ពិតជាដំបៅមិនឈឺ យកឈើរុកមែន! យន្តហោះត្រូវផ្អាកការហោះហើរ ដោយសារមានអ្នកដំណើរ បោះកាក់ចូលម៉ាស៊ីនយន្តហោះសុំសេចក្តីសុខ (មានវីដេអូ)

ចិន៖ យោងតាមសារព័ត៌មាន Shanghaiist ចេញផ្សាយថ្ងៃទី ១១ ខែ មករា ឆ្នាំ២០១៩ នេះបានឲ្យដឹងថា យន្តហោះចិនមួយឈ្មោះថា China Easten Airlines ត្រូវបានផ្អាកការហោះហើរដល់ទៅ២ម៉ោងពេញ បន្ទាប់ពីអ្នកដំណើរព្យាយាមបោះកាក់ចូលស្លាបម៉ាស៊ីនយន្តហោះមុនចេញដំណើរ។

ហេតុការណ៍នេះកើតឡើងកាលពីថ្ងៃព្រហស្បត្តិ៍ បន្ទាប់ពីអ្នកត្រួតពិនិត្យយន្តហោះរកឃើញកាក់ធ្លាក់រាយប៉ាយពេញដីនៅព្រលានយន្តហោះ។ ក្នុងចំណោមនោះមានកាក់ចំនួន២ត្រូវបានគេប្រទះឃើញនៅជិតស្លាបយន្តហោះ និងមួយកាក់ចុងក្រោយបានធ្លាក់នៅលើដី។

បន្ទាប់ពីហេតុការណ៍នេះកើតឡើង សមត្ថកិច្ចចិនបានចូលទៅឆែកឆេររបស់របរអ្នកដំណើរលើយន្តហោះ តែនៅតែមិនអាចរកឃើញតម្រុយនិងរកមុខអ្នកដែលបានចោលកាក់ឃើញឡើយ។ មិនតែប៉ុណ្ណោះសមត្ថកិច្ចក៏បានធ្វើការ
ប្រកាសសួររកមុខអ្នកដែលបោះកាក់ចូលទៅក្នុងម៉ាស៊ីនយន្តហោះដែរ តែគ្មានអ្នកណាឆ្លើយតបនឹងសំណើនេះទេ។

គួរបញ្ជាក់ថា ហេតុការណ៍នេះក៏ធ្លាប់កើតឡើងម្តងរួចមកហើយ គេឃើញមានបុរសជនជាតិចិនវ័យចំណាស់ពីរនាក់  បាចកាក់ចូលស្លាបយន្តហោះដើម្បីសុំសេចក្តីសុខមុនចេញដំណើរ៕ 

មានវីដេអូនៅខាងក្រោម៖