ខេត្តកណ្ដាល ៖ តាមសេចក្តីរាយការណ៍បឋមបានឲ្យដឹងថា មានករណីបុរសម្នាក់បានស្លាប់ដោយសាររាយខ្សែភ្លើងឆក់ត្រី ដែលគេប្រទះឃើញវេលាម៉ោង៧និង៣០នាទីព្រឹកថ្ងៃទី១០ ខែកុម្ភៈ ឆ្នាំ២០១៩ ក្នុងភូមិត្រាចទោល ឃុំបែកចាន ស្រុកអង្គស្នួល ខេត្តកណ្ដាល ។
សេចក្តីរាយការណ៍បានបន្តថា អ្នកស្លាប់ឈ្មោះ សាន ធារ៉ា អាយុ២០ឆ្នាំ មុខរបរកម្មករ មានទីលំនៅក្នុងភូមិកើតហេតុខាងលើ មានគូដណ្ដឹងឈ្មោះ ធល់ ស្រីលីន អាយុ២០ឆ្នាំ ស្នាក់នៅជាមួយគ្នា ។
ចំណែកអ្នកឆក់ត្រីជាមួយគ្នាម្នាក់ទៀតឈ្មោះ បូ ស្នាក់នៅផ្ទះជួល ក្នុងភូមិព្រៃទន្លាប់ ឃុំបែកចាន ស្រុកអង្គស្នួល ខេត្តកណ្ដាល តែបានគេចខ្លួនបាត់ស្រមោល ផងដែរ ។
មុនពេលកើតហេតុជនរងគ្រោះមានគ្នា ២នាក់ដោយបានរាយខ្សែភ្លើងចម្ងាយ៣០០ម៉ែត្រ ដែលឆក់ត្រីតាមប្រឡាយ ដើម្បីយកទៅធ្វើម្ហូបក្លែមស្រា ហើយខណៈពេលដែលកំពុងឆក់នោះក៏ស្រាប់តែស្លាប់ម្នាក់ ហើយម្នាក់ទៀតក៏បានរត់គេចខ្លួនបាត់តាំងពីយប់ ។
តាមគូដណ្តឹងរបស់គាត់បានឲ្យដឹងថា នៅវេលាយប់ថ្ងៃទី០៩ ខែនេះមានមិត្តភក្តិម្នាក់ដែលគេចខ្លួនបានទូរស័ព្ទហៅ បបួលឆក់ត្រីហើយក៏បាននាំគ្នាទៅតខ្សែភ្លើងចេញពីចំណុចផ្ទះជួលមិត្តភក្តិ ស្ថិតនៅភូមិព្រៃទម្លាប់ ឃុំបែកចាន ខេត្តកណ្តាល ។ ហើយក៏បាននាំគ្នារាយខ្សែភ្លើងហើយក៏ឆក់ត្រីរហូតលុះមកដល់ចម្ងាយប្រហែលជា៣៥០ម៉ែត្រស្ថិតនៅភូមិត្រាចទូល ឃុំបែកចាន ស្រុកអង្គស្នួល ហើយក៏បានឆក់ស្លាប់នៅកន្លែងនោះតែម្តង ។
នៅពេលនោះអត់មានអ្នកដឹងឡើយ ចំណែកមិត្តភក្តិដែលឆក់ជាមួយនោះក្រោយពេលឆក់ ហើយក៏បានអូសជនរងគ្រោះដាក់នៅមាត់ប្រឡាយ ហើយក៏បានស្រាវខ្សែរភ្លើងយកទៅដាក់លើម៉ូតូជនរងគ្រោះ មុខបន្ទប់ជួលរបស់ខ្លួន ហើយក៏បាននាំប្រពន្ធរត់គេចខ្លួនបាត់តាំងពីយប់ ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
