ការសិក្សាថ្មីបានឲ្យដឹងថា មេរោគផ្សិត Candida Albicans ដែលជាមេរោគឱកាសនិយម ត្រូវបានគេរកឃើញថា អាចបង្កបញ្ហាដល់ការចងចាំ និងសកម្មភាពមិនប្រក្រតីមួយចំនួននៃខួរក្បាល ដែលស្រដៀងទៅនឹងលក្ខណៈនៃជំងឺវង្វេងវង្វាន់ Alzheimer’s។
មេរោគ Candida Albicans ជាប្រភេទមេរោគផ្សិត មិនបង្កជំងឺចំពោះបុគ្គលមានសុខភាពល្អនោះទេ។ ពពួកផ្សិត Candida ច្រើនមាននៅតាមប្រព័ន្ធរំលាយអាហារ ហើយក៏មាននៅក្នុងមាត់ផងដែរ។ ប៉ុន្តែនៅពេលប្រព័ន្ធភាពសុំាយើងចុះខ្សោយ វានឹងឆ្លៀតឱកាសចាប់ផ្តើមរីកលូតលាស់បង្កើនចំនួន ដែលជាលទ្ធផលវាអាចបង្កជំងឺផ្សេងៗជាច្រើនមុខ។ ជាក់ស្តែងករណីខ្លះ វាជាដើមហេតុនៃជំងឺអាឡែកស៊ីធ្ងន់ធ្ងរ ដូចជាជំងឺហឺតជាដើម។
ថ្មីៗនេះការសិក្សាទៅលើសត្វកណ្តុរក្នុងមន្ទីរពិសោធន៍ ដោយការចាក់បញ្ចូលមេរោគផ្សិតCandidaចូលក្នុងចរន្តឈាម បានបង្ហាញថា មេរោគនេះក្នុងបរិមាណច្រើន អាចជ្រាបចូលតាមរនាំងខាន់ផ្តាច់រវាងសរសៃឈាមនិងកោសិកាខួរក្បាល(Blood-brain barrier) ដែលជាធម្មតារនាំងនេះដើរតួនាទីដូចជាកន្លែងត្រួតពិនិត្យយ៉ាងតឹងរឹងពុំឲ្យមានសារធាតុ ឬមេរោគណាចូលបានឡើយ។
ទោះបីជាយ៉ាងណាក៏ដោយ ការជ្រាបចូលនៃមេរោគផ្សិតក្នុងខួរក្បាលបានភ្ញោចឲ្យប្រព័ន្ធភាពសុំានៃខួរក្បាលធ្វើការឆ្លើយតបយ៉ាងសកម្ម។ ជាក់ស្តែងកោសិកាឈាមស Microglia បានធ្វើសកម្មភាពដើរកំទេច និងស៊ីពពួកមេរោគទាំងនេះ ហើយវាថែមទាំងភ្ញោចឲ្យមានមេកានិចរលាកហើម ដោយបង្កើនកំដៅរាងកាយ និងបញ្ចេញសារធាតុមួយចំនួនដើម្បីកំចាត់មេរោគផ្សិត។ ប៉ុន្តែមេកានិចនេះបានប៉ះពាល់ទៅដល់កោសិកានៃខួរក្បាលផងដែរ។
ងាកមកមើលការប្រៀបធៀបរវាងកណ្តុរក្រុមទី១ ដែលគេបានចាក់បញ្ចូលមេរោគCandida និងកណ្តុរដែលមានសុខភាពល្អធម្មតា បានបង្ហាញលទ្ធផលថា ក្រោយពីអាការនៃជំងឺថយអស់ កណ្តុរក្រុមទី១ធ្លាក់ចុះសមត្ថភាពនៃការចងចាំ និងខូចខាតកោសិកាខួរក្បាលគួរឲ្យកត់សម្គាល់។
លោកបញ្ជាក់បណ្ឌិត David B.Corry បានឱ្យដឹងថា ការរកឃើញនេះសបញ្ជាក់ឲ្យឃើញថា តួនាទីនៃមេរោគផ្សិត អាចបង្កជំងឺក្នុងរាងកាយមនុស្សយើងលើសពីបញ្ហាអាឡែកស៊ីធ្ងន់ធ្ងរនៃផ្លូវដង្ហើមទៅទៀត។ លទ្ធផលនេះបានជំរុញឲ្យយើងគិតអំពីហានិភ័យនៃមេរោគផ្សិត Candida Albican ក្នុងការបង្កជំងឺនៃប្រព័ន្ធប្រសាទដូចជា Alzheimer’s, Parkinsons, និង Multiple Sclerosis ជាដើម៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក នារី និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]