រាជធានីភ្នំពេញ ៖ មន្ត្រីនគរបាលខណ្ឌទួលគោកចូលនិវត្តន៍ម្នាក់ ហើយក៏ជាជនពិការដោយ ជំងឺផងនោះ បានធ្វើដំណើរទៅកាន់សាលាសង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ កាលពីវេលាម៉ោង៨ព្រឹក ថ្ងៃទី១២ ខែកុម្ភៈ ឆ្នាំ២០១៩។ ដើម្បីដាក់ពាក្យប្តឹងសុំឲ្យអាជ្ញាធរសង្កាត់ខាងលើ ជួយរកយុត្តិធម៌ជូនគាត់ផង។ បុរសនេះបានប្ដឹងកូនស្រីទី៣របស់គាត់ម្នាក់ និងប្ដីរបស់នាង ដោយគាត់បានចោទប្រកាន់ថា កូនស្រីរូបនេះរួមជាមួយប្ដីនាងបានជំពាក់លុយគាត់ជាង៥ម៉ឺនដុល្លារ ហើយគាត់បានទារជាច្រើនដងមកហើយ។
ប៉ុន្តែពួកគេមិនត្រឹមតែមិនព្រមសងប៉ុណ្ណោះទេ ថែមទាំងជេរប្រមាថ និងគម្រាមហៅនគរបាលវាយខ្នោះគាត់ថែមទៀតផង។ បុរសខាងលើនោះ បាននិយាយប្រាប់មន្ត្រីសាលាសង្កាត់ចោមចៅ៣ថា គាត់មានឈ្មោះ ហ៊ុយ ប៉ាង អាយុ៧៥ឆ្នាំ អតីតជាមន្ត្រីនគរបាលខណ្ឌទួលគោក តែចូលនិវត្តន៍ មានទីលំនៅបច្ចុប្បន្នក្នុងភូមិទួលថ្ងាន់ សង្កាត់ទួលសង្កែ១ ខណ្ឌឫស្សីកែវ រាជធានីភ្នំពេញ។ គាត់មានប្រពន្ធ ឈ្មោះ ស៊ិន សផល អាយុ៦៣ឆ្នាំ កំពុងរស់នៅឯសហរដ្ឋអាមេរិក ហើយគាត់មានកូនស្រីចំនួន៥នាក់ សព្វថ្ងៃគាត់រស់នៅក្រោមដំបូលផ្ទះ តែមួយជាមួយកូនស្រីទី៤។ ពេលនេះគាត់ធ្វើដំណើរទៅកាន់សាលាសង្កាត់ចោមចៅ៣ ដើម្បីដាក់ពាក្យប្ដឹងកូនស្រី៣ និងប្ដីរបស់នាងសុំឲ្យអាជ្ញាធរសង្កាត់ជួយរកយុត្តិធម៌ជូនរូបគាត់ផង។
បុរសនេះបាននិយាយថា កូនស្រីដែលគាត់ត្រូវប្ដឹងនាពេលនេះ ឈ្មោះ ហ៊ុយ ខេមរា អាយុ៣០ឆ្នាំ មានប្តីឈ្មោះ ឃុន ចំរើន អាយុ៣៥ឆ្នាំ អ្នកទាំង២មានទីលំនៅក្នុងភូមិជម្ពូវ័ន សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ។ កាលពីឆ្នាំ២០១៣កន្លងទៅ កូនស្រីម្នាក់នេះបានខ្ចីផ្ទះគាត់ មួយល្វែងស្នាក់នៅ លុះក្រោយមកបានយកទៅលក់ក្នុងតម្លៃ៥៥,០០០ដុល្លារ យកលុយនេះប្រើការរកស៊ី ហើយបានប្រាប់គាត់ថាពួកគេនឹងសងគាត់វិញ។ លុះក្រោយៗមកទៀតពួកគេបានសងគាត់មែន ប៉ុន្តមិនបានសងទាំងអស់ឡើយ គឺសងម្ដងបន្តិចៗជាបន្តបន្ទាប់ ប៉ុណ្ណោះ ប៉ុន្តែទើបតែសងបាន ចំនួន៣ពាន់ដុល្លារប៉ុណ្ណោះ នៅសល់ចំនួន៥២,០០០ដុល្លារទៀតដែលត្រូវសងបន្ត។
បុរសជាឪពុករូបនេះបាននិយាយទៀតថា ប៉ុន្តែកូនស្រីរូបនេះមិនព្រមសងឡើយ ចំណែករូបគាត់បានធ្លាក់ខ្លួនមានជំងឺរហូតដល់ពិការ និង ត្រូវការលុយសម្រាប់ចាយវាយក្នុងការហូបចុក ប្រចាំថ្ងៃ ជាពិសេសព្យាបាលជំងឺ ពេលទៅទារលុយស្រាប់តែជាកូនស្រីមិនត្រឹមតែមិនឲ្យប៉ុណ្ណោះទេ ថែមទាំងជេរប្រមាថរូបគាត់ជាបន្តបន្ទាប់ហាក់ដូចជាមិនមែនឪពុក និងកូនអ៊ីចឹង។ ដោយសារតែបែបនេះទើបគាត់មិនហ៊ានទៅទារទៀតទេហើយស៊ូទ្រាំលំបាកមួយរយៈពេល ប៉ុន្តែរហូតមកដល់ថ្ងៃទី០៩ ខែកុម្ភៈ ៣ថ្ងៃមុននេះ ដោយអត់លុយសម្រាប់ព្យាបាលជំងឺមិនដឹងថា ត្រូវទៅរកនៅទីណាបាន ទើបគាត់សម្រេចចិត្តទៅរកទារលុយពីកូនស្រីម្នាក់នេះម្តងទៀត។
ខណៈនោះពួកគេនៅតែមិនព្រមសងដដែល មិនតែប៉ុណ្ណោះ កូនស្រី និងប្ដីបានជេរប្រមាថ និងបម្រុងវាយមកលើគាត់ ព្រមទាំងគំរាមគាត់ថា បើនៅតៅមកទារលុយទៀតពួកគេនឹងប្តឹងឲ្យ នគរបាលចាប់ខ្លួនគាត់ហើយ។ ប្រភពដដែលបានបន្តថា បន្ទាប់ពីទទួលរងនូវការជេរប្រមាថ គំរាមអាយុជីវិតពីសំណាក់កូនស្រី និងកូនប្រសារជាបន្តបន្ទាប់បែបនេះគាត់ពិតជាពិបាកចិត្តខ្លាំងណាស់ ហើយមិនអាចទ្រាំនូវទង្វើនេះបានឡើយ។ ទើបធ្វើដំណើរទៅកាន់សាលាសង្កាត់ចោមចៅ៣ ដើម្បីដាក់ពាក្យប្ដឹងសុំឲ្យអាជ្ញាធរជួយអន្តរាគមន៍រកយុត្តធម៌ជូនរូបគាត់ផង។
ទាក់ទិនទៅនឹងរឿងរ៉ាវ ខាងលើអាជ្ញាធរសង្កាត់ចោមចៅ៣បានទទួលពាក្យបណ្ដឹងបុរសនោះហើយ ដើម្បីកោះហៅកូនស្រី និងកូនប្រសារគាត់ទៅធ្វើការដោះស្រាយគ្នា ប៉ុន្តែពុំទាន់ដឹងថា ពួកគេព្រមទៅកាន់សាលាសង្កាត់ តាមការកោះហៅឬអត់នោះទេ។ ម្យ៉ាងទៀតកោះសន្តិភាពមិនអាចសុំការបំភ្លឺណាមួយពីកូនស្រី និងកូនប្រសារគាត់បានឡើយ រឿងរ៉ាវខាងលើគឺជាការរៀបរាប់របស់មន្ត្រីនគរបាលចូលនិវត្តន៍រូបនោះ តែម្ខាងប៉ុណ្ណោះ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
