ពិតជាអង់អាចមែន! ឃើញកូនកំពុងត្រូវក្រពើខាំ បុរសជាឪពុកហក់ចូលប្រយុទ្ធជាមួយសត្វក្រពើ

ហ្វីលីពីន៖ ក្មេងប្រុសម្នាក់បានចុះទៅហែលទឹកទន្លេប្រលែងជាមួយប្អូនបង្កើតរបស់គេ។ ស្រាប់តែមួយរំពេចសោះក៏មានសត្វក្រពើមួយក្បាលហែលមកខាំចំដៃខាងឆ្វេង ហើយវាប្រុងនឹងអូសក្មេងនោះចូលក្នុងទឹកជ្រៅទៀតផង។ ហេតុការណ៍នេះកើតឡើងក្នុងភូមិ Balabac នៅប្រទេសហ្វីលីពីន។

យោងតាមសារព័ត៌មាន Daily Mail ចេញផ្សាយ ថ្ងៃទី ៣០ ខែមករា ឆ្នាំ ២០១៩  បានឲ្យដឹងថា ក្មេងប្រុសរងគ្រោះមានឈ្មោះ  Diego Albuhasan អាយុ១២ឆ្នាំ។

មុនពេលកើតហេតុក្មេងប្រុសរងគ្រោះបានចុះទៅលេងទឹកទន្លេជាមួយប្អូនប្រុសបង្កើតរបស់គេ។ ពេលកំពុងប្រលែងគ្នាលេងសុខៗ ស្រាប់តែក្មេងប្រុស Diego ត្រូវបានក្រពើទឹកសាបហក់មកខាំចំដៃខាងឆ្វេង។  ពេលនោះគេភ័យណាស់ ខំស្រែកហៅអ្នកភូមិឲ្យជួយផង។ តែមិនទាន់មានអ្នកណាបានឮសម្លេងស្រែករបស់គេឡើយ។

សម្រែកហៅឲ្យជួយចេះតែឮឡើងៗ ពេលនោះលោក Tejada Abulhasan ជាឪពុកបង្កើតបានស្តាប់ឮសម្លេង  ហាក់បីដូចជាសម្លេងរបស់កូនប្រុសគាត់។ មិនបង្អង់យូរ បុរសជាឪពុកក៏បានរត់ពីផ្ទះសំដៅមកដងទន្លេដោយមានកាន់ដំបងឈើមួយទៅជាមួយផង។ លុះទៅដល់មាត់ទន្លេភ្លាម គាត់បានឃើញទិដ្ឋភាពស្តែងៗនៅពេលកូនប្រុសគាត់កំពុងត្រូវក្រពើខាំដៃ។ ភ្លាមនោះគាត់បានយកដំបងឈើ ហក់ទៅវាយក្រពើនោះដោយមិនខ្លាចរអា។

លោក Tejada បានសំពងលើសត្វក្រពើជាច្រើនដង។ ប៉ុន្តែវាមិនព្រមលែង នៅតែបន្តខាំដៃកូនប្រុសគាត់កាន់តែខ្លាំង។ ខឹងក្រពើនៅតែមិនលែង លោក Tejada បានគិតឃើញគំនិតមួយ។ គាត់បានទាញជើងក្រពើម្ខាង ហើយយកធ្មេញរបស់គាត់ខាំវាវិញ។ គាត់បានខាំជើងក្រពើនោះ ៣ ទៅ៤ដង ហើយខាំឲ្យខ្លាំងតាមតែគាត់អាចធ្វើទៅបាន។  

អ្វីដែលមិនគួរឲ្យជឿនោះគឺវិធីសាស្ត្រដ៏កម្រមួយនេះបានធ្វើឲ្យសត្វក្រពើ  ព្រមលែង កូនប្រុសគាត់ ហើយវាក៏បានហែលចូលទឹកវិញបាត់ទៅ។ បន្ទាប់ពីហេតុការណ៍នេះកើតឡើងលោក Tejada បានយកកូនប្រុសរបស់គាត់ទៅព្យាបាលនៅមន្ទីរពេទ្យ។ គ្រូពេទ្យបានអះអាងថា Diego មិនមានរងរបួសធ្ងន់ប៉ះពាល់ដល់អាយុជីវិតឡើយ។

យោងតាមប្រសាសន៍របស់លោក Tejada វិញបាននិយាយប្រាប់សមត្ថកិច្ចក្នុងតំបន់ថា "ក្នុងហេតុការណ៍នោះ ខ្ញុំគ្មានពេលគ្រប់គ្រាន់ដើម្បីគិតទេ។ ខ្ញុំបានហក់ចូលទឹកទន្លេ ហើយធ្វើការប្រយុទ្ធគ្នាជាមួយសត្វក្រពើ ដោយសារវាខាំកូនប្រុសខ្ញុំ។ អំឡុងពេលនោះ ភ្នែករបស់វាបានសម្លឹងមកមុខខ្ញុំ ហើយភ្នែករបស់ខ្ញុំក៏សម្លឹងទៅវាវិញដែរ។ ប៉ុន្តែវានៅតែក្បលរឹង មិនព្រមព្រលែងកូនខ្ញុំទេ។ រំពេចនោះ ខ្ញុំស្រាប់តែគិតឃើញគំនិតមួយ។ ខ្ញុំបានទាញជើងវាម្ខាង ហើយខាំវាឲ្យខ្លាំងបំផុតតាមដែលខ្ញុំអាចធ្វើទៅបាន ប្រៀបដូចជាការខាំរបស់សត្វឆ្កែ Rottweiler អីចឹងដែរ"៕