ខេត្តបាត់ដំបង ៖ រថយន្តម៉ាកឡិចស៊ីស៤៧០មួយគ្រឿងរបស់ម្ចាស់ស្ថានីយប្រេងមួយកន្លែងត្រូវចោរលួចបើកចេញពីស្ថានីយទាំងថ្ងៃនៅចំពោះមុខម្ចាស់ តែត្រូវម្ចាស់រថយន្តនេះជិះម៉ូតូដេញតាមចាប់យកបានរថយន្តមកវិញ ក្រោយពីចោរនោះព្យាយាមបើករត់បានប្រហែលជាង១គីឡូម៉ែត្រ តែជនល្មើសបានរត់រួចខ្លួន ដោយសារសមត្ថកិច្ចចាត់ទុកចោរនោះជាមនុស្ស «ឆ្គូត»។
បើតាមការអះអាងរបស់កម្មករស្ថានីយប្រេងបានប្រាប់ថា ហេតុការណ៍នេះកើតឡើងនៅម៉ោង ៣និង៣០នាទីរសៀល ថ្ងៃទី០២ កុម្ភ: នៅចំណុចស្ថានីយប្រេង «រស្មីបាត់ដំបង» ស្ថិតក្នុងក្រុមទី០៦ ភូមិរំចេក៤ សង្កាត់រតនះ ក្រុងបាត់ដំបង។ រថយន្តដែលចោរលួចនោះម៉ាកឡិចស៊ីស ពណ៌ស ៤៧០ ពាក់ស្លាកលេខ បាត់ដំបង 2B.6199 របស់ឈ្មោះ ឈឿន ទិត្យ ភេទប្រុស អាយុ២៩ឆ្នាំ ជាម្ចាស់ស្ថានីយប្រេងខាងលើ។
លោក ឈឿន ទិត្យ បាននិយាយថា លោកបើករថយន្តទៅលាងនៅជ្រុងខាងកើតនៃស្ថានីយប្រេងរបស់ខ្លួន តែពេលលាងរួចលោកមិនបានដកសោរចេញទេ ដោយទុកជាប់រថយន្ត ព្រោះគិតថា រថយន្តនៅក្នុងស្ថានីយប្រេង ប៉ុន្តែពេលលោកដើរចេញផុតបន្តិច ស្រាប់តែមិនដឹងថា ជនល្មើសនោះដើរមកពីណា ដើរទៅបើកទ្វារថយន្តឡើងបើកចេញប្រុងទៅបាត់បង្កឲ្យមានការភ្ញាក់ផ្អើល។
លោកឈឿន ទិត្យ បានបញ្ជាក់ថា ភ្លាមៗនោះលោក និងកម្មករម្នាក់ទៀតជិះម៉ូតូដេញតាមរហូតដល់ផ្សារថ្មី ចម្ងាយជាង១គីឡូម៉ែត្រពីកន្លែងលួច ទើបតាមទាន់កាក់ឲ្យឈប់ និងយករថយន្តបានមកវិញ តែជនសង្ស័យនោះបានចុះរត់ចូលរថយន្តគេផ្សេងទៀតនៅទីនោះ រួចចុចឡុកទ្វារជាប់។ ពេលនោះលោកបានទូរស័ព្ទហៅមន្ត្រីនគរបាលម្នាក់ឲ្យជួយអន្តរាគមន៍ដែរ តែមន្ត្រីនោះមិនមកទេ ដោយអះអាងថា ចោរនេះជា«មនុស្សមិនគ្រប់ទឹក»។ ឮដូច្នេះលោកក៏បានបើករថយន្តត្រឡប់មកវិញ ខណ:ដែលចោរឡប់សតិនោះសម្ងំនៅក្នុងរថយន្តគេនៅឡើយ។
បើតាមកម្មករស្ថានីយប្រេងបាននិយាយថា ចោរនោះមានមាឌធំដើរមកពីទិសខាងលិចសំដៅចូលមកស្ថានីយប្រេង តែខ្លួនមិនបានចាប់អារម្មណ៍ថា ជននោះជានរណានោះទេ។ កម្មកររូបនេះបានបញ្ជាក់ថា ជនបានដើរតម្រង់ទៅរថយន្ត ហើយក៏បើកទ្វាររថយន្តចូលបើកថយក្រោយ និងបត់ទៅឆ្ពោះទៅទិសខាងកើតលឿលស្លេវបង្កឲ្យមានការផ្អើលឆោឡោតែម្ដង។
ជុំវិញសកម្មភាពចោរលួចរថយន្តកណ្ដាលក្រុងបាត់ដំបងទាំងថ្ងៃនេះ ហាក់មិនរំខានដល់កម្លាំងនគរបាលក្រុងទេ រហូតដល់ជនរងគ្រោះរំដោះបានរថយន្តនោះពីកណ្ដាប់ដៃចោរបើកមកដល់ស្ថានីយប្រេងវិញហើយក្ដី ក៏គេមិនឃើញមានសមត្ថកិច្ចក្រុងបាត់ដំបងណាម្នាក់មកសួរនាំដែរ។ លើកលេងតែលោកឧត្តមសេនីយ៍ត្រី ជេត វណ្ណនី ស្នងការរងខេត្តតែម្នាក់គត់ដែលលោកបានមកដល់កន្លែងកើតហេតុ ដើម្បីសាកសួរនូវហេតុការណ៍នេះ។
លោកឧត្តមសេនីយត្រី ជេត វណ្ណនី ស្នងការរងខេត្តបានទទួលស្គាល់ថា កម្លាំងសមត្ថកិច្ចពិតជាមានភាពយឺតយ៉ាវមែន ជុំវិញករណីចោរលួចរថយន្តនេះ សូម្បីតែលោកទៅដល់កន្លែងកើតហេតុហើយ ក៏មិនទាន់ឃើញមានវត្តមានកម្លាំងអធិការក្រុងណាម្នាក់នៅទីនោះដែរ។ ទោះយ៉ាងណាលោកស្នងការរងបានបញ្ជាក់ថា ពេលនេះមន្ត្រីជំនាញបាននិងកំពុងស្រាវជ្រាវរកជនសង្ស័យនោះហើយ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
