ខេត្តកំពង់ស្ពឺ៖ បក្ខពួកក្រុមឆបោកលក្ខណៈប្រព័ន្ធរបៀបចងការប្រាក់ពីអ្នកមានលុយ (ចងការប្រាក់) ក្នុងចំណោមច្រើននាក់ត្រូវបានឃាត់ខ្លួន បន្ទាប់ពីទទទួលបណ្តឹងពីជនរងគ្រោះរួចមក ។
ការឃាត់ខ្លួននេះធ្វើឡើងនៅរសៀលថ្ងៃទី១ មករា នេះ នៅភូមិអណ្ដូង ឃុំត្រពាំងគង ស្រុកសំរោងទងខេត្តកំពង់ស្ពឺ ។
ប្រភពបានអោយដឹងថា កម្លាំងនគរបាលជំនាញព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្ដកំពង់ស្ពឺ បានបើកប្រតិបត្ដិការស៊ើបអង្កេតស្រាវជ្រាវ តាមបណ្ដឹងរបស់ជនរងគ្រោះ និងបានធ្វើការឃាត់ខ្លួនមុខសញ្ញាសង្ស័យពាក់ព័ន្ធចំនួន០២នាក់ជាបន្តបន្ទាប់ ។
ជនសង្ស័យរួមមាន១- ឈ្មោះ ម៉ា រ័ត្នមុន្នី ភេទស្រី អាយុ៣៧ឆ្នាំ រស់នៅផ្ទះលេខ84E1 ផ្លូវលេខ១៤១ ក្រុមទី៦ សង្កាត់បឹងព្រលិត ខណ្ឌ៧មករា រាជធានីភ្នំពេញ ដើរតួរជាអ្នកខ្ចីប្រាក់ (កូនបំណុល) ២-ឈ្មោះ ស៊ុន សុភា ភេទប្រុស អាយុ២៩ឆ្នាំ រស់នៅភូមិអណ្ដូង ឃុំត្រពាំងគង ស្រុកសំរោងទង ខេត្តកំពង់ស្ពឺ ដើរតួរជាអ្នកសម្របសម្រួលលើការរកអ្នកមានប្រាក់ (ជំនួយការផ្នែកច្បាប់ និងធានាផ្នែកហិរញ្ញវត្ថុ) ចំណែកបក្ខពួកមួយចំនួនទៀតដែលរត់គេចខ្លួនសមត្ថកិច្ចកំពុងតាមស្វែងរកចាប់ខ្លួនបន្ត ។
បើតាមប្រភពពីសមត្ថកិច្ចជំនាញបានបង្ហើបថា« ដំបូងនោះ គឺក្រុមជនសង្ស័យដើរតួស្វែងរកអ្នកមានប្រាក់ ដែលប្រកបមុខរបររកស៊ីចងការប្រាក់ ហើយបន្ទាប់មកពួកគេផ្ដល់លេខទូរស័ព្ទអោយទៅអ្នកផ្សេង ដែលជាបក្ខពួកដើរតួរចង់ខ្ចីប្រាក់ ។ បន្ទាប់មកគេរៀបផែនការដោយអោយអ្នកផ្សេងទៀតទូរស័ព្ទរកអ្នកចងការប្រាក់ (ម្ចាស់បណ្តឹង) ដោយប្រាប់ថាចង់ខ្ចីប្រាក់ បង់ផ្ដាច់នៅធនាគារឯកជន ហើយចំពោះការខ្ចី គឺមិនយូរនោះទេ ហើយការខ្ចី គឺគេខ្ចីរយៈពេលខ្លីនិងផ្ដល់ការប្រាក់ខ្ពស់ទៀតផង» ។
ដោយលង់នឹងល្បិចរបស់ក្រុមជនឆបោកម្ចាស់លុយក៏ព្រមប្រគល់លុយទៅតាមចំនួនដែលបាននិយាយគ្នាទៅអោយក្រុមជនសង្ស័យ ។ អ្វីដែលម្ចាស់លុយជឿស្លុងមែនទែន គឺបន្ទាប់ពីបានប្រាក់ពីម្ចាស់បំណុលរួច ក្រុមជនសង្ស័យបានណាត់ថា នៅពេលខាងធនាគារហៅ គឺគេ និងនាំម្ចាស់បំណុលទៅបើកប្រាក់ផ្ទាល់តែម្ដង កុំអោយពិបាកយកមកសងដល់ផ្ទះ។
ក្រោយមកពេលដល់ថៃ្ងណាត់ គឺគេបាននាំម្ចាស់បំណុលទៅដល់ធនាគារឯកជនណាមួយមែនលុះពេលទៅដល់ពួកគេប្រើល្បិចមួយទៀត គឺភ្លេចយកអត្ដសញ្ញាណប័ណ្ណពេលនោះជនសង្ស័យ (ឈ្មោះ ម៉ា រ័ត្នមុន្នី) សុំថា ទៅយកឯកសារនៅផ្ទះរួចក៏គេចខ្លួនរហូត ។
បើតាមការរៀបរាប់របស់ម្ចាស់លុយ (លាក់អត្តសញ្ញាណ) គឺម្ចាស់មុនពេលឲ្យប្រាក់ខ្ចីបានមើលឯកសារដែរ តែក្រុមជនសង្ស័យ (កូនបំណុល) ជំពាក់ខាងធនាគារមួយណា ហើយលុយដែលនៅសល់មានប៉ុន្មានជាក់ស្ដែង តែឯកសារដែលគេយកមកបង្ហាញនោះ គឺជាឯកសារក្លែងក្លាយទាំងអស់ ។
តាមចម្លើយសារភាពឯកសារក្លែងទាំងនោះ គឺរៀបចំដោយឈ្មោះ ស៊ុន សុភា តែម្ដង ។ សមត្ថកិច្ចបានសំណូមពរដល់បងប្អូនប្រជាពលរដ្ឋដែលមានមុខរបររកស៊ីចងការប្រាក់លក្ខណៈឯកជន សូមមេត្ដាពិនិត្យមើលមនុស្ស និងឯកសារអោយបានជាក់លាក់មុន និងផ្ដល់ប្រាក់ជូនព្រោះបច្ចប្បន្នក្រុមនេះមានបណ្ដាញ និងមេក្លោងជាអ្នកមានអំណាចខ្លាំង នៅពីក្រោយខ្នងពិសេសករណីមានគេឃាត់ខ្លួន ឬចាប់ គឺពួកគេមិនព្រមឆ្លើយដាក់មេក្លោងជាដាច់ខាត និយាយរួមខ្លាំងជាងមេចោរប្លន់ទៅទៀត ដោយពួកគេត្រូវបានមេក្លោងបញ្ចេះថា ជារឿងកិច្ចសន្យាមិនមែនរឿងព្រហ្មទណ្ឌនោះទេទោសមិនជាប់ពន្ធនាគារ គេត្រឹមតែសងប្រាក់ទៅដើមបណ្ដឹងវិញ តាមលទ្ធភាពតែប៉ុណ្ណោះចំណុចនេះហើយដែលគេចាញ់បោកការញុះញង់ និងធានាពីមេរបស់គេ ។
លោកវរសេនីយ៍ឯក សម សាក់ នាយការិយាល័យព្រហ្មទណ្ឌកម្រិតធ្ងន់បានបញ្ជាក់ថា ក្រុមនេះនៅមានបក្ខពួកមួយចំនួនទៀតដែលខាងជំនាញកំពុងតែបន្ដនីតិវិធីស្រាវជ្រាវ ដើម្បីធ្វើការឃាត់ខ្លួនយកមកកាន់ស្នងការដ្ឋាននគរបាលខេត្ដ ដើម្បីចាត់ការបន្ត ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
