រាជធានីភ្នំពេញ៖ បុរសអណិកជនខ្មែរនៅសហរដ្ឋអាមេរិកម្នាក់ត្រូវរថយន្តដឹកជើងសរសរ ស្ពានបើកកៀរហើយកិនជាប់ក្រោមរថយន្តអូសប្រមាណ៥០ម៉ែត្រស្លាប់យ៉ាងអាណោចអាធម៌ ។ គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង១រសៀល ថ្ងៃទី០៨ ខែកុម្ភៈ ឆ្នាំ ២០១៩ នៅតាមបណ្តោយផ្លូវណតប្រីដ ក្នុងភូមិទ្រង់មាន់ សង្កាត់អូរបែកក្អម ខណ្ឌសែនសុខ ។
ជនរងគ្រោះដែលរថយន្តកិនស្លាប់នោះត្រូវបាននគរបាលអោយដឹងថាឈ្មោះ សាន សុភ័ណ្ឌ ភេទប្រុស អាយុ២៨ឆ្នាំ ជាអណិកជនខ្មែរ នៅសហរដ្ឋអាមេរិក មានលំនៅផ្ទះលេខ១៣៣ ភូមិ ទឹកថ្លា សង្កាត់ទឹកថ្លា ខណ្ឌសែនសុខ ហើយទើបតែមកលេងស្រុកខ្មែរ បានប្រមាណជាង២ខែ ។ ចំណែករថយន្តដែលកិនមនុស្សស្លាប់ម៉ាក FU SO ពណ៌ស ពាក់ស្លាកលេខបាត់ដំបង៣អា ០១៧៩ បើកបរដោយ ឈ្មោះ មិញ រស្មី ភេទប្រុស អាយុ២០ឆ្នាំ មានលំនៅភូមិចេកស្រទន់ ឃុំព្រៃវិហារ ស្រុកគងពិសី ខេត្តកំពង់ស្ពឺ ត្រូវសមត្ថកិច្ចឃាត់ខ្លួន ។
តាមសាក្សីបានអោយដឹងថា នៅមុនពេលកើតហេតុ គេឃើញជនរងគ្រោះជិះម៉ូតូម៉ាកឃ្លិក ពណ៌ខ្មៅ លាយស្លាទុំ ពាក់ស្លាកលេខ ភ្នំពេញ ១AJ៤៣២០មួយគ្រឿងតែម្នាក់ឯង ធ្វើដំណើរ តាមផ្លូវណតប្រីដ ក្នុងទិសដៅពីជើងទៅត្បូង ដោយមានមិត្តភក្តិជិះម៉ូតូមួយគ្រឿង តាមក្រោយ ។ នៅពេលធ្វើដំណើរមកដល់កន្លែងកើតហេតុគេឃើញជនរងគ្រោះជិះម៉ូតូផ្នែកខាងឆ្វេងដៃ(ក្បែរសួន ) ហើយក៏ត្រូវបានរថយន្តធំដឹកជើងសសរស្ពានធ្វើដំណើរស្របគ្នាកៀរបោកផ្ទប់ បង្គោលភ្លើងខ្សែកាប ដែលនៅកណ្តាលផ្លូវ បណ្តាលអោយអ្នកបើកបរខ្ទាតទៅចូលក្រោមកង់រថយន្តខាងក្រោយផ្នែកខាងឆ្វេង ។
ទោះបីជាយ៉ាងណាមានព័ត៌មានខ្លះអះអាងថា ជនរងគ្រោះបានជិះម៉ូតូបុកបង្គោលភ្លើង ហើយ ខ្ទាតចូលរថយន្ត ។ តាមសាក្សីបានបន្តទៀតនៅពេលមានគ្រោះថ្នាក់គេឃើញរថយន្តបានកិនជាប់ជនរងគ្រោះក្រោមកង់អូសប្រមាណ៥០ម៉ែត្រ រួចឈប់អ្នកបើកបរបានចុះរត់គេចខ្លួនបានប្រមាណជាង១គីឡូមែត្រត្រូវបានប្រជាពលរដ្ឋ និងសមត្ថកិច្ចនាំគ្នាឃាត់ខ្លួន ។
បន្ទាប់ពីកើតហេតុគេឃើញមិត្តភក្តិជនរងគ្រោះក៏បានមកដល់ភ្លាមៗហើយបានអោយដឹងថា ជនរងគ្រោះជាអណិកជនខ្មែរនៅសហរដ្ឋអាមេរិក ហើយទើបតែមកលេងស្រុកខ្មែរបានប្រមាណជាង២ខែ ។ សពត្រូវរថយន្តកិនជាប់ចន្លោះកង់ក្រោយភ្លាមៗសមត្ថកិច្ចមិនអាចយកសពចេញបាន បើកបរទៅមុខ ឬរ៉ឺយ៉ែលកិនសពបែកខ្ទេចរហូតដល់ម៉ោងប្រមាណ២រសៀល សមត្ថកិច្ចមិនទាន់យកសពចេញបាននៅឡើយ ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
