អ្នកជិតខាងល្អ! Manchester City លត់ Chelsea ៦-០ បន្តសង្ឃឹមប្រជែងពាន និងជួយ Man UTD ឡើងមក Top 4

អង់គ្លេស៖ ការប្រកួតដ៏ជក់ចិត្ត Big Match ប្រចាំសប្តាហ៍រវាងមេឃខៀវ Manchester City ជាមួយតោខៀវ Chelsea បានបញ្ចប់ទៅកាលពីយប់មិញនេះ។ 

ក្រុមរបស់លោក Pep បានបង្ហាញទម្រង់លេងដ៏អស្ចារ្យ ដោយលត់ក្រុមរបស់លោក Sarri ដោយលទ្ធផល ៦-០។ យើងអាចនិយាយបានថា ការប្រកួតយប់មិញជាប្រកួតសំខាន់សម្រាប់ក្រុមទាំង២ ដោយ Man City ត្រូវការឈ្នះដាច់ខាតដើម្បីបន្តក្តីសង្ឃឹមប្រជែងពាន PL ខណៈដែល Chelsea ទាមទារជ័យជម្នះ ដើម្បីត្រឡប់មកតំបន់ Top 4 សាជាថ្មី។ 

គួរឱ្យដឹងថា ៦គ្រាប់របស់ Man City  រកបានដោយខ្សែប្រយុទ្ធ Aguero ៣គ្រាប់ម្នាក់ឯង ខណៈដែល Raheem Sterling រកបាន ២គ្រាប់ និងកីឡាករ Gundogan រកបានមួយគ្រាប់ផងដែរ។

ក្រោយបញ្ចប់ការប្រកួត ចំណាត់ថ្នាក់ក្រុមកំពូលទាំង ៦ នៅអង់គ្លេសមានការផ្លាស់ប្តូរច្រើនគួរឱ្យកត់សម្គាល់។ ក្រុម Man City ឡើងមកឈរកំពូលតារាងបណ្តោះអាសន្ន  មាន ៦៥ពិន្ទុស្មើគ្នាជាមួយ Liverpool ដែលនៅសល់ ១ប្រកួតក្នុងដៃ។ HotSpur ស្ថិតនៅចំណាត់ថ្នាក់លេខ ៣ ក្លិប Man UTD ឡើងមកកាន់លេខ៤ ខណៈ Arsenal នៅលេខ ៥ និង Chelsea នៅលេខ ៦  មាន ៥០ពិន្ទុស្មើគ្នា៕