ខេត្តកំពត ៖ ប្រភពព័ត៌មានពីការិយាល័យព្រហ្មទណ្ឌស្នងការដ្ឋានខេត្តបានឲ្យដឹងថា មន្ត្រីនគរបាលបម្រើការងារនៅអធិការដ្ឋាននគរបាលស្រុកទឹកឈូម្នាក់ ត្រូវបានកម្លាំងការិយាល័យព្រហ្មទណ្ឌកម្រិតធ្ងន់នៃស្នងការដ្ឋានខេត្តឃាត់ខ្លួន កាលពីវេលាម៉ោង១២និង០០នាទី ថ្ងៃទី៤ ខែកុម្ភៈ ឆ្នាំ២០១៩ នៅតាមដងផ្លូវលំ ឋិតក្នុងភូមិមាត់ពាម ឃុំម៉ាក់ប្រាង្គ ស្រុកទឹកឈូ ខេត្តកំពត ពីបទករណីហិង្សាដោយស្ថានទម្ងន់ (បាញ់បោះអាវុធខ្លីអនាធិបតេយ្យ) ។
ប្រភពពីសមត្ថកិច្ចដដែលឲ្យដឹងថា ជនសង្ស័យឈ្មោះ ហុក ចេង ភេទប្រុស អាយុ៤៧ឆ្នាំ ជាមន្ត្រីនគរបាលនៃអធិការដ្ឋានស្រុកទឹកឈូបានបាញ់ចំនួន២គ្រាប់ បណ្តាលឲ្យត្រូវជនរងគ្រោះឈ្មោះ ឡាយ លី ភេទស្រី អាយុ៣៩ឆ្នាំ រស់នៅភូមិកើតហេតុខាងលើរងរបួសមួយគ្រាប់ ក្រោមជង្គង់ខាងស្តាំ ។
ប្រភពបានបន្តថា ការដែលជនសង្ស័យបាញ់នេះមូលហេតុករណីសាហាយស្មន់ (គឺប្តីនារីរងគ្រោះទៅលួចសាហាយស្មន់ជាមួយប្រពន្ធជនសង្ស័យ) ហើយជនសង្ស័យក៏ធ្លាប់បានធ្វើការណែនាំដល់ប្តីនារីរងគ្រោះនេះជាច្រើនដងរួចមកហើយដែរ ប៉ុន្តែប្តីនារីរងគ្រោះនៅតែលួចសាហាយស្មន់ជាមួយប្រពន្ធជនសង្ស័យដដែលទើបជនសង្ស័យផ្ទុះកំហឹងភ្លើងប្រច័ន្ទប្រពន្ធជាមួយប្តីនារីរងគ្រោះដោយបាញ់ប្តី ប៉ុន្តែគ្រាប់ផ្លាតត្រូវប្រពន្ធឲ្យរងរបួសជើងតែម្តង ។
លោកឧត្តមសេនីយទោ ស្នងការខេត្តបានប្រាប់កោះសន្តិភាពថា ទោះបីភាគីខាងប្តីស្ត្រីរងគ្រោះជាអ្នកសាហាយស្មន់ក៏ដោយការប្រើប្រាស់អាវុធបាញ់បោះបង្កឲ្យរងរបួសដល់អ្នកដទៃត្រូវតែអនុវត្តតាមច្បាប់ ។
ក្រោយពីមានហេតុការនេះកើតឡើងកម្លាំងការិយាល័យព្រហ្មទណ្ឌស្នងការខេត្តបានចុះទៅអន្តរាគមន៍ភ្លាមៗ ហើយបានឃាត់ខ្លួនជនសង្ស័យនាំមកស្នងការខេត្ត ដើម្បីធ្វើការសាកសួរនិងចាត់ការតាមនីតិវិធីច្បាប់ ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]