ឃាត់ខ្លួនក្រុមក្មេង ទំនើង១២នាក់ ដកហូតម៉ូតូ៦គ្រឿង ខណៈស្ទាក់វាយភាគី ជម្លោះក្រោយចេញ ពីរាំធុងបាស់

បន្ទាយមានជ័យៈ នគរបាលស្រុកថ្មពួកឃាត់ខ្លួន ក្រុមក្មេងទំនើង១ក្រុម មានគ្នា១២នាក់ ដកហូត បានម៉ូតូ៦គ្រឿង បញ្ជូនមកអធិការដ្ឋាននគរបាល ស្រុកថ្មពួក ដើម្បីអប់រំ ខណៈពួកគេលើកគ្នាស្ទាក់ ដេញវាយក្រុមក្មេង១ក្រុមទៀត តាមផ្លូវត្រឡប់ពីកន្លែង រាំធុងបាស់ នៅចុងភូមិកាលពីយប់រំលងអាធ្រាត្រ ឈានចូលថ្ងៃទី១៧ ខែមីនា ឆ្នាំ២០១២ ខែមីនា ឆ្នាំ២០១២ នៅភូមិទ្រាស់ ឃុំគោកកឋិន ស្រុកថ្មពួក ខេត្តបន្ទាយមានជយ័។

នគរបាលស្រុកថ្មពួកបានឲ្យដឹងថា នៅយប់ថ្ងៃទី១៧ ខែមីនា ឆ្នាំ២០១២ថា នៅភូមិទ្រាស់មានការចាក់ធុងបាស រាំកម្សាន្តលេងក្នុងពិធីមង្គលការមួយ ដែលមានមនុស្សប្រុស-ស្រី ក្មេងចាស់រាំលេងយ៉ាងសប្បាយរីករាយ។ លុះដល់ ពិធីរាំធុងបាសចប់សព្វគ្រប់កណ្តាលយប់អធ្រាត្រវេលាម៉ោងជាង១២យប់រំលង អាធ្រាត្រឈាន ចូលព្រឹកថ្ងៃទី១៨ ខែមីនា ស្រាប់តែក្មេងទំនើងទាំង១២នាក់ ដែលរស់នៅភូមិថ្មី ឃុំភូមិថ្មី ស្រុកថ្មពួក បានទៅស្ទាក់តាមផ្លូវដេញវ៉ៃក្មេង មួយក្រុមទៀតទាំងកម្រោល។

នគរបាលស្រុកថ្មពួកបានឲ្យដឹងទៀតថា បន្ទាប់ពីទទួលព័ត៌មាននេះភ្លាម កម្លាំងនគរបាលស្រុកចុះទៅ សហការជាមួយនគរបាលប៉ុស្ថិ៍ឃុំគោកកឋិន ចុះអន្តរាគមន៍ចំណុចកើតហេតុ ទើបឈានដល់ការឃាត់ ខ្លួនក្មេងទំនើងទាំង១២នាក់នេះតែម្តង ដោយឡែកក្មេង១ក្រុមទៀតដែលជាភាគីជម្លោះរបស់ពួកគេបាន រត់គេចខ្លួនបាត់ស្រមោលអស់៕

ដោយៈ ប៊ុន សំណាង

ផ្តល់សិទ្ធដោយ ដើមអម្ពិល