ខេត្តត្បូងឃ្មុំ ៖ មានហេតុការណ៍ភ្ញាក់ផ្អើល ដោយបាត់ក្មេងស្រីជំទង់ម្នាក់ឈ្មោះ ទន់ មុន្នីរចនា អាយុ១៥ឆ្នាំ នៅភូមិធ្លក សង្កាត់សួង ក្រុងសួង នៅវេលាម៉ោង៦ និង៣០នាទីព្រឹក ថ្ងៃទី១៣ កុម្ភៈ ២០១៩ ដោយមិនដឹងទៅទីណាឡើយ។
ជាមួយគ្នានោះឪពុកម្តាយបានរត់មកប្តឹងសមត្ថកិច្ច ដើម្បីឲ្យជួយ អន្តរាគមន៍តាមរក ហើយរហូតមកដល់រសៀលថ្ងៃដដែល ក៏នៅមិនទាន់ត្រឡប់មកផ្ទះវិញដែរ។
តាមមន្ត្រីនគរបាលមួយរូបសូមមិនបញ្ចេញឈ្មោះ បានប្រាប់ថា នៅល្ងាចថ្ងៃទី១២ កុម្ភៈ ក្មេងស្រីខាងលើបានអង្គុយហូបបាយនៅក្នុងផ្ទះរបស់ខ្លួនជាមួយនឹងឪពុក។
បន្ទាប់មកស្រាប់តែម្តាយ បានសួរនាំកូនស្រីថា៖ ចុះកូនស្រី ទៅរៀនរាល់ថ្ងៃម្តេចក៏មិនឃើញគ្រូចែកសៀវភៅតាមដាន ហើយកូនស្រីឈ្មោះ រចនា បានឆ្លើយតបមកម្តាយវិញថា សៀវភៅនោះគ្រូបានធ្វើបាត់ រួចកូនស្រី បានដើរចូលទៅក្នុងបន្ទប់ដេក។ មន្ត្រីនគរបាលបានបន្តថា លុះនៅវេលាម៉ោង១១យប់ ស្រាប់តែឮសូរ សំឡេងអូសកៅអី តែមិនមានអ្នកណាចាប់អារម្មណ៍ ដោយម្នាក់ៗបាននាំគ្នាដេកបន្តដល់ភ្លឺ។
លុះនៅវេលាម៉ោង៦ និង៣០នាទីព្រឹក ឪពុកបានដើរទៅគោះទ្វារបន្ទប់ហៅកូនស្រី តែមិនបានឮសូរសំឡេងឆ្លើយតបសោះ ដល់ពេលបើកទ្វារបន្ទប់មិនឃើញកូនស្រី ហើយតាមមើលចុះឡើងដឹងថា កូនចេញទៅតាមទ្វារក្រោយផ្ទះ តែមុននឹងចាកចេញទៅបានបន្សល់ទុកនៅសំបុត្រមួយច្បាប់ដែលមានខ្លឹមសារថា «ប៉ាម៉ាក់កូនសុំទោសកំហុសគ្រប់យ៉ាង ដែលកូនធ្វើឲ្យប៉ា និងម៉ក់ពិបាកចិត្តដោយសារតែកូនរហូតមក….ហើយពេលដែលខ្ញុំសុំទៅទិញអីញ៉ាំក៏មិនឲ្យទៅដែរ ជេរមុខជេរក្រោយ ពេលខ្ញុំស្គមគ្មានសាច់គ្មានឈាមតាំងថាខ្ញុំជក់ថ្នាំញៀន រាល់ថ្ងៃនេះខ្មុំមិនយល់ទេ ចឹងខ្ញុំសម្រេចចិត្តចេញពីផ្ទះហើយ »។
ចំណែកសមត្ថកិច្ចមូលដ្ឋានវិញបានប្រាប់ថា ករណីបាត់ក្មេងស្រីខាងលើកំពុងតែតាមស្រាវជ្រាវហើយ ប្រសិនណាបើបងប្អូនឃើញនៅទីណានោះ សូមរាយការណ៍មកសមត្ថកិច្ចផង។ ចំណែកឪពុកម្តាយវិញ កំពុងតែរង់ចាំកូនស្រីវិលវិញ ដោយមិនប្រកាន់រឿងអ្វីកើតឡើងនោះទេ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]