ផ្លែអំពិលទុំ មិនត្រឹមអាចយកទៅប្រើប្រាស់បានច្រើនមុខទេ ថែមទាំងជាផ្លែឈើជំរុញដល់សុខភាពទៀតផង។ វាមានរសជាតិជូរអែម អាចហូបដោយផ្ទាល់ ឬ ធ្វើជាភេសជ្ជៈអំពិលទុំក៏បាន។ គេក៏ច្រើនយកវាធ្វើជាទឹកគ្រឿងជ្រលក់ជាមួយនឹងម្ហូបផ្សេងៗ ជាពិសេសត្រីអាំងតែម្តង និងជាគ្រឿងផ្សំម្ហូបសម្លមួយចំនួនទៀតផងដែរ។
អ្នកដឹងទេផ្លែអំពិលក៏ជាប្រភពនៃសារធាតុចិញ្ចឹមយ៉ាងច្រើនសំបូរបែបដែរ រាប់តាំងពី វីតាមីន សារធាតុរ៉ែ សារធាតុប្រឆាំងជាតិពុល និងសារធាតុសរសៃជាដើម។
ខាងក្រោមជាអត្ថប្រយោជន៍សុខភាពមួយចំនួនទទួលបានពីផ្លែអំពិលទុំ៖
១. ប្រឆាំងបញ្ហាហើមរលាកនៃកោសិកា
ការហើមរលាក ជាការឆ្លើយតបនៃប្រព័ន្ធភាពសុំាតាមរយៈកោសិកាឈាមស និង សារធាតុគីមីពិសេសមួយចំនួនទប់ទល់ប្រឆាំងនឹងមេរោគ ឬកត្តាខាងក្រៅផ្សេងៗ ដែលអាចបង្កហានិភ័យដល់សុខភាពនៃរាងកាយ។ ការហើមរលាកជាប្រភពឬសគល់នៃជំងឺរុំារ៉ៃជាច្រើនដូចជា ជំងឺវង្វេងវង្វាន់ ជំងឺហឺត ជំងឺមហារីកជាដើម។
របបអាហារសំបូរសារធាតុប្រឆាំងជាតិពុល Antioxidant និងសារធាតុ Polyphenol ត្រូវបានគេសិក្សារកឃើញថា ពួកវាបានចូលរួមចំណែកដល់ការកាត់បន្ថយបញ្ហាហើមរលាកនៃកោសិការុំារ៉ៃយ៉ាងសកម្ម។ ហេតុនេះយើងអាចទទួលសារធាតុទាំងពីរនេះពីផ្លែអំពិលទុំបាន។
២. ប្រឆាំងនឹងមេរោគ
ផ្លែអំពិលទុំមានផ្ទុកសារធាតុប្រឆាំងមេរោគមួយចំនួន ដែលបានចូលរួមចំណែកកំចាត់ និងកាត់បន្ថយការបង្ករោគនៃពពួកមេរោគដូចជាបាក់តេរី និង វីរុស។
ការសិក្សាដែលបានបោះពុម្ពផ្សាយក្នុង Internation Journal of Molecular Sciences បានឲ្យដឹងថា សារធាតុពិសេសម៉្យាងនៃផ្លែអំពិលបានបង្ហាញសកម្មភាពប្រឆាំងនិងកំចាត់ពពួកបាក់តេរីនៃប្រព័ន្ធរំលាយអាហារដូចជា E.Coliដែលបង្កជំងឺរលាកដំបៅក្រពះ និង Salmonella ដែលបង្កជំងឺរាគមួលរុំារ៉ៃ។
៣. ល្អសម្រាប់សុខភាពនៃបេះដូង
ជំងឺបេះដូង បាននិងកំពុងក្លាយជាបញ្ហាសុខភាពដែលមានអត្រានៃអ្នកជំងឺ១នាក់រៀងរាល់១នាទី ទូទាំងពិភពលោក។
ការស្រាវជា្រវមួយចំនួនបានរកឃើញថា ផ្លែអំពិលមានអត្ថប្រយោជន៍សម្រាប់សុខភាពនៃបេះដូង ដោយសារវាបានជួយកាត់បន្ថយកត្តាហានិភ័យដែលបង្កជំងឺបេះដូង ដូចជា សារធាតុកូលេស្តេរ៉ុល និងខ្លាញ់ជាដើម។
ការសិក្សានៃ សាកលវិទ្យាល័យDhaka នៅប្រទេសបង់ក្លាដែសបានបោះពុម្ពផ្សាយតាម Pakistan Journal of Pharmaceutical Sciences ឲ្យដឹងថា ការបរិភោគផ្លែអំពិលបានចូលរួមចំណែកកាត់បន្ថយបរិមាណនៃកូលេស្តេរ៉ុលមិនល្អគួរឲ្យកត់សម្គាល់ និងបានជួយរក្សាសម្ពាធឈាមក្នុងកម្រិតធម្មតាទៀតផង។
៤. ប្រភពនៃម៉ាញេស្យូម
ផ្លែអំពិលទុំ ជាប្រភពនៃសារធាតុរ៉ែម៉ាញេស្យូមដ៏សំខាន់ ដើរតួនាទីជាច្រើនផ្នែកដល់ការកំណត់លក្ខខណ្ឌនៃសុខភាព។ សារធាតុរ៉ែមួយប្រភេទនេះអាចចូលរួមចំណែកដល់ដំណើរការនៃការបង្កើតជាលិកាឆ្អឹង ត្រួតពិនិត្យចង្វាក់បេះដូង ជំរុញដល់ការកន្ត្រាក់សាច់ដុំ និងរក្សាកម្រិតជាតិស្ករជាដើម។
ដូច្នេះបំពេញរបបអាហារ ជាមួយផ្លែអំពិលទុំដើម្បីសុខភាពរាងកាយរបស់លោកអ្នក៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក នារី និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]