រាជធានីភ្នំពេញ ៖ យុវតីរូបស្រស់សោភាម្នាក់មានជំងឺបាក់ទឹកចិត្តធ្ងន់ធ្ងរ ហើយធ្លាប់ត្រូវក្រុមគ្រួសារនាំទៅព្យាបាល២ដងរួចហើយ ប៉ុន្តែមិនជាសោះ រហូតធ្វើឲ្យនាងគិតខ្លីលែងចង់រស់ព្យាយាមធ្វើអត្តឃាត៣លើករួចមកហើយដែរ ប៉ុន្តែមិនសម្រេច លុះលើកទី៤ ស្រាប់តែនាងសម្ងំ ក្នុងបន្ទប់ចង.កស្លាប់តាមបំណងតែម្ដង បង្កឲ្យមានការភ្ញាក់ផ្អើលកាលពីម៉ោង៦និង១៥នាទីល្ងាច ថ្ងៃទី០៤ ខែមករា ឆ្នាំ២០១៨ ស្ថិតក្នុងផ្ទះលេខ25E បុរីប៊ុន ហួរ ភូមិថ្នល់បំបែក សង្កាត់ចោមចៅ៣ ខណ្ឌពោធិ៍សែនជ័យ ។
យុវតីរូបស្រស់ខាងលើនោះឈ្មោះ ដេត ពេជ្រចន្ទលីហ្សា អាយុ១៧ឆ្នាំ ជាសិស្សថ្នាក់ទី១២ សាលាសុវណ្ណភូមិ និងស្នាក់នៅផ្ទះកើតហេតុខាងលើ។
បើតាមលោកយាយត្រូវជាជីដូនយុវតីរងគ្រោះឈ្មោះ ប៊ុន សូរិយា អាយុ៦០ឆ្នាំ រស់នៅផ្ទះកើតហេតុ បានបំភ្លឺប្រាប់ថា ចៅស្រីរបស់គាត់មានជំងឺបាក់ទឹកចិត្តធ្ងន់ធ្ងរ (ជំងឺស្ត្រេស) ជាហេតុធ្វើឲ្យនាងចេះតែរវើ រវាយ ពិបាកចិត្តមិនសូវរីករាយនោះទេ។ មិនតែប៉ុណ្ណោះក្រុមគ្រួសារបាននាំព្យាបាលនៅសិង្ហបូរី២ដងរួចមកហើយ តែមិនជាសះស្បើយឡើយ ផ្ទុយទៅវិញជំងឺរឹតតែធ្ងន់ធ្ងរថែមទៀត។ ជាងនេះទៀតរឿងដែលគួរឲ្យខ្លាចនោះ គឺមួយរយៈចុងក្រោយនេះ នាងព្យាយាមសម្លាប់ខ្លួន ៣លើករួចមកហើយ ប៉ុន្តែមិនសម្រេចដោយគ្រួសារជួយទាន់ពេល។
ប្រភពដដែលបន្តថា ឪពុកម្ដាយនាងមិនសូវនៅក្បែរនាងទេ គាត់តែងចេញទៅក្រៅប្រទេសរហូត ហើយមុនកើតហេតុនាងនៅផ្ទះតែ២នាក់យាយប៉ុណ្ណោះ ចំណែកឪពុកម្ដាយទៅកាន់ប្រទេសអារ៉ាប់បាត់ជិត១អាទិត្យមកហើយ ។ ខណៈនោះនាងសម្ងំក្នុងបន្ទប់អត់ចេញក្រៅសោះ លុះម៉ោង៣រសៀលថ្ងៃដដែល លោកយាយឡើងទៅមើលលើជាន់ទី១ឃើញចៅស្រីកំពុងដេកជាធម្មតាក៏ចុះក្រោមវិញ។ រហូតពេលកើតហេតុមិនឃើញចៅស្រីចុះហូបបាយទឹក ទើបទៅមើលម្ដងទៀត និងស្រែកហៅ ប៉ុន្តែមិនឮនាងឆ្លើយតបសោះ គាត់ក៏រុញទ្វារបន្ទប់ចូល ស្រាប់តែធ្វើឲ្យគាត់ស្ទើរគាំងបេះដូងស្លាប់ ព្រោះឃើញចៅស្រីចង.កសម្លាប់ខ្លួនស្លាប់បាត់ទៅហើយ និងស្រែកឆោឡោបង្កការភ្ញាក់ផ្អើលដល់អ្នកជិតខាងភ្លាមៗដែរ។
តាមប្រភពពីកន្លែងកើតហេតុឲ្យដឹងថា ពេលនោះមិត្តភក្ដិទាំងប្រុសទាំងស្រីរួមថ្នាក់ជាមួយនាងនាំគ្នាទៅចូលរួមមរណទុក្ខទាំងការសោកស្តាយបំផុត និងមិននឹកស្មានថា នាងលាក់ទុកវិបត្តិក្នុងចិត្ត ហើយគិតខ្លីបែបនេះសោះ។ មិនតែប៉ុណ្ណោះដោយការតក់ស្លុតក៏មានយុវជនម្នាក់ ជាមិត្តភក្តិស្រែកទ្រហ៊ោយំបោកខ្លួនបោកប្រាណ រហូតសន្លប់បាត់ស្មារតីថែមទៀត បន្ទាប់មកយុវជននោះត្រូវពលរដ្ឋជួយបញ្ជូនទៅកាន់មន្ទីរពេទ្យភ្លាមៗផងដែរ។
ក្រោយពេលកើតហេតុកម្លាំងនគរបាលបច្ចេកទេសនៃស្នងការដ្ឋាននគរបាលរាជធានី ភ្នំពេញចុះទៅធ្វើការពិនិត្យកោសល្យវិច័យសព ហើយលទ្ធផលបញ្ជាក់ថា នាងពិតជាស្លាប់ដោយសារធ្វើអត្តឃាតចង.កសម្លាប់ខ្លួនឯងពិតមែន មិនមានជាប់ពាក់ព័ន្ធទៅនឹងអំពើឃាតកម្មនោះឡើយ បន្ទាប់មកប្រគល់ សពជូនក្រុមគ្រួសារធ្វើបុណ្យតាមប្រពៃណី ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
