ខេត្តសៀមរាប ៖ ប៉ូលិសក្រុងសៀមរាបដោយមានការសង្ស័យពីប្រជាពលរដ្ឋក៏បានធ្វើការនាំខ្លួនសង្ឃក្លែងក្លាយចំនួន២នាក់ ខណៈកំពុងដើរបិណ្ឌបាតនៅក្នុងផ្សារប្រគល់ឱ្យសមត្ថកិច្ចយកមកកាន់វត្តទេពពោធិវង្ស ហៅវត្តថ្មី ហៅវត្តក្បាលខ្មោច ដើម្បីឱ្យព្រះសង្ឃ ឡាច លាង ព្រះអនុគុណក្រុងសៀមរាប ត្រូវជាចៅអធិការវត្តនោះដែរ ហើយចៅអធិការវត្តក៏សម្រេចឱ្យសឹករួចប្រគល់ឱ្យសមត្ថកិច្ចបន្តទៅចាត់ការតាមផ្លូវច្បាប់ ។
ហេតុការឃាត់ខ្លួនសង្ឃក្លែងក្លាយនោះមានធ្វើឡើងនាវេលាម៉ោង១៥និង៣០នាទីសៀលថ្ងៃទី៤ខែមករា ឆ្នាំ២០១៩ ស្ថិតនៅចំណុចក្នុងផ្សារសម្តេចតេជោដើមក្រឡាញ់ក្នុងភូមិត្រពាំងសេះ សង្កាត់គោកចក ក្រុងសៀមរាប ។
បើតាមសមត្ថកិច្ចនគរបាលក្រុងបានប្រាប់ថា ដោយមានការសង្ស័យពីប្រជាពលរដ្ឋថា មានសង្ឃក្លែងក្លាយចំនួន២នាក់ដើរបិណ្ឌបាត្រក្នុងផ្សារសម្តេចតេជោដើមក្រឡាញ់ក្នុងភូមិត្រពាំងសេះ សង្កាត់គោកចក ក្រុងសៀមរាប និងដោយមានការបញ្ជាពីលោកស្នងការនគរបាលខេត្តផងទើបកម្លាំងជំនាញបានចុះឃាត់ខ្លួននៅចំណុចក្នុងផ្សារសម្តេចតេជោដើមក្រឡាញ់ក្នុងភូមិត្រពាំងសេះ សង្កាត់គោកចក ក្រុងសៀមរាប ខេត្តសៀមរាប រួចយកមកកាន់វត្តទេពពោធិវង្ស ហៅ វត្តថ្មី ហៅវត្តក្បាលខ្មោច ដើម្បីឱ្យព្រះសង្ឃ ឡាច លាង ព្រះអនុគុណក្រុងសៀមរាប ត្រូវជាចៅអធិការវត្ត នោះដែរហើយចៅអធិការវត្តក៏សម្រេចឱ្យសឹករួចប្រគល់ឱ្យសមត្ថកិច្ចបន្តយកទៅចាត់ការតាមផ្លូវច្បាប់ ។
ប្រភពបានបញ្ជាក់ទៀតថា សង្ឃក្លែងក្លាយទាំង២នាក់មានទី១-ឈ្មោះ ឈៅ ស្រីរ័ត្ន ហៅញ៉ាញ់ អាយុ៣២ឆ្នាំ មានស្រុកកំណើតភូមិឬស្សីស្រុក ឃុំញ៉ែងញ៉ង ស្រុកត្រាំកក់ ខេត្តតាកែវ និងទី២-ឈ្មោះ អឿ វត្ថា ហៅយ៉ា អាយុ២៨ឆ្នាំ មានស្រុកកំណើតភូមិផ្ទះខ្ពស់ ឃុំតុងរ៉ុង ស្រុកព្រៃឈរ ខេត្តកំពង់ចាម ។
សូមបញ្ជាក់បន្ថែមថា បច្ចុប្បន្នសង្ឃក្លែងក្លាយទាំង២រស់នៅភូមិខ្វាវ ឃុំត្បែង ស្រុកបន្ទាយស្រី ខេត្តសៀមរាប ។ ក្រោយពីឃាត់ខ្លួនសង្ឃក្លែងក្លាយទាំង២នាក់ត្រូវបានព្រះអនុគណក្រុងសៀមរាប ឡាច លាង បានធ្វើពិធីផ្សឹករួចប្រគល់ឱ្យសមត្ថកិច្ចចាត់ការទៅតាមផ្លូវច្បាប់ ហើយពួកគេបានសារភាពនៅចំពោះមុខសមត្ថកិច្ចក្រុងថា ពួកគេទាំង២នាក់ពិតជាបានប្រព្រឹត្តខុសពីសាសនាព្រះពុទ្ធដែលជាសាសនារដ្ឋ នៃព្រះរាជាណាចក្រកម្ពុជាពិតប្រាកដមែន ដូច្នេះសូមបងប្អូនកុំយកគំរូតាមពួកខ្ញុំ ។
បច្ចុប្បន្នជនសង្ស័យដែលជាសង្ឃក្លែងក្លាយទាំង២នាក់ត្រូវបានកម្លាំងជំនាញរៀបចំកសាងសំណុះរឿងបញ្ជូនទៅតុលាការខេត្តដើម្បីចាត់ការទៅតាមនីតិវិធី ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]