រាជធានីភ្នំពេញ ៖ អ្នកគ្រូបង្រៀននៅសាលាឯកជនមួយបានជិះម៉ូតូម៉ាកហុងដាស្កុបពីមួយគ្រឿង ប្រញាប់ចូលទៅបង្រៀនសិស្ស ប៉ុន្តែជាអកុសលបានជួបគ្រោះថ្នាក់ចរាចរណ៍ដោយបានជ្រុលទៅបុកពីក្រោយម៉ូតូម៉ាកហុងដាធូដេ១គ្រឿងទៀត ដែលជិះដោយក្មេងស្រី២នាក់ ដែលជាសិស្សសាលាជម្ពូវ័ន បណ្តាលឲ្យម៉ូតូអ្នកគ្រូរូបនោះដួលបោកទៅលើថ្នល់រងរបួសសន្លប់ស្តូកស្ដឹងខ្លួន ។
ហេតុការណ៍នោះបានកើតឡើងកាលពីវេលាម៉ោង៧និង១៥នាទីព្រឹកថ្ងៃទី១៣ ខែធ្នូ ឆ្នាំ២០១៨ នៅតាមផ្លូវវេងស្រេង ត្រង់ចំណុចកែងផ្លូវចូលភូមិព្រៃល្វា ស្ថិតនៅក្នុងភូមិជ្រៃកោង សង្កាត់ចោមចៅ២ ខណ្ឌពោធិសែនជ័យ រាជធានីភ្នំពេញ ។
តាមប្រភពព័ត៌មានបានឲ្យដឹងថា អ្នកគ្រូខាងលើមិនត្រូវបានស្គាល់អត្តសញ្ញានោះទេ គាត់បង្រៀននៅសាលាឯកជនមួយ សាខាជ្រៃកោង ក្បែរកន្លែងកើតហេតុនោះ និងបានសន្លប់ស្ដូកតែម្ដង ។ ចំណែកសិស្សស្រីរៀននៅសាលាជម្ពូវ័នទាំង២នាក់ដែលរងរបួសស្រាលនោះក៏មិនត្រូវបានស្គាល់ឈ្មោះដែរ ។
នៅមុនពេលកើតហេតុអ្នកគ្រូបានជិះម៉ូតូមួយគ្រឿងម៉ាកហុងដាស្កុបពី ពណ៌ស ពាក់ស្លាកលេខភ្នំពេញ 1CT -5270 ។ បើកបរធ្វើដំណើរក្នុងទិសដៅពីកើតទៅលិច ។ ចំណែកក្មេងស្រីទាំង២នាក់ជិះមូតូម៉ាកហុងដាធូដេ ពណ៌ស្លែរ គ្មានស្លាកលេខ ក្នុងទិសដៅស្របគ្នា ។ ប្រភពដដែលបានបន្តថា លុះពេលទៅដល់ត្រង់ចំណុចកើតហេតុអ្នកគ្រូបានបត់ឆ្លងផ្លូវជ្រុលទៅបុកពីក្រោយម៉ូតូធូដេ បណ្ដាលឲ្យដួលទាំងអស់គ្នា ហើយអ្នកគ្រូរងរបួសធ្ងន់ ចំណែកសិស្សរងរបួសស្រាល ។
ក្រោយពេលកើតហេតុអ្នកគ្រូម្នាក់នោះត្រូវបានលោកគ្រូអ្នកគ្រូរួមសាលាដឹកទៅកាន់មន្ទីពហុព្យាបាលឡាំប៊ុនថន ដើម្បីសង្គ្រោះ ចំណែកក្មេងស្រីសិស្សសាលាទាំង២នាក់របួសស្រាល និងបន្តដំណើរចូលសាលារៀនបាត់ស្រមោល ។ បន្ទាប់មកនគរបាលចរាចរណ៍ខណ្ឌពោធិ៍សែនជ័យបានចុះទៅវាស់វែង និងនាំយកម៉ូតូទាំង២គ្រឿងទៅរក្សាទុករង់ចាំដោះស្រាយតាមច្បាប់ ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]