ចូលរួមរំលែកទុក្ខ! សមត្ថកិច្ចបញ្ជាក់ថា សាកសពដែលរកឃើញគឺជាសាកសពរបស់កីឡាករ Emiliano Sala

អង់គ្លេស៖ នាយកដ្ឋានប៉ូលិស Dorset បានបញ្ចេញរបាយការណ៍ផ្លូវការមួយ ដែលបានឱ្យដឹងថាសាកសពដែលបានរុករកឃើញនៅក្នុងយន្តហោះនោះ គឺពិតជាសាកសពរបស់កីឡាករ Emiliano Sala ពិតប្រាកដមែន តាមរយៈការធ្វើកោសល្យវិច្ច័យយ៉ាងម៉ត់ចត់ពីក្រុមមន្ត្រីមានសមត្ថកិច្ច។

ក្រោយពីមានរបាយការណ៍ផ្លូវការរបស់សមត្ថកិច្ចដែលបានបញ្ជាក់ថា កីឡាករ Emiliano Sala ពិតជាបានបាត់បង់ជីវិតពិតប្រាកដមែន ក្លិបបាល់ទាត់ Cardiff City បានបញ្ចេញសេចក្តីថ្លែងការណ៍មួយភ្លាមៗនៅលើគេហទំព័រផ្លូវការរបស់ក្លិប។ ក្លិប Cardiff City បានសម្តែងនូវការចូលរួមរំលែកទុក្ខ និងសេចក្តីអាណិតអាសូរយ៉ាងជ្រាលជ្រៅចំពោះក្រុមគ្រួសាររបស់កីឡាករ Sala ក៏ដូចជាគ្រួសាររបស់លោក David Ibbotson ដែលជាអ្នកបើកយន្តហោះ ខណៈដែលមិនទាន់មានតម្រុយពីលោកនៅឡើយ។

#Update The body brought to Portland Port today has been formally identified by HM Coroner for Dorset as that of professional footballer Emiliano Sala.

The families of Mr Sala and pilot David Ibbotson have been updated. Our thoughts remain with them all

https://t.co/YpVTvaEt7P

— Dorset Police (@dorsetpolice) February 7, 2019

គួរបញ្ជាក់ថា ការស្វែងរកយន្តហោះដែលបានបាត់នេះធ្វើឡើងដោយក្រុមហ៊ុនឯកជន AAIB បន្ទាប់ពីក្រុមកីឡាករ ក៏ដូចជាអ្នកគាំទ្រជាច្រើនបានធ្វើការបរិច្ចាគទឹកប្រាក់សរុបជាង ៣០០,០០០ផោនដើម្បីបន្តដំណើរការរុករក ខណៈដែលសមត្ថកិច្ចប៉ូលិសនៅតំបន់ Guernsey បានបញ្ឈប់ការរុករក។

សូមចូលរួមរំលែកទុក្ខចំពោះក្រុមគ្រួសារជនរងគ្រោះ និងសូមឱ្យវិញ្ញាណក្ខ័ន្ធរបស់កីឡាករ Sala ទៅកាន់សុគតិភព!