រាជធានីភ្នំពេញ ៖ ជនសង្ស័យ៦នាក់ ពាក់ព័ន្ធនឹងអំពើឆក់ទូរស័ព្ទ និងប្រើប្រាស់ថ្នាំញៀនខុសច្បាប់ ត្រូវកម្លាំងនគរបាលនៃអធិការដ្ឋាននគរបាលខណ្ឌមានជ័យសហការជាមួយនគរបាលប៉ុស្តិ៍ស្ទឹងមានជ័យទី១ ធ្វើការបង្ក្រាបបាននៅចំណុចក្រោមស្ពានអាកាសស្ទឹងមានជ័យ ស្ថិតក្នុងសង្កាត់ស្ទឹងមានជ័យទី១ ខណ្ឌមានជ័យ កាលពីម៉ោង៤និង៣០នាទីទាបភ្លឺ ថ្ងៃទី១៧ ខែកុម្ភៈ ឆ្នាំ២០១៩ ។
ជនសង្ស័យទាំង៦នាក់ដែលត្រូវឃាត់ខ្លួន ក្នុងនោះ៥នាក់ជាជនប្រមូលផ្តុំគ្នាពពាក់ពពូនប្រើប្រាស់ថ្នាំញៀន និងម្នាក់ទៀតជាជនធ្វើសកម្មភាពឆក់ទូរស័ព្ទដៃពីអ្នកដំណើរ មានឈ្មោះ ថេន វណ្ណថន អាយុ១៦ឆ្នាំ ស្នាក់នៅក្បែរតំបន់ខាងលើ ។
តាមប្រភពព័ត៌មានឱ្យដឹងថា នៅម៉ោង២និង៣០នាទីទាបភ្លឺថ្ងៃដដែលខាងលើ ក្រុមជនខាងលើមានគ្នាជាង១០នាក់អង្គុយពពាក់ពពូនគ្នានៅក្រោមស្ពាន (ចំណុចកើតហេតុ ) និងដើរទៅវិញទៅមកយ៉ាងប្រសាច ។ លុះដល់ម៉ោងកើតហេតុ មានជនរងគ្រោះគ្នា៤នាក់ ប្រុសម្នាក់ជាអ្នកឌុប និងស្រី៣នាក់ជិះម៉ូតូមួយគ្រឿងធ្វើដំណើរឆ្លងកាត់ចំណុចដែលក្រុមជនសង្ស័យកំពុងឈរពពាក់ពពូនគ្នានោះ ជាហេតុធ្វើឱ្យជនសង្ស័យម្នាក់រត់ទៅបុកជនម៉ូតូជនរងគ្រោះធ្វើឱ្យនារីរងគ្រោះម្នាក់កំពុងអង្គុយលើម៉ូតូកាន់ទូរស័ព្ទចុច ត្រូវធ្លាក់ទូរស័ព្ទចុះពីដៃ ហើយពេលនោះក្រុមជនសង្ស័យម្នាក់ទៀតរត់មកស្រវាទៅយកទូរស័ព្ទដែលជ្រុះនោះ រួចនាំគ្នារត់គេចបាត់ស្រមោលសូន្យពីកន្លែងកើតហេតុអស់ ។
ប្រភពដដែលបន្តថា ភ្លាមៗនោះ ជនរងគ្រោះនាំគ្នាទៅដាក់ពាក្យបណ្តឹងនៅប៉ុស្តិ៍រដ្ឋបាលនគរបាលមូលដ្ឋាន ដើម្បីសុំកិច្ចអន្តរាគមន៍ ។ បន្ទាប់ពីទទួលពាក្យបណ្តឹងហើយ កម្លាំងនគរបាលផ្នែកព្រហ្មទណ្ឌនៃអធិការដ្ឋាននគរបាលខណ្ឌ និងនគរបាលប៉ុស្តិ៍សហការគ្នាចុះស្រាវជ្រាវ រហូតឈានដល់ឃាត់ខ្លួនជនសង្ស័យ៦នាក់ ដើម្បីយកទៅសួរនាំនៅប៉ុស្តិ៍នគរបាល ខណៈជនសង្ស័យជាច្រើននាក់ទៀតរត់គេចខ្លួនអស់ ។
ក្រោយការសួរនាំរួចមក ជនសង្ស័យម្នាក់ក្នុងចំណោម៦នាក់ ឆ្លើយសារភាពថា ខ្លួនពិតជាបានចូលរួមក្នុងសកម្មភាពឆក់ប្រាកដមែន ដោយខ្លួនជាអ្នករត់ទៅរើសពេលទូរស័ព្ទជ្រុះ ។ ដោយឡែក៥នាក់ផ្សេងទៀត គឺមិនជាប់ពាក់ព័ន្ធនឹងករណីនេះឡើយ គឺពួកគេសុទ្ធតែជាជនប្រើប្រាស់ថ្នាំញៀនប៉ុណ្ណោះ ។ យ៉ាងណាមិញ បច្ចុប្បន្នជនទាំង៦នាក់ ត្រូវបញ្ចូនខ្លួនទៅអធិការដ្ឋាននគរបាលខណ្ឌមានជ័យ រង់ចាំកសាងសំណុំរឿងបញ្ជូនទៅតុលាការចាត់ការទៅតាមនីតិវិធីច្បាប់នៅពេលក្រោយ ។
នាយប៉ុស្តិ៍នគរបាលស្ទឹងមានជ័យទី១ លោកម៉ៅ សាវឿន បញ្ជាក់ប្រាប់កោះសន្តិភាពឱ្យដឹងថា ករណីខាងលើនេះ ជនសង្ស័យមិនមែនមានតែម្នាក់ឯងនោះទេ គឺក្រុមនោះមានគ្នាច្រើនដោយពពាក់ពពូនគ្នាអង្គុយលេងដូចធម្មតា លុះមានឱកាសល្អមកដល់ ពួកគេក៏ធ្វើសកម្មភាពតែម្តងទៅ ។ លោកបញ្ជាក់ថា បច្ចុប្បន្ននេះកម្លាំងនគរបាលឃាត់បានតែម្នាក់ប៉ុណ្ណោះដែលជាល្មើស ដោយឡែកបក្សពួកផ្សេងៗទៀតកំពុងរត់គេចខ្លួននោះ កម្លាំងជំនាញបានកំណត់មុខសញ្ញាបានអស់ហើយដែរ បច្ចុប្បន្នគឺកំពុងស្រាវជ្រាវតាមចាប់ខ្លួនយកមកផ្តន្ទាទោសតាមផ្លូវច្បាប់ ។ ចំពោះទូរស័ព្ទរបស់ជនរងគ្រោះ គឺពុំទាន់យកបានមកវិញឡើយ ពោលគឺបក្សពួករបស់ក្រុមជនសង្ស័យដែលរត់គេចខ្លួននោះ ជាអ្នកយកទៅជាមួយ ។
គួរបញ្ជាក់ថា ករណីខាងលើនេះ គឺពុំមែនជាលើកទីមួយនោះឡើយ ពោលគឺតែងកើតមានជារឿយៗនៅចំណុចខាងលើនេះ ដែលក្រុមក្មេងៗប្រើប្រាស់ថ្នាំញៀនជាច្រើន តែងនាំគ្នាទៅឈរពពាក់ពពូនគ្នាយ៉ាងច្រើន លុះមានអ្នកដំណើរជិះឆ្លងកាត់ឃើញឱកាសល្អ ក្រុមជនសង្ស័យទាំងនោះ ក៏នាំគ្នាធ្វើសកម្មភាពតែម្តង ដូចជាឆក់ទ្រព្យសម្បត្តិ ឬវាយប្លន់យកម៉ូតូជាដើម ។
ពលរដ្ឋទូទៅស្នើដល់សមត្ថកិច្ចមូលដ្ឋាន និងសមត្ថកិច្ចពាក់ព័ន្ធទាំងអស់ មេត្តាពង្រាយកម្លាំងល្បាតពួនស្ទាក់នៅចំណុចក្រោមស្ពានអាកាសស្ទឹងមានជ័យខាងលើនេះ ឱ្យបានតឹងរឹងបំផុត ឬប្រសិនជាអាចគួរមានកម្លាំងនគរបាលសម្រាប់ប្រចាំការនៅទីនោះផងដែរ ដើម្បីធានានូវសន្តិសុខសុវត្ថិភាពសម្រាប់ពលរដ្ឋអ្នកដំណើរ ក៏ដូចជាប្រជាពលរដ្ឋរស់នៅជុំវិញតំបន់នោះផងដែរ ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]