រាជធានីភ្នំពេញ ៖ សេចក្តីរាយការណ៍ឱ្យដឹងថា រថយន្តស៊េរីទំនើបម៉ាកCHEVROLET ថ្មីសន្លាង១គ្រឿងដែលទើបទម្លាក់ចេញពីទូកុងតឺន័រ ហើយត្រូវអ្នកលក់បើកចេញពីផែស្ងួតមួយកន្លែង ត្រៀមយកទៅប្រគល់ឲ្យអតិថិជនដែលកុម្ម៉ង់ទិញនោះ ស្រាប់តែត្រូវបានរថយន្តធុនធំដឹកកុងតឺន័រ១គ្រឿង ដែលបើកបរក្នុងទិសដៅស្របគ្នាប៉ះ បណ្ដាលឲ្យរងការខូចខាតយ៉ាងដំណំ ដែលហេតុការណ៍នេះ កើតឡើងកាលពីវេលាម៉ោង៥ និង១៥នាទីល្ងាចថ្ងៃទី៣ មករា ឆ្នាំ២០១៩ នៅលើកំណាត់ផ្លូវរង្វង់មូលថ្នល់បំបែកចោមចៅ ក្នុងភូមិព្រៃជីសាក់ សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ។
សេចក្តីរាយការណ៍បន្តថា រថយន្តដែលរងការខូចខាតនោះ ម៉ាកCHEVROLET ពណ៌ក្រហម ស៊េរីឆ្នាំ២០១៥ គ្មានស្លាកលេខ ។ រថយន្តនេះ បានរងការខូចខាតផ្នែកខាងក្រោយចំហៀងខាងឆ្វេងយ៉ាងដំណំ ។ ដោយឡែក រថយន្តបង្កដឹកកុងតឺន័រ ពណ៌ខៀវ ពាក់ស្លាកលេខភ្នំពេញ3B-5144ជា រថយន្តរបស់ក្រុមហ៊ុនផែស្ងួតសុកន ហើយអ្នកបើកបររថយន្តទាំង២គ្រឿងនេះ មិនត្រូវបានស្គាល់ឈ្មោះឡើយ។ ហេតុការណ៍នេះ បានធ្វើឲ្យអ្នកកុម្ម៉ង់ទិញដែលរង់ចាំយូរ ឡើងខកចិត្តមិនតិចទេ និងមិនដឹងថា ក្រោយការជួសជុលរួចអ្នកកុម្ម៉ង់ទិញព្រមទទួលយករថយន្តនេះទៅប្រើប្រាស់ឬអត់នោះឡើយ ។
មិនតែប៉ុណ្ណោះ បានធ្វើឱ្យអ្នកលក់រថយន្តស៊េរីទំនើបខាងលើ ហួសចិត្តរកនិយាយមិនចេញឡើយ ព្រោះតែអ្នកបើករថយន្តកុងតឺន័រនោះ ខ្វះការប្រុងប្រយ័ត្នមកបុកទាំងកម្រោលបែបនេះ ហើយក៏បានទាមទារសំណងថ្លៃការខូចខាតចំនួន៤ពាន់ដុល្លារអាមេរិកប៉ុន្តែក្រោយមកសម្រួលត្រូវគ្នាត្រឹម៣ពាន់ដុល្លារ។
ប្រភពបន្តថា ក្រោយពេលកើតហេតុ ភាគីទាំង២បានធ្វើការសម្របសម្រួលគ្នា ដោយខាងម្ចាស់រថយន្តCHEVROLETទាមទារសំណងចំនួន៤ពាន់ដុល្លារ ហើយក្រោយពីចរចាគ្នាច្រើនម៉ោង រួចមកបានត្រូវរ៉ូវត្រឹម៣ពាន់ដុល្លារ ជាការបញ្ចប់រឿង។
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]