បរទេស៖ ក្រុមផ្នែកអភិវឌ្ឍន៍ហ្គេម DOTA 2 នៃក្រុមហ៊ុន Valve Corporation បានធ្វើការប្រកាសឱ្យដឹងថា ពួកគេបានធ្វើការ Reset និងផ្អាកចំពោះគណនីចំនួនជាង ១៧,០០០គណនី បន្ទាប់ពីក្រុមហ៊ុនបានពិនិត្យឃើញថា គណនីទាំងនោះបានបំពានទៅនឹងប្រព័ន្ធច្បាប់រៀបចំគូប្រកួត។
បើយោងតាមក្រុមអ្នកអភិវឌ្ឍន៍ DOTA2 ដដែលនេះបានបន្ថែមទៀតថា គណនីដែលត្រូវបានបិទចោលនោះភាគច្រើនជាគណនី “Smurfs” និងគណនីអ្នកទិញបន្ត។
ចំពោះហ្គេមដែលមានលក្ខណៈ Online ឬហៅបានថា “Multiplayer Online Gaming”, ពាក្យថា “Smurf” គឺប្រើសំដៅទៅលើគណនីដែលត្រូវបានបង្កើតដោយអ្នកលេងដែលមានទឹកដៃ និងបទពិសោធន៍ខ្ពស់ រួចយកគណនីដែលបង្កើតថ្មីនោះទៅចាប់គូ ឬហៅថា “Matching” ជាមួយអ្នកដែលមានគណនីថ្មីដូចគ្នា ប៉ុន្តែមិនមានបទពិសោធលេង DOTA ពីមុនមក ដើម្បីអោយមានភាពងាយស្រួលក្នុងការប្រកួតឈ្នះ។
ការធ្វើបែបនេះ គឺដើម្បីអោយគណនីថ្មីនោះមានភាពវិវត្តន៍ឆាប់រហ័ស ហើយពេលខ្លះត្រូវបានយកទៅលក់ទៅអោយ Player ដទៃទៀតផងដែរ។
ការចាប់គូ “Matching Game” ចាប់ផ្តើមលែងមានតុល្យភាពដោយសារតែគណនី Smurf នេះមានចំនួនច្រើន ហើយវាក៏បានប៉ះពាល់យ៉ាងខ្លាំងដល់ Player ដ៏ទៃទៀតនៅក្នុងហ្គេម DOTA2 ផងដែរ។
បច្ចុប្បន្ននេះក្រុមហ៊ុន DOTA2 បានធ្វើការទប់ស្កាត់ និងព្យាយាមបំបាត់ចោលឱ្យអស់តែម្តងសម្រាប់គណនី “Smurf” និងគណនី “Buyer Account”។ ដោយឡែក ក៏មានការរាយការណ៍ពី Player មួយចំនួនរបស់ Valve Steam Forum បានរាយការណ៍ថាពួកគេបានទទួលការផ្អាកគណនីពីក្រុមហ៊ុនរយៈពេល “៥ឆ្នាំ” ដោយសារតែគណនីរបស់ពួកគេជាគណនី “Smurf” ។
គួរឱ្យដឹងថា បើយោងតាម SteamCharts បានប៉ាន់ប្រមាណពីចំនួនអ្នកលេងហ្គេម DOTA2 ដំណាលគ្នា ជាមធ្យមមានចំនួនប្រហែលជាង ៤៤០,០០០នាក់ ក្នុងចំណោមគណនីជាង ៧២៩,០០០ ក្នុងរយៈពេល ៣០ថ្ងៃចុងក្រោយនេះ។ វាជារឿងល្អសម្រាប់ការអនុវត្តនូវការផ្អាកចំនួនគណនី “Smurf” ដែលនេះជាសញ្ញាណល្អមួយ នៃការបង្កើនតុល្យភាពនៃការ “Matching” នៅក្នុងហ្គេម DOTA2 ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក បច្ចេកវិទ្យា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
