ខេត្តកំពង់ឆ្នាំង ៖ ប្រភពពីសមត្ថកិច្ចឱ្យដឹងថា មានករណីផ្ទុះអាវុធប្លន់ដ៏ចម្លែកមួយកើតឡើង នៅក្នុងស្រុកបរិបូរណ៌ ដោយសារតែក្រុមចោរប្រដាប់អាវុធទាំងនោះមកសួរម្ចាស់ផ្ទះឱ្យរកគោបា តែក៏មិនមែនជាគោបាធម្មតាទៀត គឺគោបាវេទមន្ត (ក្នុងអំពើមន្តអាគម) កាលពីវេលាវេលាម៉ោង០៩ និង២០នាទីយប់ថ្ងៃទី១០ ធ្នូ ភូមិដំរីកូន ឃុំអញ្ចាញរូង ស្រុកបរិបូណ៌ ។ ក្នុងករណីប្លន់នេះ បណ្ដាលឱ្យយុវជនម្នាក់រងរបួសដោយគ្រាប់ត្រូវចំភ្លៅខាងឆ្វេង១គ្រាប់ ខណៈចូលទៅជួយ ។
បើតាមជនរងគ្រោះកំពុងសម្រាកព្យាបាលរបួស នៅមន្ទីរពេទ្យបានប្រាប់សមត្ថកិច្ចថា ខ្លួនឈ្មោះ វ៉ាត់ សុខសាន្ត អាយុ២៧ឆ្នាំ មានទីលំនៅភូមិ-ឃុំខាងលើ ។ គាត់បន្តថា នៅមុនពេលកើតហេតុ រូបគេនិងជាមួយប្រជាការពារម្នាក់ទៀត កំពុងតែអង្គុយជុំគ្នានៅចម្ងាយប្រមាណ២០០ម៉ែត្រ ពីកន្លែងកើតហេតុ ។ ពេលនោះ ក៏បានឮតាមវិទ្យុទាក់ទងថា មានករណីប្លន់ប្រដាប់អាវុធនៅផ្ទះឯឈ្មោះស៊ុយ គឹម ។ ភ្លាមនោះ រូបគេនិងប្រជាការពារបានស្ទុះទៅកន្លែងកើតហេតុ ក្នុងគោលបំណងទៅជួយជនរងគ្រោះ ។ ពេលទៅមិនទាន់ដល់ផង ក៏ត្រូវជនល្មើសបាញ់ជាច្រើនគ្រាប់ស្រោចមក ក៏ត្រូវចំភ្លៅខាងឆ្វេង ។
ជាមួយគ្នានេះដែរ ម្ដាយជនរងគ្រោះក៏បានឱ្យដឹងដែរថា រូបគាត់អត់បាននៅកន្លែងកើតហេតុនោះទេ គឺទៅចូលរួមក្នុងពិធីបុណ្យនៅក្នុងវត្តដំរីកូន ហៅវត្តថ្មី ប៉ុន្តែក្រោយពេលកើតហេតុគាត់បានមកដល់បានដឹងថាមានចោរច្រើននាក់ បានទៅប្លន់ផ្ទះឈ្មោះស៊ុយ គឹម ប៉ុន្តែមិនយកបានយកទ្រព្យសម្បត្តិអ្វីនោះទេ ដោយសារតែផ្អើលដល់ប្រជាពលរដ្ឋ និងប្រជាការពារទៅចូលជួយ ។ ទោះបីជាយ៉ាងនេះក្តី ម្ចាស់ផ្ទះឈ្មោះស៊ុយ គឹម ត្រូវបានចោរវាយ បណ្ដាលឱ្យហើមមុខហើមមាត់ ។ ចំណែកស្ត្រីជាអនុប្រធានភូមិដំរីកូន ឈ្មោះហែម វួន ក៏ត្រូវចោរចាប់ចងជាប់ផងដែរ ។
លោក ជាង សុវណ្ណារិទ្ធ អធិការនគរបាលស្រុកបរិបូរណ៍ នៅព្រឹកថ្ងៃទី១១ ធ្នូ នេះ បានប្រាប់ថា ពិតជាមានករណីប្លន់ កាលពីយប់មែន ដោយមានជនល្មើសប្រមាណ៥នាក់ដើរចូលទៅក្នុងភូមិ សំដៅទៅផ្ទះជនរងគ្រោះ ដោយចាប់ចងនិងវាយដំបុរសឈ្មោះ ស៊ុយ គឹម ជាម្ចាស់ផ្ទះ ដោយសួររកគោបា (វត្ថុសាកសិទ្ឋ)។
ចំណែកឯស្ត្រីជាប្រពន្ធ ឈ្មោះចាន់ ផល ជាជនពិការដេកតែលើគ្រែ ជនល្មើសមិនធ្វើអី្វនោះទេ តែបានចាប់កូនស្រីម្ចាស់ផ្ទះរងគ្រោះរុញឡើងលើផ្ទះ បង្ខំឱ្យនាងរកគោបាដែលឪពុកនាងលាក់ទុក តែនាងប្រកែកថា «គ្មាន» ហើយប្រហែលជាមានការប្រតាយប្រតប់ ឬស្រែកឮដល់អ្នកជិតខាង ទើបប្រជាពល រូមទាំងស្រី្ត ឈ្មោះហែម វួន ជាអនុប្រធានភូមិដំរីកូនចូលទៅជួយ ប៉ុន្តែគ្រាន់តែដើរចូលដល់ក្នុងភូមិ ក៏ត្រូវចោរចាប់ស្រី្តជា អនុប្រធានភូមិចងជាប់ និងបានដោះយកចិញ្ចៀនផ្លាកទីន២វង់ ។
ប្រភពបន្តថា ដោយនៅលើផ្ទះរកគោបាមិនឃើញ ក្រុមចោរចុះមកដីវិញ ហើយនាំគ្នាគេចខ្លួន តែពេលប្រជាពលរដ្ឋបំរុងដេញតាម ត្រូវក្រុមជនទាំងនោះស្រែកប្រាប់ថា «កុំតាម បើនៅតែតាមគេនឹងបាញ់» បន្ទាប់មកត្រូវជនល្មើសបាញ់មកលើប្រជាពលរដ្ឋ ទើបបណ្តាលឱ្យត្រូវរបួសយុវជនម្នាក់ខាងលើនេះ ។
បើតាមការពិនិត្យបឋម ទ្រព្យសម្បត្តិដែលត្រូវបាត់បង់មានចិញ្ចៀន ប្លាទីន២វង់ ទូរស័ព្ទដៃ២គ្រឿង និងប្រាក់ខ្មែរ៥ម៉ឺនរៀល ។ ចំណែកនៅកន្លែងកើតហេតុ សមត្ថកិច្ចរកមិនឃើញសំបកគ្រាប់កាំភ្លើងនោះទេ តែសង្ស័យថា ក្រុមជនល្មើសប្រើកាំភ្លើងខ្លីម៉ាករ៉ូឡូ។ បច្ចុប្បន្ន សមត្ថកិច្ចកំពុងស៊ើបអង្កេតរឿងនេះ ដើម្បីស្រាវជ្រាវរកជនសង្ស័យទាំងនោះ ។
ប្រភព៖ កោះសន្តុិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
