ខេត្តកំពង់ស្ពឺ ៖ បុរសម្នាក់ដែលមនុស្សជាច្រើនក្នុងតំបន់ និងអាជ្ញាធរគ្រប់លំដាប់ថ្នាក់ស្គាល់ថា ជាឈ្មួញកណ្ដាល រកស៊ីដីធ្លីដ៏ល្បីឈ្មោះក្នុងស្រុកឧដុង្គ ខេត្តកំពង់ស្ពឺ តែពេលនេះ ត្រូវបានសមត្ថកិច្ចឃាត់ខ្លួនតាមអំណាចដីកា បញ្ជាឲ្យចូលខ្លួនរបស់តំណាងអយ្យាការ ពីបទរំលោភលើទំនុកចិត្ត។ ការឃាត់ខ្លួននេះធ្វើឡើងដោយកម្លាំង នគរបាលព្រហ្មទណ្ឌកម្រិតធ្ងន់នៃស្នងការនគរបាលខេត្តកំពង់ស្ពឺ។ ជនសង្ស័យដែលតាំងខ្លួនជាឧកញ៉ា ត្រូវបានស្គាល់មានឈ្មោះ សូ សារឹម ភេទប្រុស អាយុ៤១ឆ្នាំ រស់នៅភូមិអង្គ្រង ឃុំព្រះស្រែ ស្រុកឧដុង្គ ខេត្តកំពង់ស្ពឺ។
លោកវរសេនីយ៍ឯក សម សាក់ នាយការិយាល័យព្រហ្មទណ្ឌកម្រិតធ្ងន់ខេត្តបានឲ្យដឹងថា ការឃាត់ខ្លួនជនសង្ស័យខាងលើនេះបានធ្វើឡើងកាលពីថ្ងៃទី០៧ ខែកុម្ភៈ ឆ្នាំ២០១៩ នៅចំណុចហាងកាហ្វេមួយកន្លែង ស្ថិតនៅតាមបណ្តោយផ្លូវលេខ៥១ ភូមិបែកថ្លាង ឃុំទំនប់ធំ ស្រុកពញាឮ ខេត្តកណ្តាល។ លោកនាយការិយាល័យបន្តថា ការឃាត់ខ្លួននេះ ធ្វើឡើងតាមដីកាបង្គាប់ឲ្យចូលខ្លួនរបស់លោក ខៃ សម្ផស្ស ព្រះរាជអាជ្ញារង អមសាលាដំបូងខេត្តកំពង់ស្ពឺ ពាក់ព័ន្ធសំណុំរឿងរំលោភលើទំនុកចិត្ត ចុះថ្ងៃទី២២ ខែមករា ឆ្នាំ២០១៩ ដែលជនសង្ស័យបានប្រព្រឹត្ត កាលពីថ្ងៃទី០៨ ខែមិថុនា ឆ្នាំ២០១៨ នៅភូមិរំលេច និងនៅភូមិតារា ឃុំព្រះស្រែ ស្រុកឧដុង្គ ខេត្តកំពង់ស្ពឺ។
ជនសង្ស័យឈ្មោះ សូ សារឹម ជាឈ្មួញកណ្ដាលរកស៊ីដីរូបនេះ ត្រូវប្រជាពលរដ្ឋក្នុងមូលដ្ឋានក៏ដូចជាអាជ្ញាធរមួយចំនួនគោរពកោតក្រែងឥតឧបមា ដោយសារតែជននេះ បានអួត និងអះអាងថាខ្លួនមានងារជា ឧកញ៉ា តែការអួតរបស់បុគ្គលម្នាក់នេះគេមិនដែលបានបង្ហាញឲ្យពលរដ្ឋឃើញ ព្រះរាជក្រឹត្យតែងតាំងងារជាឧកញ៉ាម្តងណាឡើយ។ បើតាមប្រភពពីពលរដ្ឋរស់នៅស្រុកឧដុង្គ បានបង្ហើបថា ឧកញ៉ាក្លែងក្លាយម្នាក់នេះ ក្រៅពីសំណុំរឿង ដែលសមត្ថកិច្ចកំពុងចាប់ខ្លួន ជនសង្ស័យរូបនេះក៏នៅមាន រឿងទិញដីប្រជាពលរដ្ឋក្នុងមូលដ្ឋាន ឃុំព្រះស្រែ ដោយគេចវេសមិនព្រមប្រគល់លុយឲ្យម្ចាស់ដី ហើយយកដីពលរដ្ឋទៅលក់បន្ត ជាច្រើនលើកច្រើនសារដោយឃុបឃិតគ្នាជាប្រព័ន្ធលក់ដីរបស់អ្នកដទៃ និងមានអាជ្ញាធរមូលដ្ឋាន និងក្រុមប្រឹក្សាស្រុកមួយចំនួនក៏មានការជាប់ពាក់ព័ន្ធក្នុងករណីនេះដែរ។
លោក សម សាក់ បានបញ្ជាក់នៅល្ងាចថ្ងៃទី៨ កុម្ភៈ ២០១៩ថា ក្រោយឃាត់ខ្លួនឧកញ៉ាក្លែងក្លាយរូបនេះ សមត្ថកិច្ចបានធ្វើការ សាកសួរ និងកសាងសំណុំរឿងបញ្ជូនទៅតំណាងអយ្យការហើយនាំយកទៅឃុំខ្លួននៅពន្ធនាគារដើម្បីរង់ចាំចាត់ការតាមច្បាប់់នៅពេលក្រោយ។ អាជ្ញាធរស្រុកឧដុង្គក៏បានអំពាវនាវផងដែរដល់បងប្អូនប្រជាពលរដ្ឋណា ដែលរងគ្រោះ រឿងដីធ្លីដោយសារឧកញ៉ាក្លែងក្លាយខាងលើនៅស្រុកឧដុង្គសូមទៅដាក់ពាក្យបណ្តឹងបន្ថែម ដើម្បីអោយបុគ្គលរូបនេះ សងសំណងត្រឡប់ទៅវិញ។
បើតាមការបង្ហើបប្រាប់ពីសំណាក់អភិបាលរងស្រុកមួយរូប គឺជននេះបានទាក់ទងទិញដីឲ្យក្រុមហ៊ុនមួយ ហើយបានយកលុយពីគេ(ថៅកែ)ថា យកមកទិញដីតែដល់ថ្ងៃកំណត់ អត់មានដីឲ្យគេម្ចាស់លុយក៏ប្តឹងតែម្តង ចំពោះការហៅថាឧកញ៉ានោះ គឺជាការហៅបែបបញ្ជោរតៗគ្នាតែប៉ុណ្ណោះ ដោយសារតែជននេះចាយលុយរបៀបជាអ្នកមានប្រាក់ទើបគេចេះតែហៅឧកញ៉ាៗទៅ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]