ដេញភ្លាមៗមិនទុកយូរ ! សហព័ន្ធបាល់ទាត់ថៃ សម្រេចបណ្ដេញគ្រូបង្វឹកចោលក្រោយចាញ់ឥណ្ឌា ៤-១

ថៃ៖​ សហព័ន្ធបាល់ទាត់ថៃ បានសម្រេចបញ្ឈប់តំណែងរបស់លោក Milovan Rajevac ក្រោយពីលោកដឹកនាំក្រុមមិនបានល្អ នៅការប្រកួតដំបូងរបស់ថៃ ចាញ់ឥណ្ឌា ៤ ទល់ ១ ក្នុងព្រឹត្តិការណ៍ AFC Asian Cup ២០១៩ ។ 

តាមពិតទៅតំណែងរបស់លោកមានការរង្គោះរង្គើតាំងពីការធ្លាក់ចេញនៅវគ្គ ៤ ក្រុមចុងក្រោយក្រោមថ្វីជើងរបស់ម៉ាឡេស៊ីមកម្ល៉េះ ហើយគេក៏ជឿថាកៅអីរបស់គ្រូបង្វឹករូបនេះ ក៏នឹងត្រូវសម្រេចនៅក្នុងពានរង្វាន់ថ្នាក់ទ្វីបមួយនេះផងដែរ ។

ដោយសារបែបនេះ ទើបក្រោយពីចាញ់ឥណ្ឌានៅក្នុងការប្រកួតបើកឆាកដោយលទ្ធផល ៤-១ លោក Rajevac ត្រូវបានសហព័ន្ធបាល់ទាត់ថៃបញ្ឈប់ពីការដឹកនាំក្រុមជម្រើសជាតិភ្លាមៗ និងបានសម្រេចតែងតាំងលោក ស៊ីរីសាក់ យ៉តយ៉ាតថៃ ជាគ្រូបង្វឹកបណ្ដោះអាសន្នរហូតដល់ចប់ព្រឹត្តិការណ៍នេះតែម្តង ។

ដោយឡែកលោក សមយុទ្ធ ពុំប៉ាន់មួង ជាប្រធានសហព័ន្ធបាល់ទាត់ថៃបានចេញសេចក្តីប្រកាសមួយផងដែរ ដែលក្នុងសេចក្ដីប្រកាសនោះលោក សមយុទ្ធ បានបញ្ជាក់ថា “ថៃមានការខកចិត្តចំពោះការប្រកួតចាញ់ឥណ្ឌា ហើយនេះក៏ជាហេតុផលដែលសហព័ន្ធសម្រេចបញ្ឈប់តំណែងរបស់លោក Rajevac រួមទាំងបានបន្ថែមទៀតថា ថៃកំពុងមានទម្រង់លេងមិនល្អ ហើយគួរតែមានទម្រង់លេងមួយសាកសមសម្រាប់ក្រុម”។ 

គួរឱ្យដឹងផងដែរថា ថៃកំពុងចូលរួមក្នុងព្រឹត្តិការណ៍ AFC Asian Cup ២០១៩ ដោយស្ថិតក្នុងពូល A ជាមួយ ឥណ្ឌា បារ៉ែន និង អារ៉ាប់រួមជាម្ចាស់ផ្ទះ ។ សម្រាប់ការប្រកួតបន្ទាប់ ថៃ ត្រូវប៉ះ បារ៉ែន នៅថ្ងៃទី ១០ មុននឹងបន្តជួបម្ចាស់ផ្ទះ អារ៉ាប់ នៅថ្ងៃទី ១៤ ៕