បុរសញៀនថ្នាំម្នាក់ ដូចទទួលបានជីវិតថ្មីមួយទៀតអីចឹង ដោយសារបានជួបមិត្តជិតសិ្នទ្ធកាលរៀនបឋម

កេនយ៉ា៖ រឿងមិនគួរឲ្យជឿនឹងភ្នែកមួយបានកើតឡើងលើបុរសសញ្ជាតិកេនយ៉ាម្នាក់ ដែលមានប្រវត្តិធ្លាប់ជាមនុស្សញៀនថ្នាំ តែត្រូវបានផ្លាស់ប្តូរខ្សែជីវិតថ្មី បន្ទាប់ពីជួបស្ត្រីម្នាក់ដែលធ្លាប់ជាមិត្តភក្តិជិតសិ្នទ្ធគ្នាកាលរៀនបឋមសិក្សា។ នាងបានជួយជ្រោមជ្រែងគាត់គ្រប់បញ្ហា រួមទាំងលើកទឹកចិត្តឲ្យគេផ្តាច់គ្រឿងញៀន។

លោក Patrick Hinya ធ្លាប់ជាមនុស្សញៀនថ្នាំម្នាក់ដែលសង្គមស្អប់ខ្ពើម គ្មានទីពឹង គ្មានផ្ទះសម្បែង ដើរតែលតោលម្នាក់ឯងរាល់ថ្ងៃ។  ពេលលោក Patrick កំពុងប្រើប្រាស់ថ្នាំញៀន  អ្នកស្រី Nancy Hinga  ជាម្តាយបង្កើតមានឱកាសត្រឹមផ្តល់ចំណីអាហារឲ្យកូនប្រុសគាត់ហូបប៉ុណ្ណោះ។

ឥឡូវនេះខ្សែជីវិតរបស់គាត់ដូចត្រូវបានព្រះប្រោសប្រទានថ្មីអីចឹង។ បន្ទាប់ពីលោកបានជួបស្ត្រី់ឈ្មោះ Wanja Mwaura ដែលធ្លាប់ជាមិត្តភក្តិជិតស្និទ្ធធ្លាប់រៀនបឋមសិក្សាជាមួយគ្នា។

រឿងហេតុនេះកើតចេញពី ថ្ងៃទី១ ដែលលោក Patrick Hinya ជួបអ្នកស្រី Wanja Mwaura។ កាលនោះ អ្នកស្រី Winja បានប្រទះឃើញ Patrick នៅលើដងផ្លូវមួយកន្លែងក្នុងប្រទេសកេនយ៉ា។ ពេលនោះនាងបានសួរទៅកាន់លោក Patrick ថាចាំនាងឬអត់?  អ្វីដែលមិនគួរឲ្យជឿនោះគឺលោក Patrick បានអះអាងថាលោកចងចាំ ហើយក៏ចាំនូវអតីតកាលពីកុមារភាពដែលពួកគេធ្លាប់ជាមិត្តភក្តិរៀនថ្នាក់បឋមជាមួយគ្នាដែរ។

គ្រានោះអ្នកនាង Wanja បាននិយាយទៅកាន់លោក Patrick ពីនេះពីនោះជាច្រើនសំណួរ។ នាងក៏ចង់ឲ្យគាត់មានទីកន្លែងរស់នៅពិតប្រាកដមួយ និងចង់ជួយគាត់ឲ្យផ្តាច់ថ្នាំញៀនទៀតផង។ មិនទុកយូរ អ្នកនាង Wanja និងបងប្អូននាងបានជិះឡានជូន Patrick ទៅផ្តាច់ថ្នាំញៀននៅមណ្ឌលកែប្រែ។ 

នាងខំរិះរកគ្រប់មធ្យោបាយដើម្បីជួយសម្រួលដល់បញ្ហាផ្សេងៗសម្រាប់ជួយមិត្តភក្តិជិតស្និទ្ធរបស់នាងម្នាក់នេះ។  នាងបានផ្តល់ប្រាក់ឧបត្ថម្ភរបស់នាងដែលអាចធ្វើទៅបាន។ មិនតែប៉ុណ្ណោះ នាងថែមទាំងធ្វើជាកញ្ចប់មូលនិធិពីមនុស្សម្នាផ្សេងៗដើម្បីសុំឲ្យពួកគេផ្តល់ជំនួយដល់លោក Patrick ដែលកំពុងជួបបញ្ហា។

ក្រោយពីជួយផ្តាច់គ្រឿងញៀនហើយ អ្នកនាង Wanja ក៏បានបន្តជួយលោក Patrick បើកហាងលក់ទំនិញមួយទៀត ដែលនាងបានដាក់ឈ្មោះថា “ Patrick’s Store”។
ពីមួយថ្ងៃទៅមួយថ្ងៃ លោក Patrick កាន់តែមានសុខភាពល្អ និងកាយសម្បទាមាំមួនជាងមុន។

យោងតាមសម្តីរបស់លោក Patrick ផ្ទាល់បាននិយាយថា “ ខ្ញុំមានអារម្មណ៍ថា ខ្ញុំដូចជាមនុស្សថ្មីម្នាក់អីចឹង។ ខ្ញុំតែងដេកបន់ស្រន់ព្រះជាម្ចាស់ជារៀងរាល់ថ្ងៃ។ សូមកុំឲ្យខ្ញុំធ្លាក់ចូលក្នុងអន្លង់អវជ័យក្នុងជីវិតពាលាពោរពេញដោយថ្នាំញៀននោះទៀតអី”។

ឥឡូវនេះលោក Patrick បានផ្លាស់ប្តូរជីវិតថ្មី ក្លាយជាមនុស្សមានការងារធ្វើម្នាក់ បន្ទាប់ពីមានការជ្រោមជ្រែងពីមនុស្សល្អជុំវិញខ្លួន ក្នុងអំឡុងពេលដែលគាត់ជួបបញ្ហា។ លោក Patrick បាននិយាយថា “វាមិនយឺតពេលទេក្នុងការផ្លាស់ប្តូរជីវិតរបស់អ្នក” ។

ខាងក្រោមនេះជាកម្រងរូបភាពគិតចាប់ពីថ្ងៃទី១ ដែលអ្នកនាង Wanja ជួបលោក Patrick រហូតដល់សព្វថ្ងៃ៖

• ជីវិត
• មិត្ត
• ជំរុញទឹកចិត្ត