រាជធានីភ្នំពេញ ៖ ស្ត្រីជាអាជីវករលក់មាសម្នាក់ ខណៈឡើងបើករថយន្តម៉ាកកាមរីបាឡែន១គ្រឿងបានបើកថយក្រោយ ប៉ុន្តែស្ត្រីអ្នកបើកបរច្រឡំដាក់លេខទៅមុខហើយជាន់ហ្គារច្រឡំស្មានថា ហ្វ្រាំងធ្វើឲ្យរថយន្តស្ទុះឡើងខឿនផ្សាររួចបោលស្ទើរហោះជ្រុលទៅបុករះទូលក់ទូរស័ព្ទបណ្ដាលឲ្យបែកបាក់ និងខូចខាតទូរស័ព្ទអស់ជាង១០០គ្រឿងជាសំណាងល្អមិនបានបណ្ដាលឲ្យអ្នកលក់ទូរស័ព្ទរងគ្រោះឡើយ ។
ប៉ុន្តែបានបង្កឲ្យបុរសម្នាក់ដែលជាកម្មករអនាម័យផ្សាររងរបួសធ្ងន់ធ្ងរដោយបាក់ជើងសងខាង និងត្រូវបានអ្នកជិតខាងព្រមទាំងនគរបាលជួយហៅរថយន្តពេទ្យនាំយកទៅសង្គ្រោះបន្ទាន់ភ្លាមៗដែរ ។
ឧប្បត្តិហេតុនេះបានកើតឡើងកាលពីវេលាម៉ោង៩ព្រឹក ថ្ងៃទី០៧ ខែមករា ឆ្នាំ២០១៩ នៅក្នុងផ្សារពិភពថ្មីកំបូលជ្រុងខាងជើង ស្ថិតនៅតាមបណ្ដោយផ្លូវជាតិលេខ៤ ក្នុងភូមិត្រពាំងគល់ សង្កត់កន្ទោក ខណ្ឌពោធិ៍សែនជ័យ ។
រថយន្តបង្កម៉ាកតូយ៉ូតាកាមរីបាឡែន ពណ៌ស្ករ ពាក់ផ្លាកលេខ ភ្នំពេញ 2AO-4731 បើកបរដោយស្ត្រីម្នាក់មិនប្រាប់អត្តសញ្ញាណប៉ុន្តែគ្រាន់តែដឹងថា ជាអាជីវករលក់មាសប៉ុណ្ណោះហើយសូម្បីអ្នកនៅជិតនោះក៏មិនបានស្គាល់ឈ្មោះដែរ ក៏មិនហ៊ានប្រាប់ពីឈ្មោះរបស់ស្ត្រីរូបនោះឡើយ ។
តាមប្រភពព័ត៌មានបានឲ្យដឹងថា នៅមុនពេលកើតហេតុរថយន្តបង្កខាងលើបានចតនៅតាមផ្លូវខាងមុខផ្សារត្រង់ចំណុចកើតហេតុក្បែរទូលក់ទូរស័ព្ទ លុះក្រោយមកស្រាប់តែស្ត្រីរូបនោះ បានឡើងទៅបើក ក្នុងបំណងបើកថយក្រោយ ។
ប៉ុន្តែខណៈនោះបានជាន់ហ្គារហើយច្រឡំស្មានថា ហ្វ្រាំង និងដាក់លេខទៅមុខច្រឡំថា ដាក់លេខថយក្រោយ ទើបធ្វើឲ្យរថយន្តស្ទុះហោះឡើងខឿនផ្សារជ្រុលទៅបុករះទូលក់ទូរស័ព្ទបណ្ដាលឲ្យរងការខូចខាតជាង១០០គ្រឿង ។
ព្រមទាំងបុកម៉ូតូមួយគ្រឿងទៀតម៉ាកហុងដាឌ្រីម សេ១២៥ ពណ៌ខ្មៅ ពាក់ផ្លាកលេខ កំពង់ចាម 1H-7416 និងបុកកិនបុរស ជាអ្នកអនាម័យផ្សារម្នាក់កំពុងបោសសំរាមបណ្តាលឲ្យបាក់ជើងសងខាងកម្រោលតែម្ដង ។
បន្ទាប់មកស្ត្រីអ្នកបើកបររថយន្តបង្កនោះបានចុះរត់គេចខ្លួនបាត់ស្រមោល ចំណែកជនរងគ្រោះត្រូវបានដឹកបញ្ជូនទៅមន្ទីរពេទ្យដើម្បីសង្គ្រោះបន្ទាន់ផងដែរ ។ ក្រោយពេលកើតហេតុនគរបាលចរាចរខណ្ឌពោធិ៍សែនជ័យបានចុះទៅពិនិត្យរាល់ការខូចខាតរួចនាំយករថយន្តទៅរក្សាទុកនៅផ្នែកជំនាញរង់ចាំម្ចាស់ចូលខ្លួនដោះស្រាយពេលក្រោយ ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]