កំសត់ម្ល៉េះ! Neymar ប្រាប់ថា គេធ្លាប់ដេកយំជាប់គ្នា ២ថ្ងៃ ក្រោយរបួសជើងកាលពីខែមុន

បារាំង៖ ខ្សែប្រយុទ្ធសញ្ជាតិប្រេស៊ីលរបស់ក្លិប Paris Saint-Germain កីឡាករ Neymar Jr និយាយថា រូបគេធ្លាប់ដេកយំ ២ថ្ងៃជាប់គ្នា បន្ទាប់ពីរងរបួសឆ្អឹងជើងផ្នែកខាងស្តាំកាលពីខែមករា កន្លងមកនេះ។

Neymar នឹងត្រូវសម្រាកព្យាបាលរបួសជើងរបស់គេ និងនៅក្រៅទីលានរហូតដល់ខែមេសា ខាងមុខ បន្ទាប់ពីប៉ះទង្គិចក្នុងជំនួបទល់នឹង Strasbourg។

គួរឱ្យដឹងថា នេះហាក់បីដូចជារឿងចៃដន្យមួយដែរ ចំពោះរបួសជើងនេះ ដែល Neymar ធ្លាប់រងរបួសត្រង់កន្លែងតែមួយកាលពីខែកុម្ភៈ ឆ្នាំមុន។

ក្នុងបទសម្ភាសន៍ជាមួយទូរទស្សន៍ Globo របស់ប្រេស៊ីល Neymar ប្រាប់ថា៖ “របួសលើកនេះ វាហាក់ដូចជាធ្ងន់ធ្ងរជាងមុនក្នុងការព្យាបាលឱ្យជាសះស្បើយ។ ពេលរបួសភ្លាមៗ ខ្ញុំបានដេកយំនៅផ្ទះ ២ថ្ងៃជាប់គ្នា។ កាលពីរបួសលើកទី១ ខ្ញុំមិនសូវពិបាកចិត្តទេ ព្រោះខ្ញុំដឹងថា ខ្ញុំនឹងត្រូវវះកាត់ហើយរបួសនឹងឆាប់ធូរស្រាល។”

គួរបញ្ជាក់ថា កាលពីឆ្នាំមុន Neymar ធ្លាប់រងរបួសកន្លែងដដែល នឹងត្រូវសម្រាកពីទីលានរយៈពេល ៣ខែដោយសារតែត្រូវវះកាត់។

ដោយឡែក សម្រាប់របួសលើកនេះ ក្រុមវេជ្ជបណ្ឌិតរបស់ PSG បានសម្រេចព្យាបាលដោយបច្ចេកទេស ដោយមិនតម្រូវឱ្យមានការវះកាត់ទៀតឡើយ។ ជាថ្មីម្តងទៀត ក្រុមគ្រូពេទ្យរបស់ Neymar បានបញ្ជាក់ថា រូបគេនឹងត្រូវសម្រាករយៈពេល ១០សប្តាហ៍ មុននឹងអាចត្រលប់មកកាន់វាលស្មៅសាជាថ្មីម្តងទៀត៕