ខេត្តកំពង់ស្ពឺ ៖ យ៉ាងហោចណាស់មនុស្ស៥នាក់បានរងរបួសធ្ងន់ស្រាល បន្ទាប់ពីជួបហេតុការណ៍រថយន្តបុករះបន្តគ្នា៣គ្រឿងនៅជិតដូនម៉ៅពេជនិល ។ ហេតុការណ៍រថយន្តបុកគ្នា៣គ្រឿងនេះកើតឡើង កាលពីវេលាម៉ោង១៤និង១០នាទីថ្ងៃទី០៥ ខែមករា ២០១៩ លើផ្លូវជាតិលេខ៤ ចន្លោះគីឡូម៉ែត្រ១០៦.១០៧ ចំណុចអូរគគី ភូមិទី៦ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ ។
តាមការអោយដឹងពីសមត្ថកិច្ចស្រុកភ្នំស្រួចដែលស្រង់សំដីសាក្សីបានអោយដឹងថា មុនពេលកើតហេតុមានរថយន្ត១គ្រឿង ម៉ាកហីយន់ដាយ ពណ៌ស ពាក់ស្លាកលេខ ព្រះសីហនុ 3A- 6760 បើកបរដោយឈ្មោះ ឡាយ សុភាន់ ភេទប្រុស អាយុ២៥ឆ្នាំ មានទីលំនៅភូមិជើងឆ្នុក ឃុំតាំងក្រាំង ស្រុកបាធាយ ខេត្តកំពង់ចាម ដែលខូចចតទុកលើថ្នល់កៅស៊ូខាងស្តាំដៃក្បាលទៅទិសខាងលិច ។
ស្រាប់តែមានរថយន្តមួយគ្រឿងទៀតម៉ាកហ្វ៊ុយសូ ពណ៌ស ពាក់ស្លាកលេខព្រះសីហនុ3A- 1122 កន្ទុយរ៉ឺម៉កស្លាកលេខព្រះសីហនុ 4A- 1237 មកពីទិសខាងកើតទៅទិសខាងលិចមកដល់ចំណុចខាងលើបានបុកគូថរថយន្តម៉ាកហ៊ីយាន់ដាយ ពណ៌ស ពាក់ស្លាកលេខព្រះសីហនុ3A- 6760 ដែលបើកបរដោយឈ្មោះ ឡាយ សុភាន់ យ៉ាងពេញទំហឹង បណ្តាលអោយរថយន្តម៉ាកហ្វុយសូនេះក៏ជ្រុលចង្កូតរេមកគន្លងផ្លូវខាងឆ្វេងដៃ ហើយបន្តទៅបុកជាមួយរថយន្តមួយគ្រឿងទៀតម៉ាកស៊ីណា ពណ៌ស ពាក់ស្លាកលេខព្រះសីហនុ 2C- 8818បើកបរដោយឈ្មោះ សុខ លៀប ភេទប្រុស អាយុ៣៣ឆ្នាំ មានទីលំនៅខេត្តព្រះសីហនុដែលកំពុងធ្វើដំណើរពីទិសខាងលិចទៅទិសខាងកើត បណ្តាលអោយ អ្នកបើកបររថយន្តម៉ាកស៊ីណារងរបួសស្រាល និងអ្នកជិះមាន ១- ឈ្មោះ Su Hang ភេទប្រុស អាយុ២៧ឆ្នាំ ជាជនជាតិចិន រងរបួសធ្ងន់ ។
២ ឈ្មោះ ហង់ សារិទ្ធ ភេទប្រុស អាយុ៥១ឆ្នាំ មានទីលំនៅភូមិទន្លាប់ ឃុំទន្លាប់ ស្រុកត្បូងឃ្មុំ ខេត្តត្បូងឃ្មុំរងរបួសធ្ងន់ ។ ៣- ឈ្មោះ អូន រ៉ូ ភេទប្រុស អាយុ៤០ឆ្នាំ មានទីលំនៅភូមិបេង ឃុំថ្មពូន ស្រុកកញ្ជ្រៀច ខេត្តព្រៃវែង របួសធ្ងន់ ។៤- ឈ្មោះសុខ សុវ៉ាន់ ភេទប្រុស អាយុ២៣ឆ្នាំមានទីលំនៅភូមិ២ សង្កាត់៤ ក្រុងព្រះសីហនុ ខេត្តព្រះសីហនុរងរបួសធ្ងន់។ ក្រោយបង្កអ្នកបើកបររថយន្តម៉ាកហ្វ៊ុយសូបានចុះរត់គេចខ្លួនបាត់ តែត្រូវបានគេស្គាល់ថា មានឈ្មោះ ស ចាន់ធី ជាអ្នកបើកបរអោយក្រុមហ៊ុន HLH ។
បន្ទាប់ពីកើតហេតុសមត្ថកិច្ចបានធ្វើការកំណត់ហេតុ និងធ្វើការវាស់វែង ចំពោះរថយន្តដែលខូចខាតមានចំនួន៣គ្រឿងធ្ងន់១ ស្រាល២ រថយន្ត(ម៉ាកស៊ីណារងការខូចខាតធ្ងន់ ) រថយន្តម៉ាកហ្វ៊ុយសូ និងរថយន្តម៉ាកហ៊ីយាន់ដាយរងការខូចខាតស្រាល ។
ករណីនេះសមត្ថកិច្ចបាននាំយកវត្ថុតាង ទៅរក្សាទុករង់ចាំអោយភាគីទាំងអស់ដោះស្រាយគ្នានៅពេលក្រោយ ។ សមត្ថកិច្ចបានលើកឡើងថា ទើបតែស្ទូចករណីចាស់រួចហើយថ្មីៗមកបុកគ្នាបន្ត៣គ្រឿងទៀតទាល់តែបានកន្លែងកើតហេតុនៅសល់តែ៣០ម៉ែត្រទៀតប៉ុណ្ណោះ គឺចូលទៅដីព្រះសីហនុបាត់ទៅហើយ ។ ដោយមានការលើកឡើងថា ដើមឆ្នាំ២០១៩នេះ តំបន់ដែលគ្រប់គ្រងដោយយាយម៉ៅ (ជ្រោះពេជនិល) ពិតជាកាចខ្លាំងណាស់ ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]