ភ្នំពេញ៖ អ្នកប្រដាល់ស្បែកខ្មៅជនជាតិនីហ្សេរីយ៉ា Emmanuel Onyedikachi ដែលទើបរៀបការ ប្រពន្ធខ្មែររស់នៅទីក្រុងភ្នំពេញ បានចាប់ផ្តើមល្បីខ្លាំងក្នុងឆាកប្រយុទ្ធគុនចម្រុះលើទឹកដីអាស៊ីអាគ្នេយ៍ ។ ក្រោយពីបានឈ្នះការប្រកួតធំៗតំណាងឲ្យកម្ពុជាចំនួន៣លើកនៅ ONE Championship នៅថ្ងៃទី២៨ កុម្ភៈ ខាងមុខនេះ រូបគេនឹងមានមុខប្រកួតតំណាងកម្ពុជាម្តងទៀតនៅលើសង្វៀន ONE Warrior Series 4 របស់ Rich Franklin ប្រទេសសិង្ហបុរី។
ក្នុងវ័យ៣២ឆ្នាំ កីឡាករជនជាតិស្បែកខ្មៅ រូបនេះ ត្រូវបានគេផ្គូផ្គងឱ្យជួបប្រកួតជាមួយអ្នកប្រដាល់អាមេរិកកំពុងលេចធ្លោម្នាក់ដែរគឺ Devon Morris ។ លើកនេះអាចនិយាយ បានថាជាការប្រកួតក្នុងព្រឹត្តិការណ៍ធំដែល ប្រជុំដោយអ្នកខ្លាំងមិនដូចការប្រកួតមុនៗ ឡើយ ។ ដូច្នេះចាំមើលអ្នកប្រដាល់សាច់ដុំក្បាល ពោះកង់ៗរូបនេះនឹងធ្វើបានល្អដូចមុនទៀតឬ យ៉ាងណា ខណៈកីឡាករដែលលោកត្រូវជួបនាពេលនោះក៏មានសមត្ថភាពខ្លាំងមិនធម្មតាបែបហ្នឹងនោះ។
Emmanuel បាននិយាយពីចំណុចខ្លាំងរបស់គូប្រកួតប្រាប់អ្នកយកព័ត៌មានឱ្យគេហទំព័រ ក្នុងស្រុកមួយថា អ្នកប្រដាល់អាគាំងDevonMorris មានបទពិសោធន៍ក្រាស់ដែរដែលលោក ចូលចិត្តបែបអ៊ីចឹង ។ លោកពេញចិត្តតទល់ជាមួយអ្នកខ្លាំងៗបែបនេះ ហើយលោកក៏មិន បណ្តោយឲ្យខ្លួនឯងឈ្នះត្រឹមពិន្ទុនោះដែរ ចាំតែមើលទៅ ។
Devon Morris គឺជាជើងខ្លាំងប្រចាំ ក្លិប Phuket Top Team មានប្រវត្តិ ប្រកួត៧ដងឈ្នះទាំង៧ដងហើយសុទ្ធតែឈ្នះ ដោយផ្ដួលគូប្រកួតក្នុងទឹកទី១ទៀតផង និងមានតែម្តងគត់ដែលឈ្នះដោយពិន្ទុ ។ រីឯ Emmanuel ជាអ្នកប្រដាល់អាជីពមកពីក្លិប «សិល្បៈ» ដែលមានខ្លាចាស់ ចាន់ រតនា ជាអ្នកដឹកនាំ ដូច្នោះសម្រាប់គាត់គឺហ៊ានសាកថ្វីដៃជាមួយគូប្រកួតទាំងអស់ឲ្យតែគេផ្គូផ្គង។
រហូតមកដល់ពេលនេះ Emmanuel មានកំណត់ ត្រាឈ្នះ៣ដងជាប់ៗគ្នា ហើយចាប់ផ្ដើមល្បីខ្លាំង
ពេលវាយជើងខ្លាំងឥណ្ឌា Sandeep Kumar Dahiya ឱ្យដួលក្រោកលែងរួចក្នុងទឹកទី១។ ទោះបីយ៉ាងណា Emmanuel ប្រាប់ពីអា រម្មណ៍របស់ខ្លួនមុនការប្រកួតនៅសិង្ហបុរីថា ៖«វាជាការប្រកួតដ៏ពិបាកមួយទៀតរបស់ខ្ញុំ ព្រោះត្រូវប្រឈមមុខជាមួយគូប្រកួតដែលមានកម្លាំងប្រហែលគ្នា ។ អាចនិយាយថាដូចគោព្រៃប៉ះគោព្រៃអ៊ីចឹងវាច្បាស់ជាផ្អើលសង្វៀន មិនខាន!»។
ក្រៅពីរវល់ហ្វឹកហាត់ពង្រឹងកម្លាំងបន្ថែម Emmanuelក៏មមាញឹកខ្លាំងក្នុងជីវិតក្រៅសង្វៀន ផងដែរ ។ គាត់បានកសាងគ្រួសារផ្ទាល់ខ្លួនដោយ ទើបរៀបអាពាហ៍ពិពាហ៍ថ្មីថ្មោងជាមួយនារីខ្មែរ ដ៏ស្រស់ស្អាតម្នាក់ហើយមកដល់ពេលនេះលោកកំពុងត្រៀមក្លាយជាឪពុករបស់កូនក្នុងផ្ទៃហើយ។
មួយរយៈចុងក្រោយនេះ មានរឿងជាច្រើនបានកើតឡើងក្នុងជីវិតកីឡាករស្បែកខ្មៅរស់នៅ ក្រុងភ្នំពេញម្នាក់នេះ ដែលធ្វើឲ្យគាត់ក្លាយជា មនុស្សផ្លាស់ប្តូរខុសពីមុនស្ទើរតែទាំងស្រុង ។ បន្តិចទៀតគាត់នឹងក្លាយជាឪពុកគេហើយ ដូច្នេះ វារឹតតែធ្វើឲ្យគាត់កាន់តែឆាបឆួលក្នុងការពង្រឹងអាជីពឲ្យកាន់តែមានលំនឹងខ្លាំងជាងនេះទៀត។
សព្វថ្ងៃក្រៅពីអាជីពប្រដាល់ Emmanuelក៏ជាឯកអគ្គរដ្ឋទូតសុច្ឆន្ទៈតំណាងឲ្យអង្គការ ក្រៅរដ្ឋាភិបាលមួយហៅថា Awareness Cambodia ។ អ្នកប្រដាល់មានដើមកំណើត នៅប្រទេសនីហ្សេរីយ៉ា រូបនេះនឹងបោះជំហាន ដើរចូលសង្វៀនដាក់ទ្រុងម្តងទៀត ដោយមាន ការគាំទ្រពេញទំហឹងពីក្មេងៗ និងបុគ្គលិកនៅ អង្គការដែលគោរពរាប់អានគាត់ បូករួមជាមួយគ្រួសាររបស់គាត់ផងដែរ។
ជាចុងក្រោយ Emmanuel បានបង្ហើប ប្រាប់ខ្លះៗពីជីវិតដ៏លំបាកវេទនាពេលមកដល់ កម្ពុជាដំបូង ប៉ុន្តែគាត់ចង់យកឱកាសនេះបង្ហាញ ដល់ជនរួមជាតិកម្ពុជាទាំងអស់ថា អ្នកណា ក៏អាចផ្លាស់ប្តូរជីវិតខ្លួនឯងបានដែរ បើសិនយើង ចេះខិតខំតាំងចិត្ត ហើយចេះបណ្តុះស្មារតីវិជ្ជមាន ជានិច្ច ។
គាត់រំលឹកឃ្លាដែលគាត់ចូលចិត្ត «គ្រាន់តែពេលខ្ញុំគិតថាពិភពលោកទាំងមូល កំពុងលេងសើចនឹងខ្ញុំ ស្រាប់តែអ្វីៗក៏ចាប់ផ្តើម ផ្លាស់ប្តូរទាំងស្រុង ។ ខ្ញុំជឿថា ឆ្នាំ២០១៩ ជាឆ្នាំពិសេសបំផុត»៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
