អេស្ប៉ាញ៖ ទោះបីកីឡាករ Cristiano Ronaldo បានសម្រេចចិត្តធ្វើការចាកចេញពីក្លិប Real Madrid មកកាន់ក្លិប Juventus ជាច្រើនខែកន្លងមកពិតមែន ក៏មូលហេតុនៃការចាកចេញរបស់គេតែងត្រូវបានលើកមកវែកញែក។ រឿងរ៉ាវរវាងកីឡាករ Ronaldo និង Real Madird អាចនឹងងាយមើលរំលង តែអនុស្សាវរីយ៍ និងមិត្តភាពរវាងគេជាមួយមិត្តរួមក្រុមមិនងាយស្រួលបំភ្លេចបានឡើយ។
ជាក់ស្តែងកាលពីពេលថ្មីៗនេះកីឡាករ Marcelo អតីតមិត្តរួមក្លិប និងជាមិត្តជិតស្និទ្ធបំផុតម្នាក់របស់ Ronaldo បានបង្ហើបឱ្យដឹងថា Ronaldo បាននិយាយទៅកាន់លោក (Marcelo) មុនប្រកួតវគ្គផ្តាច់ព្រ័ត្រ Champions League រដូវកាលមុនថា «គាត់នឹងចាកចេញពីក្លិប Real Madrid»។
នៅក្នុងបទសម្ភាសន៍ជាមួយ Esporte Interactivo ខ្សែការពារដដែលរូបនេះបាននិយាយថា៖ "ពួកយើងកំពុងស្ថិតក្នុងទីលានហ្វឹកហាត់សម្រាប់វគ្គផ្តាច់ព្រ័ត្រ UCL ហើយគាត់ (Ronaldo) បានប្រាប់ខ្ញុំថា គាត់នឹងចាកចេញ (ពី Real Madrid)។ គាត់ (Ronaldo) និយាយថា គាត់ដឹងថាគាត់បានកុហកខ្ញុំចំពោះរឿងនេះពីមុនមក ប៉ុន្តែគាត់ពិតជាត្រូវចាកចេញពិតមែន" ។
ដោយឡែក បើតាមសារព័ត៌មានផ្សេងៗក៏បានឱ្យដឹងថា កីឡាករ Marcelo ត្រូវបានក្លិប Juventus ទាក់ទងចង់បានរូបគេទៅចូលរួមជាមួយ Ronaldo ផងដែរ។ ជុំវិញបញ្ហានេះ Marcelo បាននិយាយថា៖ “Juventus ជាក្លិបដ៏អស្ចារ្យមួយ ក៏ប៉ុន្តែខ្ញុំនៅជាប់កុងត្រាជាមួយ Real Madrid នៅឡើយ ខ្ញុំពិតជារីករាយ បើសិនជាអាចរួមក្រុមជាមួយ Ronaldo សាជាថ្មីម្តងទៀត” ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]