ខេត្តបន្ទាយមានជ័យ ៖ ស្ត្រីម្នាក់អះអាងថា ប្តីនាងលួចរៀបការជាមួយប្រពន្ធថ្មី ថែមទាំងធ្វើពិធីកាត់ចំណងដៃនៅក្រុងប៉ោយប៉ែត នារសៀលថ្ងៃទី១៧ ខែកុម្ភៈ ឆ្នាំ២០១៩នេះ ប៉ុន្តែនាងមិនរករឿងទេ តាមរកសុំត្រឹមតែយកមេដៃដើម្បីបញ្ចប់បញ្ហាតែប៉ុណ្ណោះ។
ករណីនេះកើតឡើងនៅប៉ុស្តិ៍នគរបាលរដ្ឋបាលសង្កាត់ផ្សារកណ្តាល ស្ថិតក្នុងភូមិនិងសង្កាត់ផ្សារកណ្តាល ក្រុងប៉ោយប៉ែត ខណៈនាង និងសាច់ញាតិបានទៅកាន់ទីនោះ ដើម្បីទាមទាររកយុត្តិធម៌។ ស្ត្រីខាងលើមកពីស្រុកព្រៃឈរ ខេត្តកំពង់ចាម អាយុ២៣ឆ្នាំ។
តាមស្ត្រីខាងលើរៀបរាប់ថា កាលមុនឆ្នាំ២០១៧ នាងទៅធ្វើការជាកម្មកររោងចក្រនៅក្រុងប៉ោយប៉ែត ហើយស្គាល់បុរសម្នាក់ឈ្មោះ វៀង វិចិត្រ រស់នៅភូមិអូរញ៉ូ ឃុំបឹងព្រីង ស្រុកថ្មគោល និងស្នាក់នៅក្រុងប៉ោយប៉ែតធ្វើការជាមួយគ្នា។ លុះក្រោយមកបុរសខាងលើតាមសុំស្នេហ៍នាង និងឱ្យឱពុកម្តាយរបស់គេទៅចូលស្តីដណ្តឹងនាងដល់ម៉ែឱពេញមុខ ហើយរៀបការនៅក្នុងខែមេសា ឆ្នាំ២០១៧ នៅគេហដ្ឋានរបស់នាងក្នុងខេត្តកំពង់ចាម។
នាងបន្តថា ក្រោយពីរស់នៅជាមួយគ្នាមួយរយៈបុរសជាប្តីដោយសារពាក់ព័ន្ធនឹងប្រាក់បំណុលធនាគារ 2000$ និងយកម៉ូតូម៉ាកសង់ស៊េរីឆ្នាំ2016 របស់ម្តាយនាងទៅដាក់បញ្ចាំគេផង ក៏សុំនាងចេញទៅរកស៊ីដើម្បីរកប្រាក់ដោះការជំពាក់គេ។ ក្រោយចាកចេញពីផ្ទះជិត១ឆ្នាំ ប្តីនាងមិនដែលទាក់ទងប្រាប់ពីទីកន្លែងរស់នៅ ឬសួរសុខទុក្ខនាងឡើយ។ មិនតែប៉ុណ្ណោះទុកឱ្យនាងដោះបំណុលគេជុំកោះថែមទៀត ទីបំផុតនាងទទួលព័ត៌មានស្ទើរចុកឈាមថា ប្តីនាងរៀបការជាមួយប្រពន្ធថ្មីបាត់ទៅហើយនៅផ្ទះរបស់គេ (ខាងប្រុស) ក្នុងភូមិអូរញ៉ូ ឃុំបឹងព្រីងស្រុកថ្មគោល ខេត្តបាត់ដំបង កាលពីថ្ងៃទី៨ កុម្ភៈកន្លងទៅថ្មីនេះ ដោយនាងទទួលបានទាំងរូបថតអាពាហ៍ពិពាហ៍ជាមួយស្រីថ្មីនេះទៀតផង។
នាងថា កន្លងមកតែងតែទាក់ទងសួរម្តាយក្មេករកប្តី តែគាត់កុហកថា ប្តីនាងរវល់ទៅរកស៊ី បើបានលុយវាទៅស្រុកហើយ ដឹងអីឲ្យកូនរៀបការទៀត។ ហើយនាងចុងដែលប្តីនាងទៅលួចរៀបការជាមួយក៏ធ្លាប់ធ្វើការជុំគ្នាទៀត ហើយនាងថែមទាំងធ្លាប់ប្រាប់តាមទូរស័ព្ទថា នាងនិងប្តីមិនទាន់លែងលះគ្នាទេ។ ដោយមានព័ត៌មានថា ប្តីលួចធ្វើពិធីកាត់ចំណងដៃនៅថ្ងៃនេះ17/2/2019 ព្រមទាំងមានលិខិតអញ្ជើញភ្ញៀវឡើងតុផង នាងក៏សម្រេចចិត្តនាំសាច់ញាតិទៅកាន់ប៉ុស្តិ៍នគរបាលរដ្ឋបាលសង្កាត់ផ្សារកណ្តាល ឱ្យជួយរកយុត្តិធម៍។
នគរបាលប៉ុស្តិ៍បានទៅហៅបុរសខាងលើឱ្យជួបជាមួយនាងដើមដោយផ្ទាល់ ប៉ុន្តែមិនបានធ្វើពាក្យបណ្តឹងអ្វីនោះទេ ព្រោះនាងជាប្រពន្ធដើមនិយាយថា ចង់បានត្រឹមតែការផ្តិតមេដៃពីប្តីដើម្បីនាងមានសិទ្ធិរៀបការជាមួយបុរសផ្សេងទៀតដូចគ្នានាពេលអនាគត។ ខណៈនោះបុរសខាងលើទៅដល់ប៉ុស្តិ៍រដ្ឋបាលដំបូងមិនហា៑នតបតអ្វីមួយម៉ាត់ពីនាងប្រពន្ធដើមឡើយ បើទោះជានាងដើមព្រលះដោយពាក្យសំដីធ្ងន់យ៉ាងណាក៏ដោយ ។ ក្រោយពីព្រមឯកភាពថា នឹងទៅផ្តិតមេដៃលែងលះនៅឯឃុំស្រុក (ខាងប្រពន្ធដើម) ដែលបានប្រកាសច្បាប់អាពាហ៍ពិពាហ៍ ហើយបុរសខាងលើឡើងជិះម៉ូតូចេញទៅវិញភ្លាម សូម្បីតែសួរនាំថា កំពុងធ្វើកម្មវិធីអ្វីក៏មិនឆ្លើយតបដែរ។
គួរបញ្ជាក់ថា ពិធីកាត់ចំណងដៃនេះសមត្ថកិច្ចប្រាប់ថា មិនមានលើករោងទេ ត្រឹមរៀបចំតុធ្វើជាពិធីសាមញ្ញតែប៉ុណ្ណោះ។ នាងប្រពន្ធដើមអះអាងមុខសមត្ថកិច្ចថា បើបុរសខាងលើមិនចូលខ្លួនទៅផ្តិតមេដៃបញ្ចប់បញ្ហាតាមការសន្យាចំពោះមុខសមត្ថកិច្ចទេ នាងនឹងដាក់ពាក្យបណ្តឹងតាមផ្លូវច្បាប់៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]