ភ្នំពេញ៖ ដូចដែលប្រិយមិត្តបានជ្រាប ដំណឹងដ៏គួរឲ្យសោកស្តាយដែល អតីតតារាច្រៀងស្រអែមស្រស់ ខេមរៈ ស្រីពៅ បានទទួលមរណៈទាំងវ័យក្មេងបានធ្វើឲ្យមហាជន ក៏ដូចជាមិត្តសិល្បៈគ្រប់គ្នា មានភាពតក់ស្លុកនិងរំជួលចិត្តខ្លាំងចំពោះដំណឹងនេះ។
មិនតែប៉ុណ្ណោះ ក្នុងនោះក៏មានតារាសិល្បៈជាច្រើន បាននាំគ្នាបង្ហោះសារ ចូលរួមរំលែកទុក្ខ និងបង្ហាញពីអារម្មណ៍សោកស្តាយស្រណោះជាខ្លាំង ចំពោះមិត្តរួមអាជីពកញ្ញា ខេមរៈ ស្រីពៅ បានទទួលមរណភាពផងដែរ។
លើសពីនេះទៅទៀត មិនប៉ុន្មានម៉ោងមុននេះ តារាចម្រៀងស្រី មាស សុខសោភា ក៏បានបង្ហោះជាសារ រៀបរាប់ពីអារម្មណ៍រន្ធត់ក្តុកក្តួលរបស់ខ្លួន ដោយមិននឹកស្មានថា បាត់បង់មិត្តរួមសិល្បៈ ក៏ប្រៀបដូចជាប្អូនស្រីម្នាក់របស់នាង បានលាចាកគួរឲ្យអាណិតបែបនេះសោះ។
ខាងក្រោមនេះគឺជាអត្ថន័យសាររបស់នាង៖
«បងពិតជាមានអារម្មណ៍រន្ធត់ក្តុកក្តួលក្រៀមក្រំជាទីបំផុត ចំពោះមរណភាពរបស់ប្អូនស្រី ខេមរៈ ស្រីពៅ ។ សម្រាប់បង ប្អូនស្រី គឺជាក្មេងស្រីគួរអោយស្រលាញ់ម្នាក់ គ្រប់ពេលបងនិយាយលេងក្រោយឆាកតន្រី្ត ប្អូនតែងតែសើចសប្បាយ រីករាយ ពោរពេញដោយស្នាមញញឹម ប្អូនតែងតែគោរពបងៗសិល្បៈរាមច្បង ទោះប្អូនមិនសូវចេះនិយាយច្រើនតែប្អូនចូលចិត្តការសប្បាយជាមួយបងៗសិល្បៈ.. នៅពេលដែលបាត់វត្តមានប្អូនពីសិល្បៈរយៈពេល ៣ ទៅ ៤ ឆ្នាំនេះ មហាជនក៏ដូចជាបងៗអ្នកសិល្បៈតែងតែបារម្ភពីសុខទុក្ខរបស់ប្អូន ចង់ជួបប្អូនតែគ្មានឱកាសនិងបានជួប រហូតបានទទួលដំណឹងដ៏សែនក្រៀមក្រំនេះ បងស្ទើរតែមិនជឿព័ត៌មានមួយនេះ ។ ជាចុងក្រោយបងសូមចូលរួមរំលែកទុក្ខដល់ក្រុមគ្រួសារប្អូនស្រី ខេមរៈ ស្រីពៅ ហើយសូមប្អូនទៅកាន់សុគតិភព កើតជាតិណាៗសូមកុំអោយអភ័ព្វដូចជាតិនេះ ..បង និង មហាជនគ្រប់រូបនិងចងចាំប្អូនស្រីទុកក្នុងចិត្តជារៀងរហូត...» ។
គួរឲ្យដឹងផងដែរថា មុននេះបន្តិចសពរបស់កញ្ញា ខេមរៈ ស្រីពៅ បានកំពុងតែដឹកបញ្ជូនតាមយន្តហោះ ពីប្រទេសឥណ្ឌា មកកាន់ប្រទេសកម្ពុជាហើយ នេះបើតាមដឹងថ្ងៃស្អែកសពរបស់នាង នឹងមកដល់គេហដ្ឋាន ដែលកំពុងតែរៀបចំរង់ចាំទទួល ធ្វើពិធីបុណ្យតាមប្រពៃណីផងដែរ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]