ក្រោយចាញ់ Man City ធ្ងន់-កយប់មិញ លោក Sarri ថាតួនាទីរបស់លោក ប្រឈមនឹងការប្រថុយប្រថាន

អង់គ្លេស៖ លោក Maurizio Sarri បញ្ជាក់ថាតួនាទីរបស់លោក ប្រឈមនឹង “ការប្រថុយប្រថាន” យ៉ាងខ្លាំង បន្ទាប់ពីលោកបានដឹកនាំ Chelsea ចាញ់ធ្ងន់-កក្នុងជំនួបជាមួយ Man City កាលពីយប់មិញនេះ។ 

តោខៀវ Chelsea ហាក់ធ្លាក់ដុនដាបជាខ្លាំងសម្រាប់ការប្រកួតកន្លងមក ដោយទទួលរងបរាជ័យរហូតដល់ ៣ដង ក្នុងចំណោមការប្រកួតក្នុងលីគ ៤ប្រកួតចុងក្រោយ។ បរាជ័យផ្ទួនៗ និងធ្ងន់ធ្ងរបែបនេះ ហាក់ផ្តល់សម្ពាធយ៉ាងខ្លាំងសម្រាប់លោក Maurizio Sarri ក្នុងការដឹកនាំក្រុមតោខៀវ Chelsea។

Chelsea បានធ្លាក់មកដល់ចំណាត់ថ្នាក់លេខ ៦ ក្នុងតារាង Premier League ខណៈដែលក្រុមឡើងជើង Man UTD ខិតទៅគ្រងតំណែងលេខ ៤របស់ Chelsea វិញជាបណ្តោះអាសន្ន។ ពាក់ព័ន្ធនឹងការដឹកនាំមិនបានល្អ និងក្រុមទាំងមូលកំពុងធ្លាក់ទម្រង់លេង លោក Sarri បានពោលថា៖ “នេះជារឿងធម្មតាទៅហើយ ដែលការងារនេះតែងតែប្រឈមនឹងសម្ពាធ ក៏ដូចជាហានិភ័យច្រើននៃការបណ្តេញចេញ ពេលដែលយើងបំពេញតួនាទីមិនបានល្អ”។

គួរជម្រាបថា ការប្រកួតបន្ទាប់ Chelsea នឹងត្រូវធ្វើដំណើរទៅជួបក្រុម Malmo ក្នុងវគ្គ ៣២ក្រុមចុងក្រោយនៃពាន Europa League មុននឹងបន្តជួបក្រុម Manchester United ក្នុងពានរង្វាន់ FA Cup៕