអេក្រង់បត់នេះចំពោះផ្នែកកាមេរ៉ាវិញ វាមានរហូតដល់ទៅ ៦គ្រាប់ ដែលអាចថតយករូបភាពនិងវីដេអូបានច្បាស់បំផុតនៅក្នុងទីផ្សារកាមេរ៉ាស្មាតហ្វូននាពេលបច្ចុប្បន្ន។
Samsung ក៏បានសហការជាមួយបណ្តាញសង្គម Instagram ដែលនឹងបំពាក់មុខងារពិសេសសនៅក្នុងកាមេរ៉ាសម្រាប់ការថតរូប Instagram Mode ចូលទៅក្នុងបណ្តាញសង្គមនេះបានយ៉ាងល្អឥតខ្ចោះ។ ដូច្នេះវាពិតជាសាកសមសម្រាប់ហ្វេនដែលនិយមចូលចិត្តថតរូបដាក់ក្នុងបណ្តាញសង្គម Instagram។ អ្នករាល់គ្នាប្រាកដជាស្រលាញ់ទូរស័ព្ទមួយគ្រឿងនេះជាក់ជាពុំខាន។
លើសពីនេះទៅទៀត Galaxy Fold ក៏បំពាក់រ៉េមរហូតដល់ ១២GB ជាមួយនឹងបន្ទះឈីប Snapdragon 855 (7nm) និងអង្គផ្ទុកក្នុងម៉ាស៊ីនទំហំដល់ទៅ ៥១២GB។ ស្មាតហ្វូននេះក៏បំពាក់ថ្មចំនួន ២គ្រាប់ ជាមួយនឹងទំហំថ្មដល់ទៅ ៤៣៨០mAh។
Galaxy Fold មាន ៤ពណ៌សម្រាប់ជ្រើសរើសទៅតាមចំណង់ចំណូលចិត្តរបស់អ្នកប្រើប្រាស់ មានដូចជាពណ៌ខ្មៅ, លឿង, ស្វាយ និងពណ៌ប្រាក់។ ស្មាតហ្វូនអេក្រង់បត់ដ៏ប្រណីតនេះ នឹងដាក់លក់ចាប់ពីថ្ងៃទី ២៦ ខែមេសា ឆ្នាំ២០១៩ ខាងមុខនេះ ជាមួយតម្លៃថ្លៃ មិននឹកស្មានដល់នោះទេ ពោលគឺមានតម្លៃ ១៩៨០ ដុល្លារអាមេរិក (តម្លៃដើមនៅស្រុកគេ) ហើយវាអាចនឹងឡើងដល់ទៅ ២,០០០ជាង ឬប្រែប្រួល ពេលមកដល់ស្រុកយើង៕
ទស្សនារូបភាព និងវីដេអូខាងក្រោម៖
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក បច្ចេកវិទ្យា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]