រាជធានីភ្នំពេញ ៖ បុរសម្នាក់ និងយុវជនម្នាក់ទៀតបានក្លែងខ្លួនជាសង្ឃរួចហើយបានចេញដើរបិណ្ឌបាត្រ គ្រប់ច្រកល្ហកតាមទីប្រជុំជន និងតាមខ្នងផ្ទះតាមភូមិនានា។ ហើយអ្នកប្រជាពលរដ្ឋជាច្រើន ដែលមានសទ្ធាជ្រះថ្លាចូលចិត្តខាងធ្វើបុណ្យដាក់ទាននោះបាននាំគ្នាដាក់បាត្រភាគច្រើនជាលុយកាក់ និងក្រាបសំពះថ្វាយបង្គំក្បាលដល់ដីគ្រប់ៗគ្នា។ ដោយមិនបានចាប់អារម្មណ៍ ឬដឹងថាជនដែលពួកគាត់ កំពុងគោរពប្រណិប័តន៍ចាត់ទុកជាស្រែបុណ្យដ៏ថ្លៃថ្លាទៅអនាគតជាតិនេះគឺជាសង្ឃក្លែងក្លាយឡើយ។
ចំណែកជនក្លែងជាសង្ឃទាំង២នាក់ក្រោយពេលបិណ្ឌបាត្របានលុយហើយបាននាំគ្នាទៅកន្លែងស្ងាត់រួចដោះស្បង់ចីវរចេញ និងស្លៀកពាក់ខោអាវជាគ្រហស្ថវិញ ហើយត្រូវអ្នកភូមិប្រទះឃើញក៏ចាប់ខ្លួន ប្រគល់ជូននគរបាលតែម្ដង។ អ្នកភូមិបាននាំគ្នាព័ទ្ធចាប់ខ្លួនជនក្លែងជាសង្ឃទាំង២នាក់នេះ កាលពីវេលាម៉ោង១១ និង៣០នាទី ថ្ងៃត្រង់ ថ្ងៃទី១៥ ខែកុម្ភៈ ឆ្នាំ២០១៩។ នៅតាមផ្លូវវេងស្រេង ត្រង់ចំណុចជិតរោងចក្រស្រាបៀរហ្ក្រោន ស្ថិតនៅក្នុងភូមិត្រពាំងថ្លឹង១ សង្កាត់ចោមចៅ១ ខណ្ឌពោធិ៍សែនជ័យ រាជធានីភ្នំពេញ។
ជនសង្ស័យដែលត្រូវចាប់ខ្លួនខាងលើនោះម្នាក់ឈ្មោះ សុខ សុធា អាយុ១៨ឆ្នាំ ស្នាក់នៅក្នុងភូមិសាស្ត្រសង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។ ជននេះមានស្រុកកំណើតនៅក្នុងភូមិសាម័រ ឃុំត្រពាំងស្រែ ស្រុកមេសាង ខេត្តព្រៃវែង ហើយបានក្លែងខ្លួន បានរយៈពេល៧ថ្ងៃមកហើយ។ ចំណែកម្នាក់ទៀតឈ្មោះ ប្រាង សំណាង អាយុ៣៥ឆ្នាំ ស្នាក់នៅមិនពិតប្រាកដ និងមានស្រុកកំណើត នៅក្នុងភូមិចារ ឃុំព្រៃរំដេង ស្រុកមេសាង ខេត្តព្រៃវែង ជននេះបានក្លែងខ្លួនជាសង្ឃក្លែងបានរយៈពេល៣ថ្ងៃប៉ុណ្ណោះ។
ក្រោយពេលចាប់ខ្លួននគរបាលដកហូត បានលុយជាង១០ម៉ឺនរៀលដែលពួកនេះបិណ្ឌបាត្របានពីទីកន្លែងនានា។ រួមជាមួយស្បង់ចីវរ បាត្រ និងឆាយគណៈមហានិកាយ ២ក្បាល ដែលជនសង្ស័យលួចរបស់ព្រះសង្ឃនៅឯស្រុកកំណើត រួចយកទៅស្គែន ដាក់តាមខ្លួនដើម្បីការពារក្រែងអាជ្ញាធរឃាត់ត្រួតពិនិត្យ។ អ្នកភូមិខាងលើបាននិយាយថា ពួកគាត់បានឃើញជនសង្ឃទាំង២នាក់នេះដើរបិណ្ឌបាត្រ ច្រើនថ្ងៃមកហើយ មិនតែប៉ុណ្ណោះពួកគាត់មិនបានដឹងថា ពួកនេះគឺជាសង្ឃក្លែងក្លាយនោះឡើយ ហើយដោយសារតែជាអ្នកកាន់ និងជឿជាក់ក្នុងវិស័យព្រះពុទ្ធសាសនាទើបនាំគ្នាដាក់បាត្រ និងថ្វាយបង្គំជនទាំងនេះគ្រប់ៗគ្នាតែម្ដង។
ដោយឡែកនៅមុនពេលកើតហេតុសង្ឃក្លែងក្លាយទាំង២នាក់នេះបានគ្រស្បង់ចីវរ និងប្រដាប់ដោយបាត្រផងបានចេញដើរបិណ្ឌបាត្រតាមទីផ្សារ និងតាមខ្នងផ្ទះក្នុងភូមិពួកគាត់ទៀត។ ខណៈនោះមានអ្នកដាក់បាត្រជាហូរហែ ដោយខ្លះដាក់ជាលុយ និងខ្លះទៀតដាក់ជាទេយ្យវត្ថុផ្សេងៗ លុះក្រោយបានលុយហើយបាននាំគ្នាទៅផ្លាស់ស្បង់ចីវរចេញ និងស្លៀកពាក់ខោអាវវិញនៅត្រង់ចំណុច កើតហេតុខាងលើ។ ខណៈនោះហើយត្រូវបានពួកគាត់ប្រទះឃើញដោយចៃដន្យក៏បានធ្វើការឃាត់ខ្លួន ប្រគល់ជូននគរបាលប៉ុស្តិ៍ចោមចៅ៣ដើម្បីចាត់ការតែម្ដង។
នគរបាលប៉ុស្តិ៍ចោមចៅ១បានប្រាប់ថា ក្រោយពេលឃាត់ខ្លួនកម្លាំងបានដកហូតស្បង់ចីវរ និងបាត្រព្រមទាំងលុយជាង១០ម៉ឺនរៀល ដែលពួកគេបិណ្ឌបាត្របាន និងឆាយាគណៈមហានិកាយក្លែងក្លាយ២ក្បាលដែលជនសង្ស័យលួច ពីព្រះសង្ឃ យកទៅស្គែនដាក់ជាប់ខ្លួន។ បន្ទាប់ពីធ្វើការសាកសួរអ្នកទាំង២បានសារភាពថា ពួកខ្លួនពិតជាបានក្លែងខ្លួនជាសង្ឃពិតមែនដើម្បីរកលុយ ហើយបានធ្វើច្រើនថ្ងៃកន្លងមកហើយ ទើបតែពេលនេះត្រូវអស់លក្ខណ៍។ ប៉ុន្តែទោះបីបែបនេះក្ដីតាមចំណាត់ការរបស់ថ្នាក់លើបានសម្រេច មិនកសាងសំណុំរឿងបញ្ជូនទៅតុលាការឡើយ គឺសម្រេចត្រឹមធ្វើការអប់រំ និងធ្វើកិច្ចសន្យាប៉ុណ្ណោះ រួចហើយដោះលែងឲ្យអ្នកទាំង២មានសេរីភាពវិញហើយ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
