អាមេរិក៖ អតីតជើងឯកកីឡាប្រដាល់ទម្ងន់ធ្ងន់លំដាប់ពិភពលោក Mike Tyson បានប្រាប់រឿងដ៏គួរឱ្យភ្ញាក់ផ្អើលមួយដល់អ្នកសារព័ត៌មាន។
យោងតាមសារព័ត៌មាន The Sun បានឱ្យដឹងថា លោក Mike Tyson វ័យ៥២ឆ្នាំ បានប្រាប់អ្នកសារព័ត៌មានថា លោកធ្លាប់បានព្យាយាមឱ្យប្រាក់ទៅអ្នកថែរក្សាសួនសត្វចំនួន ១ម៉ឺនដុល្លារ ដើម្បីចង់មានឱកាសវាយជាមួយនឹងសត្វស្វាឪយក្សខ្នងពណ៌ប្រាក់មួយក្បាល ព្រោះតែវាបានគំរាមកំហែង ឬធ្វើបាបដល់សត្វស្វាឪដទៃទៀត។
លោកបាននិយាយថា រឿងនេះបានកើតឡើងតាំងពីឆ្នាំ១៩៨៦មកម្ល៉េះ ខណៈពេលដែលលោក Mike Tyson និងអតីតភរិយាលោកអ្នកនាង Robin Givens កំពុងតែដើរកម្សាន្តនៅក្នុងសួនសត្វមួយកន្លែងក្នុងទីក្រុងញូវយ៉ក។ ស្រាប់តែលោកបានឃើញសត្វស្វាឪយក្សខ្នងពណ៌ប្រាក់មួយក្បាល បានគំរាមកំហែងធ្វើបាបដល់សត្វស្វាឪដទៃទៀត។
«នៅពេលដែលយើងកំពុងដើរសំដៅទៅទ្រុងសត្វស្វាឪ យើងបានឃើញសត្វស្វាឪយក្សខ្នងពណ៌ប្រាក់មួយក្បាល កំពុងគំរាមកំហែងធ្វើបាបសត្វស្វាឪដទៃទៀត។ វាពិតជាមានអំណាចខ្លាំងណាស់។ ដូច្នេះខ្ញុំក៏ស្នើថានឹងផ្តល់ប្រាក់ដល់អ្នកថែរក្សាសួនសត្វចំនួន ១ម៉ឺនដុល្លារ ដើម្បីឱ្យគេបើកទ្រុងនោះឡើង ហើយខ្ញុំនឹងវាយវាឱ្យណាណីយកតែម្តង។ ប៉ុន្តែត្រូវបានអ្នកថែរក្សាសួនសត្វបដិសេធនឹងសំណើមួយនេះ។»
ហេតុនេះលោកមិនបានវាយជាមួយនឹងសត្វស្វាឪយក្សខ្នងពណ៌ប្រាក់មួយក្បាលនោះទេ។
រឿងរ៉ាវនេះពិតជាធ្វើឱ្យមហាជនមានការភ្ញាក់ផ្អើលជាខ្លាំង ព្រោះលោក Mike Tyson ជាអ្នកស្រលាញ់សត្វតាំងតែពីដើមមកម្ល៉េះ ពោលគឺលោកធ្លាប់ចិញ្ចឹមសត្វខ្លា សត្វព្រាប និងសត្វជាច្រើនប្រភេទផ្សេងទៀត៕
ទស្សនារូបភាពនៅខាងក្រោម៖
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]