រាជធានីភ្នំពេញ ៖ សុបិនក្លាយជាការពិត នាងកម្មការិនីម្នាក់បានយល់សុបិនឃើញ «ម្ដាយរបស់នាងទៅប្រាប់ថា មានចោរលួចម៉ូតូរបស់នាងតែលួចមិនបានទេព្រោះមានគេប្រាប់នាងទាន់»។ លុះដល់ថ្ងៃបន្ទាប់ក្រោយពីត្រឡប់មកពីធ្វើការរោងចក្រវិញនាងបានទុកម៉ូតូនៅជាន់ផ្ទាល់ដី រួចឡើងទៅហូបបាយនៅជាន់ទី១ ក៏ត្រូវបានចោរលួចយកម៉ូតូរបស់នាងមែន ប៉ុន្តែមិនបានសម្រចឡើយ។
ដោយសារតែសុបិនអាក្រក់នោះបានធ្វើឲ្យនាងប្រុងប្រយ័ត្នហើយបានដឹងចោរលួចម៉ូតូទាន់ពេលទើបស្រែកឆោឡោបង្កការភ្ញាក់ផ្អើល និងចាប់ខ្លួនចោរបានម្នាក់តែម្ដង។ ហេតុការណ៍នោះបានកើតឡើង កាលពីវេលាម៉ោង១១ និង៣០នាទីព្រឹក ថ្ងៃទី១៥ ខែកុម្ភៈ ឆ្នាំ២០១៩ នៅចំណុចផ្ទះជួលស្ថិតនៅក្នុងភូមិ ត្រពាំងល្វា សង្កាត់កាកាប១ ខណ្ឌពោធិសែនជ័យ រាជធានីភ្នំពេញ។ ជនសង្ស័យខាងលើឈ្មោះ យិន ដា អាយុ២២ឆ្នាំ មុខរបរមិនពិតប្រាកដស្នាក់នៅក្នុងផ្ទះសំណាក់៣ដុល្លារ ក្នុងភូមិត្រពាំងថ្លឹង សង្កាត់ចោមចៅ១ ខណ្ឌពោធិ៍សែនជ័យ និងមានស្រុកកំណើតនៅក្នុងភូមិចាម ឃុំអ្នកលឿង ស្រុកពាមរក៍ ខេត្តព្រៃវែង។
ជននេះបានធ្វើសកម្មភាពលួចម៉ូតូ១គ្រឿងម៉ាក ស៊ុយហ្ស៊ុយគីនិច ពណ៌ស ស៊េរីឆ្នាំ២០១៨ ពាក់ស្លាកលេខ តាកែវ 1Q-4368។ ដែលជាកម្មសិទ្ធិរបស់ស្ត្រីម្នាក់ឈ្មោះ បាន ធួន អាយុ២៨ឆ្នាំ មុខរបរកម្មការិនីរោងចក្រកាត់ដេរ ស្នាក់នៅបន្ទប់ជួលជាន់ទី១ ក្នុងភូមិកើតហេតុ និងមានស្រុកកំណើត នៅភូមិប្រាសាទ ឃុំកំពែង ស្រុកគីរីវង្ស ខេត្តតាកែវ។ នាងកម្មការិនីរូបនេះបានប្រាប់នគរបាលថា កាលពីវេលាយប់ថ្ងៃទី១៤ ខែកុម្ភៈ ឆ្នាំ២០១៩ ខណៈពេលគេងលក់នាងបានយល់សប្ដិឃើញ «ម្ដាយរបស់នាងទៅប្រាប់ថា មានចោរលួចម៉ូតូរបស់នាង តែលួចមិនបានសម្រេចនោះទេ ព្រោះមានគេប្រាប់នាងទាន់ »។
ពេលនោះនាងបានចាត់ទុកសុបិននេះថាជាសុបិនអាក្រក់មួយ សម្រាប់រូបនាង លុះក្រោយពេលភ្ញាក់ពីដំណេកនាងបានប្រុងប្រយ័ត្នគ្រប់ពេលមិនហ៊ានធ្វេសប្រហែស ឡើយ។ ព្រោះខ្លាចសុបិនក្លាយជាការពិត បន្ទាប់មកព្រឹកឡើងថ្ងៃទី១៥ ខែកុម្ភៈ ក្រោយភ្ញាក់ពីដំណេក នាងបានជិះម៉ូតូចេញពីផ្ទះជួលទៅធ្វើការរោងចក្រ។ រហូតដល់វេលាថ្ងៃត្រង់ថ្ងៃដដែល ទើបជិះម៉ូតូត្រឡប់មកហូបបាយថ្ងៃត្រង់ផ្ទះជួលវិញ ពេលនោះនាងបានទុកម៉ូតូនៅខាងក្រោម ដោយចាក់សោយ៉ាងត្រឹមត្រូវ រួចហើយបានឡើងទៅហូបបាយនៅក្នុងបន្ទប់លើជាន់ទី១។
ស្ត្រីរូបនេះបានបន្តទៀតថា បន្តិចក្រោយមកខណៈពេលកំពុងតែហូបបាយ ស្រាប់តែឮសូរសំឡេងឆ្កែព្រុស យ៉ាងរន្ថើន និងប្លែកខុសពីធម្មតា ដែលជាហេតុធ្វើឲ្យនាងចម្លែកក្នុងចិត្តយ៉ាងខ្លាំង និងបានគិតដល់សុបិន អាក្រក់កាលពីពេលយប់មិញ។ ទើបភ្លាមៗនោះនាងបានស្ទុះរត់ចេញពីក្នុងបន្ទប់ទៅអើតមើលមកក្រោមកន្លែងដែលនាងម៉ូតូ ស្រាប់តែឃើញជនសង្ស័យ កំពុងឡើងជិះម៉ូតូរបស់នាងបម្រុងគេចខ្លួន។ ទើបខណៈនោះ នាងស្រែកឆោឡោថា«ចោរៗ »បង្កការភ្ញាក់ផ្អើលដល់អ្នកជិតខាងជួយដេញព័ទ្ធចាប់ជនសង្ស័យ បានភ្លាមៗតែម្ដង ហើយនាងបានយល់ថាសុបិននោះគឺជាការពិត។
អ្នកភូមិបាននិយាយថា ក្រោយចាប់ខ្លួនជនសង្ស័យបានដោយសារតែកំហឹងពួកគាត់បានវាយម្នាក់មួយដៃមួយជើងរួចទើបប្រគល់ជូននគរបាលប៉ុស្តិ៍ចោមចៅ១ចាត់ការតាមច្បាប់។ ហើយនេះគឺជារឿងរ៉ាវដែលបានកើតឡើងដ៏កម្រមួយ ដែលការយល់សុបិនរបស់នាងកម្មការិនីរូបនោះក្លាយជាការពិតបែបនេះ។ ចំណែកជនសង្ស័យវិញក៏ មិនមែនសុទ្ធតែធ្វើសកម្មភាពបានសម្រេចនោះទេលោកចោររូបនេះក៏មានថ្ងៃអស់លក្ខណ៍ ព្រោះសត្វឆ្កែ និងសុបិនរបស់ម្ចាស់ម៉ូតូដូចជាពេលនេះដែរ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
