(ភ្នំពេញ)៖ កម្លាំងនៃអធិការដ្ឋាននគរបាលខណ្ឌឬស្សីកែវ ឃាត់ខ្លួនមុខសញ្ញាចោរលួចទ្រព្យសម្បត្តិម្នាក់ ខណៈម្នាក់ទៀតកំពុងរត់គេចខ្លួន ក្រោយពីពួកគេ បន្លំចូលទៅប្ដូរលុយ និងទិញស្រាបៀក្នុងទីតាំង «ទ្រូម៉ាន់នី» ហើយធ្វើសកម្មភាពលួចលុយបានជាង៣០ម៉ឺនរៀល ត្រូវម្ចាស់ឃើញទាន់ស្រែកឡើងផ្អើលអ្នកក្បែរខាង។
អធិការនគរបាលខណ្ឌឬស្សីកែវ លោកវរសេនីយ៍ទោ គល់ យី បានឲ្យដឹងថា ការឃាត់ខ្លួនជនសង្ស័យជាមុខសញ្ញាចោរលួចលុយម្នាក់ ក្នុងចំណោមបក្ខពួក២នាក់នេះ គឺនៅរសៀលថ្ងៃទី១៦ ខែកុម្ភៈ ឆ្នាំ២០១៩ ស្ថិតនៅក្នុងចំណុចផ្ទះលេខ២៤៦A ផ្លូវ៥៩៨ ក្រុមទី៤ ភូមិទួលថ្ងាន់ សង្កាត់ទួលសង្កែទី២ ខណ្ឌឫស្សីកែវ រាជធានីភ្នំពេញ។
លោកអធិការខណ្ឌឬស្សីកែវ បានបន្ថែមថា ជនសង្ស័យដែលឃាត់ខ្លួន បានក្រោយបន្លំចូលទៅប្ដូរលុយ និងទិញស្រាបៀ ដើម្បីលួចលុយក្នុងទីតាំង «ទ្រូម៉ាន់នី» ឈ្មោះ សុខ បុត្រ អាយុ២៥ឆ្នាំ មុខរបរមិនពិតប្រាកដ និងទីលំនៅមិនពិតប្រាកដ និងម្នាក់ទៀតឈ្មោះ រិទ្ធ អាយុប្រហែល៣៥ឆ្នាំ ជាម្ចាស់ម៉ូតូម៉ាកសេ១២៥ ពណ៌ខ្មៅ សេរីឆ្នាំ២០១៥ កំពុងរត់គេចខ្លួន។ ឯជនរងគ្រោះឈ្មោះ ប៉ាន់ ត្រៀក ភេទប្រុស អាយុ៥៦ឆ្នាំ មុខរបរលក់ដូរ ស្នាក់ផ្ទះកើតហេតុ។
លោកវរសេនីយ៍ទោ គល់ យី បានបញ្ជាក់ថា បន្ទាប់ពីឃាត់ខ្លួនជនសង្ស័យយកមកធ្វើការសាកសួរតាមជំនាញប៉ុន្មានម៉ោងក្រោយមក តាមបណ្ដឹងរបស់ម្ចាស់ទីតាំងប្ដូរលុយ គេបានឆ្លើយសារភាពថា ពីមុនមកធ្លាប់លួចទូរស័ព្ទ១គ្រឿង ម៉ាកសាំសុងបានសម្រេច តែលើកនេះមកបន្លំធ្វើជាប្ដូរលុយ៥០ដុល្លារ និងទិញស្រាបៀរចំនួនមួយកេស ពន្យាពេលធ្វើជាឲ្យប្រាក់មិនគ្រប់ចំនួន ដើម្បីបានឱកាសចូលទៅខាងក្នុងផ្ទះ លួចយកលុយបានជាង៣០ម៉ឺនរៀល ដាក់ក្នុងថង់រួច ក៏ត្រូវម្ចាស់ឃើញទាន់ និងស្រែកឡើងផ្អើលទាំងប្រជាពលរដ្ឋ និងសមត្ថកិច្ចមកជួយអន្តរាគមន៍ឃាត់ខ្លួនភ្លាមៗខណៈម្នាក់ទៀតរត់គេចខ្លួន បាត់ស្រមោលឈ្មោះ រិទ្ធ។
យ៉ាងណាក៏ដោយ ទឹកប្រាក់ចំនួនជាង៣០ម៉ឺនរៀល នោះត្រូវសមត្ថកិច្ចខណ្ឌឬស្សីកែវ ដកហូតមកប្រគល់ជូនជនរងគ្រោះវិញ។ ចំណែកជនសង្ស័យកំពុងឃុំខ្លួនបណ្ដោះអាសន្ន ដើម្បីកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ចាត់ការតាមនីតិវិធី៕
ប្រភព៖ freshnews
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
