ស្ងាត់ៗកំពូលតារាចម្រៀងលោក ឆាយ វីរៈយុទ្ធ ក៏បានហក់ចូលប្រឡូកនៅក្នុងវិស័យអចលនទ្រព្យគួរឲ្យភ្ញាក់ផ្អើលនៅខេត្តព្រះសីហនុ លើផ្ទៃដីប្រមាណ១០ហិចតា។ តែយ៉ាងណាលោក ឆាយ វីរៈយុទ្ធ បានបញ្ជាក់ថា ការបោះទុននេះជាការវិនិយោគរួមគ្នារវាងរូបលោក និងតារាពហុជំនាញអ្នកនាង ខាត់ សុឃីម រួមជាមួយនឹងលោក មេន កានី ប្រធានក្រុមហ៊ុន GM ។
ការវិនិយោគលើវិស័យអចលនទ្រព្យរួមគ្នា ដែលមានឈ្មោះថា «គម្រោងដីឡូតិ៍ និងផ្ទះល្វែង ឆាយ វីរៈយុទ្ធ GM ខាត់ សុឃីម» នេះ តារាចម្រៀងជួរមុខលោក ឆាយ វីរៈយុទ្ធ បានបញ្ជាក់ថា មានទីតាំងនៅភូមិអូរឧកញ៉ាហេង ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ។ លោកបានបញ្ជាក់ថា គម្រោងដីឡូតិ៍នេះបានវិនិយោគលើផ្ទៃដី១០ហិចតា ដែលអាចពុះឡូតិ៍ បានប្រមាណ៧០០ឡូតិ៍។
ទាំងលោក ឆាយ វីរៈយុទ្ធ និងអ្នកនាង ខាត់ សុឃីម សុទ្ធតែបានបញ្ជាក់ពីទំនុកចិត្តខ្ពស់នៅក្នុងការបោះទុនជាលើកដំបូងនេះ ដោយសារតែ ដីដែលកំពុងវិនិយោគនេះស្ថិតនៅលើទីតាំងល្អអស្ចារ្យ មិនឆ្ងាយប៉ុន្មានពីក្រុងកំពង់សោម។ មួយវិញទៀត អ្នកនាង ខាត់ សុឃីម បានបញ្ជាក់ថា ទំនុកចិត្តនេះក៏បានកើតឡើងពីការទុកចិត្តលើក្រុមហ៊ុន GM ដែលជាក្រុមហ៊ុនពុះដីឡូតិ៍មានឈ្មោះល្បីជាច្រើនឆ្នាំមកហើយ។ អ្វីដែលកាន់តែភ្ញាក់ផ្អើលនោះ គឺគ្រាន់តែថ្ងៃបើគម្រោងភ្លាម ក្រុមហ៊ុនលក់បានប្រមាណ២០០ឡូតិ៍បាត់ទៅហើយ។
ដើម្បីកុំឲ្យមានចម្ងល់ ទាំងអ្នកនាង ខាត់ សុឃីម និងលោក ឆាយ វីរៈយុទ្ធ បានបញ្ជាក់ថា ក្រុមហ៊ុន GM មានភាគហ៊ុន៥០ភាគរយ លោក ឆាយ វីរៈយុទ្ធ២៥ភាគរយ និងអ្នកនាង ខាត់ សុឃីម ២៥ភាគរយ។ លោក ឆាយ វីរៈយុទ្ធ បានលើកឡើងថា លោកពិតជាសប្បាយចិត្តសម្រាប់ការគាំទ្ររបស់បងប្អូនមហាជនគ្រប់មជ្ឈដ្ឋានចំពោះគម្រោងរបស់លោក អ្នកនាង ខាត់ សុឃីម និងក្រុមហ៊ុន GM ហើយលោកនឹងពង្រីកគម្រោងកាន់តែធំបន្ថែមទៀតនៅពេលខាងមុខ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]