ខេត្តសៀមរាប ៖ តាមសេចក្តីរាយការណ៍បឋមបានឱ្យដឹងថា បុរសម្នាក់ត្រូវប្រពន្ធយកកាំបិតបុ័ងតោកាប់ប្រហារ បណ្ដាលឱ្យស្លាប់ក្នុងថ្លុកឈាម ។ ហេតុការណ៍នេះបានបង្កឱ្យមានការភ្ញាក់ផ្អើលកើតឡើងកាលពីរសៀលថ្ងៃទី៣ កុម្ភៈ ឆ្នាំ២០១៩ ស្ថិតនៅភូមិស្រះខ្វាវ ឃុំត្បែង ស្រុកបន្ទាយស្រី ខេត្តសៀមរាប។
ជនរងគ្រោះជាប្តីដែលស្លាប់ឈ្មោះឆេង អាយុ២៤ឆ្នាំ ជាមន្ត្រីយោធា (ពលបាលទោ) នៅវរៈសេនាតូចកងពលធំអន្តរាគមន៍លេខ២ និងជាអ្នកបញ្ជូនសារ។ ចំណែកជនសង្ស័យជាប្រពន្ធឈ្មោះ បេង សុខលាភ អាយុ១៩ឆ្នាំ ។
លោកវរសេនីយ៍ឯក សំ ប៊ុន មេបញ្ជាការកងរាជអាវុធហត្ថស្រុកបន្ទាយស្រី បានប្រាប់កោះសន្តិភាពនៅរសៀលថ្ងៃទី៥ ខែមករា ឆ្នាំ២០១៩ ឱ្យដឹងថា មុនពេលកើតេហតុ មានបងប្អូនប្រជាពលរដ្ឋបានរាយការណ៍មកកម្លាំងកងរាជអាវុធហត្ថស្រុកថា មានករណីហិង្សាក្នុងគ្រួសារមួយបានកើតឡើងកាលពីរសៀលថ្ងៃទី៣ កុម្ភៈ ឆ្នាំ២០១៩ គឺស្ត្រីជាប្រពន្ធបានយកកាំបិតកាប់ប្តី បណ្តាលឱ្យស្លាប់ក្នុងថ្លុកឈាម ។ ក្រោយពីធ្វើសកម្មភាពបានប៉ុន្មានម៉ោងរួចមក ស្ត្រីជាប្រពន្ធមិនបានរត់គេចខ្លួននោះទេ ។
បន្ទាប់ពីទទួលបានសេចក្តីរាយការណ៍ខាងលើភ្លាម លោកក៏បានបញ្ជាឱ្យកម្លាំងជំនាញចុះទៅដល់កន្លែងកើតហេតុភា្លមៗ រហូតឈានដល់ធ្វើការឃាត់ខ្លួនស្ត្រីជាប្រពន្ធរបស់ជនរងគ្រោះយកមកទីបញ្ជាការស្រុក ដើម្បីធ្វើការសួរនាំ និងបញ្ជូនបន្តទៅតុលាការខេត្តចាត់ការទៅតាមផ្លូវច្បាប់។
លោកបានបញ្ជាក់ថា ករណីបណ្តាលឱ្យកើតមានអំពើហិង្សាខាងលើគឺមូលហេតុផ្ដើមចេញពីប្រពន្ធសុំលែងលះ តែបុរសជាប្ដីមិនព្រម ។
លោកបានបញ្ជាក់បន្ថែមថា នៅពេលប្រពន្ធបំរុងនឹងចាកចេញពីផ្ទះនោះ ប្ដីបាននិយាយថា «បើឱ្យលែងទៅ បងសុំបន្សល់ទុកស្លាកស្នាមដោយសារស្នាដៃរបស់អូនសិន»។ បន្ទាប់មកក៏មានអំពើហិង្សកើតឡើងតែម្ដង ហើយករណីនេះមិនមាននរណាដឹងឡើយ ព្រោះកន្លែងកើតហេតុ មានតែពីរនាក់ប្ដីប្រពន្ធតែប៉ុណ្ណោះ។
លោកបានបន្តទៀតថា មូលហេតុដែលប្រពន្ធសុំប្ដីលែងលះបែបនេះ គឺដោយសារម្ដាយខាងប្រុស មិនពេញចិត្តខ្លួន ទើបទំនាស់ក្នុងគ្រួសារចេះតែកើតមានឡើងមិនចេះចប់។
បច្ចុប្បន្ន ជនសង្ស័យជាប្រពន្ធត្រូវបានកម្លាំងកងរាជអាវុធហត្ថស្រុកបន្ទាយស្រី រៀបចំកសាងសំណុំរឿងបញ្ជូនទៅតុលាការខេត្ត ដើម្បីចាត់ការតាមនីតិវិធី ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]