មកស្គាល់ សណ្ឋាគារដ៏អស្ចារ្យមួយដែលមានបម្រើសេវា «ត្រាំទឹកក្តៅលាយជាមួយផ្លែឈើ និងបន្លែ» ដំបូងគេបង្អស់លើលោក (មានវីដេអូ)

ចិន៖ នៅក្នុងយុគសម័យនាពេលបច្ចុប្បន្ន យើងសង្កេតឃើញថា «គំនិតច្នៃប្រឌិត» គឺជារឿងដ៏សំខាន់បំផុតក្នុងការបើកអាជីវកម្មដ៏ជោគជ័យ។ មនុស្សសម័យឥឡូវចូលចិត្តអ្វីប្លែកៗ និងថ្មីសម្រាប់ពួកគេ ទើបម្ចាស់អាជីវកម្មជាច្រើនតែងតែរិះរកអ្វីប្លែកៗដើម្បីបំពេញតម្រូវការអតិថិជនរបស់ខ្លួន។ 

តួយ៉ាងដូចជា សណ្ឋាគារដ៏អស្ចារ្យមួយនេះអីចឹង ដែលមានបម្រើសេវាកម្ម «ងូតទឹកលាយជាមួយផ្លែឈើ និងបន្លែ» ដំបូងគេបង្អស់លើលោក ដែលកំពុងតែទទួលបានការចាប់អារម្មណ៍ជាខ្លាំងពីសំណាក់អ្នកប្រើប្រាស់បណ្តាញសង្គម និងអ្នកលេងអ៊ីនធើណេតជាច្រើនទៀតនៅលើសកលលោក។

យោងតាមសារព័ត៌មាន Channel News Asia បានឱ្យដឹងថា សណ្ឋាគារដ៏អស្ចារ្យនេះមានទីតាំងនៅក្នុងប្រទេសចិន និងគ្រោងបើកសម្ភោធកន្លែងងូតទឹកដ៏ពិសេសមួយ នាពេលខាងមុខនេះ។

កន្លែងងូតទឹកពិសេសនេះត្រូវបានគេស្គាល់ឈ្មោះថា «Human Hotpot» នឹងមានវត្តមានក្នុងសណ្ឋាគារ First World Hotel មានទីតាំងស្ថិតនៅទីក្រុងហាងចូវនាពេលខាងមុខនេះ។ កន្លែងងូតទឹកក្តៅពិសេសនេះត្រូវបានបែកចែកជា ៩ផ្នែកដែលមានផ្លែឈើ និងបន្លែចម្រុះ ៩មុខខុសៗគ្នា។ គ្រឿងផ្សំនីមួយៗត្រូវបានជ្រើសរើសជាពិសេសដើម្បីដំណាងគ្រឿងផ្សំស៊ុបឆ្នាំងភ្លើង ឬ Hotpot។   ក្នុងនោះមានដូចជា សាឡាត់, ក្រូចខ្វិច, ផ្លែប៉ោម, ចេក, ម្ទេស, ក្រូចឆ្មា, ប៉េងប៉ោះ, ផ្សិត និងសូម្បីពោតក៏មានដែរ។

បន្ថែមពីនេះទៀត ភ្ញៀវអាចពិសាអាហារដូចជាសាច់អាំង BBQ និងភេសជ្ជៈផ្សេងៗទៀត ក្នុងអំឡុងពេលងូតទឹកក្តៅពិសេសនេះក៏បានដែរ។ លើសពីនេះទៅទៀត ទឹកក្តៅពិសេសនេះត្រូវបានឱ្យដឹងថា វាជំនួយដល់សុខភាពទៀត ហើយវានឹងបើកសម្ពោធជាផ្លូវការនៅដើមខែកុម្ភៈនេះតទៅហើយ។   អ្វីដែលពិសេសលើសពីពិសេសទៀតនោះគឺថា ក្នុងអំឡុងពេលបុណ្យចូលឆ្នាំចិនខាងមុខនេះ អតិថិជនណាដែលកើតក្នុងឆ្នាំកុរ នឹងអាចចូលកន្លែងងូតទឹកនេះបានដោយឥតគិតថ្លៃ។

យ៉ាងណាមិញចំពោះតម្លៃវិញ យើងពុំទាន់ដឹងច្បាស់នោះទេ តែប្រសិនបើអ្នកមានឱកាសទៅលេងស្រុកចិន អ្នកគួរតែចូលទៅសាកល្បងត្រាំទឹកក្តៅនេះ ដើម្បីទទួលបានបទពិសោធន៍ថ្មីនៅក្នុងជីវិត៕ 

ចង់ជ្រាបច្បាស់ទស្សនាវីដេអូខាងក្រោម៖

• ទីកន្លែង
• វីដេអូ