រាជធានីភ្នំពេញ ៖ រថយន្តហ៊ីយ៉ាន់ដាយមួយគ្រឿង ដែលកម្មករបើកចេញពីកន្លែងលាងរថយន្តក៏បានជ្រុលទៅបុក គូទរថយន្ត TUNTRA រុញទៅបុកចូលផ្ទះវេរលុយវីង ហើយរថយន្តនោះបោលបុកឡើងខឿនសួនច្បារ និងបង្គោលភ្លើងជាប់។
គ្រោះថ្នាក់នេះបានកើតឡើងកាលពីវេលាម៉ោង៩ និង៥០នាទីព្រឹក ថ្ងៃទី១០ ខែកុម្ភៈ ឆ្នាំ២០១៩ ស្ថិតនៅតាមផ្លូវហាណូយ កែងវិថីឈ្នះឈ្នះ ក្នុងភូមិអន្លង់ក្ងាន សង្កាត់ឃ្មួញ ខណ្ឌសែនសុខ បណ្តាលឲ្យរថយន្តទាំង២គ្រឿងរងការខូចខាត។ តាមសាក្សីនៅកន្លែងកើតហេតុបានឲ្យដឹងថា មុនពេលកើតហេតុរថយន្តបង្កម៉ាកហ៊ីយ៉ាន់ដាយ 2SON ពណ៌ខ្មៅ ពាក់ស្លាកលេខ ភ្នំពេញ 2AA-6327 ត្រូវបានភ្ញៀវយកទៅលាងនៅកន្លែងកើតហេតុ។
លុះកម្មករលាងរួចក៏បានបើកចេញក្រៅ ដើម្បីជូតសម្អាត ក៏បានជាន់ហ្វ្រាំងច្រឡំហ្គាជាហេតុបណ្តាលឲ្យរថយន្តនោះស្ទុះបោលពីត្បូងទៅជើងជ្រុលទៅបុកគូទរថយន្ត TUNTRA ពណ៌ស ពាក់ស្លាកលេខ ភ្នំពេញ 2AE-7578 កំពុងបើកតាមផ្លូវហើយរុញទៅបុកចូលផ្ទះវីងដូរលុយ កល់ជាប់កង់មុខ។ ចំណែករថយន្តបង្កក៏ជ្រុលឡើងខឿនសួនច្បារបុកបង្គោលភ្លើងកល់ជាប់។
ទោះបីជាយ៉ាងណាពុំបណ្តាលឲ្យមនុស្សរងរបួសឡើយ។ ក្រោយកើតហេតុ រថយន្តទាំង២គ្រឿង ត្រូវបានសមត្ថកិច្ចចុះទៅស្ទូចយកទៅរក្សាទុកនៅការិយាល័យចរាចរជើងគោកនៃស្នងការនគរបាលរាជធានីភ្នំពេញដើម្បីដោះស្រាយ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
