ប្រហែលគាត់កុនខ្លាំង! ពីឡុតសម្រេចចិត្តចុះចតយន្តហោះលើផ្លូវហាយវេ បន្ទាប់មកទៀតរកកន្លែងបត់ជើងតូច (មានវីដេអូ)

អាមេរិក៖ នេះជាថ្ងៃដំបូងដែលសិស្សឯកទេសបើកបរយន្តហោះម្នាក់ និងពីឡុតដែលជាគ្រូរបស់គេ ចាប់ផ្តើមបើកបរយន្តហោះធុនតូចមួយ ដើម្បីសិក្សាពីទ្រឹស្តី និងការអនុវត្តជាក់ស្តែងបន្ថែម។ 

ក្នុងអំឡុងពេលហោះហើរ យន្តហោះដែលគ្រូសិស្សទាំងពីរកំពុងបើក  មានភាពរអាក់រអួលខុសប្រក្រតីជាខ្លាំង បណ្តាលឲ្យពួកគេទាំងពីរសម្រេចចិត្តចុះចតយន្តហោះភ្លាមៗលើផ្លូវហាយវេមួយកន្លែងស្ថិតក្នុងរដ្ឋ Alabama។ នេះយោងតាមសារព័ត៌មាន Dailymail ចេញផ្សាយថ្ងៃទី២៤ ខែធ្នូ ឆ្នាំ២០១៨។

គួរបញ្ជាក់ថា យន្តហោះធុនតូចមួយគ្រឿងទើបហោះចេញពីអាកាសយានដ្ឋាន Talladega Municipal មិនទាន់បាន៨គីឡូម៉ែត្រស្រួលបួលផង ស្រាប់តែម៉ាស៊ីនមេរបស់វាមានភាពមិនប្រក្រតីមិនដឹងពីមូលហេតុ។ ដោយសារហេតុនេះហើយទើប ពីឡុតទាំងពីរសម្រេចចិត្តជ្រែកផ្លូវហាយវេចុះចតភ្លាមៗតែម្តង។

ហេតុការណ៍នេះបានធ្វើឲ្យអ្នកដំណើរនៅទីនោះភ្ញាក់ផ្អើលយ៉ាងខ្លាំង។  រំពេចនោះ គ្រួសារមួយដែលជិះឡានលើផ្លូវហាយវេខាងលើ បានឃើញទិដ្ឋភាពផ្ទាល់ ក៏បានទាញទូរស័ព្ទថតយកសកម្មភាពរបស់ពីឡុតទាំងពីរ។ ក្នុងវីដេអូឃ្លីបនោះទៀតសោត ឃើញលោកពីឡុតជាគ្រូដើរលើវាលស្មៅក្បែរដងផ្លូវទៅបត់ជើងតូចយ៉ាងរំភើយផងដែរ។

យោងតាមសារព័ត៌មានដដែលបានឱ្យដឹងថា បុរសឈ្មោះ Jim Williams គឺជាគ្រូបង្រៀនបើកបរយន្តហោះខាងលើ ហើយក៏ជាពីឡុតម្នាក់ដែលមានបទពិសោធន៍បើកបរយន្តហោះអស់រយៈពេល៣៦ឆ្នាំមកហើយដែរ។ 

យោងតាមប្រសាសន៍របស់ពីឡុត Jim បានឲ្យដឹងថា ក្នុងអំឡុងពេលនោះ "ខ្ញុំពិតជាអស់ជម្រើសហើយ។ ខ្ញុំបានហោះទៅជម្រាលផ្លូវខាងឆ្វេងដៃ ដើម្បីរកកន្លែងទីទួលមានសុវត្ថិភាពក្នុងការចុះចតយន្តហោះនេះ" ៕  

មានវីដេអូនៅខាងក្រោម៖

• ទីកន្លែង
• វីដេអូ