រាជធានីភ្នំពេញ ៖ យ៉ាងហោចណាស់មនុស្ស២នាក់ស្លាប់ និងជាង១០នាក់ទៀតរងរបួសធ្ងន់ និងស្រាល ដោយសារគ្រោះថ្នាក់ចរាចរណ៍មួយ តាមបណ្តោយផ្លូវជាតិលេខ៣ ខណៈរថយន្តដឹកកម្មករ១គ្រឿងបានបែកកង់រួចឈប់ នៅលើផ្លូវស្របពេលនោះមានរថយន្តកូរ៉េមួយគ្រឿងទៀតបើកស្របទិស គ្នាបានពីក្រោយពេញទំហឹង ។ ហេតុការណ៍នេះបានកើតឡើងកាលពីវេលាម៉ោង៤និង៣០នាទីទៀបភ្លឺ ថ្ងៃទី១៨ មីនា ស្ថិតនៅចំណុចបង្គោលគីឡូម៉ែត្រលេខ៤១-៤២ ក្នុងភូមិតាំងជូង ឃុំតាំងជូង ស្រុកបាទី។
លោកចាប សុខុម នគរបាលចរាចរស្រុកបាទីបានឱ្យដឹងថា ក្នុងករណីគ្រោះថ្នាក់ចរាចរណ៍នេះយើងស្គាល់ឈ្មោះ តែអ្នករបួសម្នាក់ប៉ុណ្ណោះ ចំណែកអ្នកស្លាប់ និងរបួសឯទៀតអត់ស្គាល់ទេ ព្រោះក្រោយពេលកើតហេតុមានរថយន្តយកទៅសង្គ្រោះនៅមន្ទីរ ពេទ្យរាជធានីភ្នំពេញ។ លោកបន្តថា គ្រោះថ្នាក់នេះកើតឡើងពេលរថយន្តម៉ាកហ៊ីយ៉ាន់ដាយ ពណ៌ខៀវ ដឹកកម្មករចំនួន១៦នាក់មកពីខេត្តកំពង់ស្ពឺ ក៏បែកកង់ឈប់ចតនៅលើទ្រូងផ្លូវក៏ត្រូវរថយន្តមួយគ្រឿង ម៉ាកនីស្សាន់ពណ៌សំបកឪឡឹក ជិះគ្នា៣នាក់ បើកបោះពួយពីត្បូងទៅជើងស្របទិសគ្នាបុករថយន្តហ៊ីយ៉ាន់ដាយ ពេញទំហឹងតែម្តង ឯអ្នកបើកបររថយន្តនីស្សាន់ក៏រងរបួសធ្ងន់ដែរ ត្រូវបានរថយន្តដឹកទៅសង្គ្រោះនៅមន្ទីរពេទ្យបង្អែកខេត្តតាកែវ ដែលត្រូវគេស្គាល់ថា ឈ្មោះលី ចន្នី ភេទប្រុស អាយុ៣២ឆ្នាំ រស់នៅភូមិពោធិ ឃុំព្រះបាទជាន់ជុំ ស្រុកគិរីវង់ ។
រថយន្តទាំង២គ្រឿងត្រូវបានស្ទូចយកទៅដោះស្រាយគ្នានៅការិយាល័យនគរបាលចរាចរខេត្ត ៕
ដោយ ៖ ប្រុសកោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]