ខេត្តសៀមរាប ៖ នាវេលាម៉ោង០៣និង០០នាទីរសៀល ថ្ងៃទី១០ ខែធ្នូ ឆ្នាំ២០១៨ កម្លាំងការិយាល័យស៊ើបអង្កេតនិងអនុវត្តនីតិវិធីបានបញ្ជូនជនសង្ស័យជាជនជាតិចិនចំនួន០៩នាក់ដែលសមត្ថកិច្ចបានឃាត់ខ្លួនកាលពីថ្ងៃទី០៨ ខែធ្នូ ឆ្នាំ២០១៨ ទៅសាលាដំបូងខេត្តសៀមរាបហើយត្រូវបានលោកស្រី គឹម សុគន្ធា ចៅក្រមស៊ើបសួរនៃសាលាដំបូងខេត្តសៀមរាបសម្រេចឃុំខ្លួនបណ្តោះអាសន្ននៅពន្ធនាគារខេត្តសៀមរាបនាល្ងាចថ្ងៃទី១០ ខែធ្នូ ឆ្នាំ២០១៨ នេះដោយចោទប្រកាន់ពីបទ«ចែកចាយរូបភាព និងសម្ភារអាសអាភាសនៃកុមារតាមប្រព័ន្ធអ៊ិនធើណែត» ។
លោកឧត្តមសេនីយ៍ត្រី ជា គឹមសាន ស្នងការរងទទួលផែនការងារអន្តោប្រវេសន៍នៃស្នងការនគរបាលខេត្តបានប្រាប់ថា ដោយមានការចូលរួមសហការល្អពីកម្លាំងនគរបាលចម្រុះនៃស្នងការនគរបាលខេត្តសៀមរាបក៏ដូចកម្លាំងតាមមូលដ្ឋានក្រោមការដឹកនាំសម្របសម្រួលនីតិវិធីដោយលោក ជួន សុបញ្ញា ព្រះរាជអាជ្ញារងអមសាលាដំបូងខេត្តសៀមរាបបានធ្វើការចុះបង្ក្រាបនៅទីតាំងចែកចាយរូបភាព និងសម្ភារអាសអាភាសនៃកុមារតាមប្រព័ន្ធអ៊ិនធើណែតចំនួន៣ទីតាំងផ្សេងគ្នាក្នុងក្រុងសៀមរាបឈានដល់ធ្វើការឃាត់ខ្លួនបានជនជាតិចិនចំនួន៩នាក់រួចនាំយកមកសួរនៅការិយាល័យជំនាញដើម្បីរៀបចំកសាងសំណុំរឿងបញ្ជូនបន្តទៅតុលាការខេត្ត ។
លោកបានបញ្ជាក់ថា ក្រុមនេះរកស៊ីចែកចាយវីដេអូអាសអាភាសទៅឱ្យភ្ញៀវជាជនជាតិចិននៅប្រទេសចិនតាមរយៈប្រព័ន្ធវីឆាត ហើយវីដេអូរខ្លះសម្តែងដោយមនុស្សពេញវ័យ និងវីដេអូរខ្លះសម្តែងដោយកុមារ ជនជាតិចិន ទាំងអស់ដែលផលិតនៅប្រទេសចិនមិនមែនសម្តែងដោយកុមារកម្ពុជា ឬផលិតនៅប្រទេសកម្ពុជាយើងទេ ប៉ុន្តែក្រុមនេះគ្រាន់ជាអ្នកចែកចាយបន្តតែប៉ុណ្ណោះ ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
